ଓଡ଼ିଶା ଲିଡ୍ସ(ଯାଜପୁର): ବରୀ ଅଞ୍ଚଳରେ ନାରୀ ମଙ୍ଗଳ ସେବା ସଦନ କହିଲେ ବରୀ ବାଗଦା ସ୍ଥିତ ଡାକ୍ତର ସୁରେଖା ଓଝାଙ୍କ ବାସଗୃହରେ ଥିବା ଘରୋଇ ଚିକତ୍ସାଳୟକୁ ବୁଝାଏ । ଏହି ଘରୋଇ ଚିକତ୍ସାଳୟରେ ସ୍ୱର୍ଗତା ଓଝା ଦୀର୍ଘ ୫୬ ବର୍ଷ ଧରି ବରୀ ଅଞ୍ଚଳର ଲକ୍ଷ ଲକ୍ଷ ରୋଗୀଙ୍କ ଆହୋରାତ୍ର ସେବା କରିଛନ୍ତି । କି ବର୍ଷା, କି ଖରା କି ଶୀତ ରୋଗୀ କେବେ ତାଙ୍କ ନିକଟରୁ ଚିକିତ୍ସା ନପାଇ ଫେରି ନାହିଁ । ଜଣେ ସ୍ତ୍ରୀ ରୋଗ ବିଶେଷଜ୍ଞ ଭାବେ ସେ ବେଶ ସୁନାମ ଅର୍ଜନ କରିଥିଲା ବେଳେ ୧୦ ହଜାରରୁ ଅଧିକ ଶିଶୁ ତାଙ୍କ ଘରୋଇ ଚିକିତ୍ସାଳୟରେ ଜନ୍ମ ହୋଇଛନ୍ତି ।
ନଦୀନାଳ ଘେରା ବରୀ ଏକଦା ଗମନା ଗମନ ଠାରୁ ଦୂରରେ ଥିଲା । ବରୀକୁ ଆସିଲେ କେଉଁଠି ନା କେଉଁଠି ନଦୀ ନାଳ ପାର କରିବାକୁ ହୁଏ। ବିକଳ ସ୍ୱାସ୍ଥ୍ୟସେବା ବରୀବାସୀଙ୍କ ଚିନ୍ତାର ପ୍ରମୁଖ କାରଣ ଥିଲା । ସ୍ବାସ୍ଥ୍ୟସେବା ବିପର୍ଯ୍ୟସ୍ତ ଅବସ୍ଥାରେ ଥିଲା ବେଳେ ଗୋପବନ୍ଧୁ ଚୌଧୁରୀ ଓ ରମାଦେବୀଙ୍କ ସମୟର ମାତୃମଙ୍ଗଳ କେନ୍ଦ୍ର କେବଳ ପ୍ରସୂତୀଙ୍କ ଏକମାତ୍ର ଚିକିତ୍ସା କେନ୍ଦ୍ର ଥିଲା।
ଏପରି ଏକ ସମୟରେ ୧୯୬୭ ମସିହାରେ ଡାକ୍ତର ସୁରେଖା ଓଝାଙ୍କ ବିବାହ ବରୀ ଅଞ୍ଚଳର ବିଶିଷ୍ଟ ଶିକ୍ଷାବିତ ତଥା ତତ୍କାଳୀନ କେନ୍ଦ୍ରାପଡ଼ା କଲେଜର ଇଂରାଜୀ ଅଧ୍ୟାପକ କୃଷ୍ଣଚନ୍ଦ୍ର ଓଝାଙ୍କ ସହିତ ହୋଇଥିଲା। ଏହା କିନ୍ତୁ ବରୀବାସୀଙ୍କ ପାଇଁ ଆଶିର୍ବାଦ ହୋଇଥିଲା । ଖୋର୍ଦ୍ଧା ଜିଲ୍ଲା ଜଟଣୀ ଗୋବିନ୍ଦପୁର ଗ୍ରାମର ସ୍ବର୍ଗତ ରାଜକିଶୋର ମହାପାତ୍ର ଓ ଆଶାମଣିଙ୍କ କୋଳରେ ୧୯୪୨ ମସିହା ଡିସେମ୍ବର ମାସ ୨୩ ତାରିଖରେ ଜନ୍ମ ଗ୍ରହଣ କରିଥିଲେ ସ୍ୱର୍ଗତା ଓଝା।ଯେତେବେଳେ ଜଣେ ଡାକ୍ତରୀ ପାଠ ପଢିବା ସ୍ୱପ୍ନ ଥିଲା ସେତେବେଳେ କଟକ ଶ୍ରୀରାମଚନ୍ଦ୍ରଭଞ୍ଜ ମେଡ଼ିକାଲ କଲେଜରେ ଡାକ୍ତରୀ ଛାତ୍ରୀ ଭାବେ ଅଧ୍ୟୟନ କରୁଥିଲେ ସୁରେଖା ଓଝା ।
ପାଠ ପଢୁଥିଲା ବେଳେ ୧୯୬୭ ମସିହାରେ ତାଙ୍କର ବିବାହ ହୋଇଥିଲା କୃଷ୍ଣଚନ୍ଦ୍ର ଓଝାଙ୍କ ସହିତ। ବିବାହ ପରେ ଡାକ୍ତରୀ ପାଠ ଶେଷ କରି ସରକାରୀ ଚାକିରୀ ନକରି ବିବାହର ୩ ବର୍ଷ ପରେ ଅର୍ଥାତ ୧୯୭୦ ମସିହାରେ ଜଣେ ଦାୟିତ୍ୱ ସମ୍ପନ୍ନ ବୋହୁ ଭାବେ ବରୀର ସେବା କରିବା ପାଇଁ ନିଷ୍ପତି ନେଇଥିଲେ । ବରୀ ବଗଦା ସ୍ଥିତ ନିଜ ବାସଭବନରେ ଆରମ୍ଭ ହେଲା ନାରୀ ମଙ୍ଗଳ ସେବା ସଦନ ନାମରେ ଘରୋଇ ଚିକିତ୍ସାଳୟ। ବିଶେଷ ଭାବେ ଶିଶୁ ଓ ପ୍ରସୂତୀ ମାନଙ୍କୁ ସେବା ଯୋଗାଇ ସମଗ୍ର ବରୀ ଓ ପାଖଆଖ କେତକ ବ୍ଲକରେ ମଧ୍ୟ ବେଶ ଶ୍ରଦ୍ଧା, ସମ୍ମାନ ଓ ବିଶ୍ୱାସ ଶ୍ରୁଷ୍ଟି କଲେ ।
ବରୀ ଅଞ୍ଚଳର ୩ପିଢିକୁ ସେବା ଯୋଗାଇ ଏହି ମହିୟସୀ ମହିଳା ଡାକ୍ତର ସେବାର ଅନନ୍ୟ ଉଦାହରଣ ପାଲଟି ଯାଇଥିଲେ । କାହା ପାଇଁ ବୋଉ, ବଡ଼ବୋଉ, ଖୁଡି ଭାବେ ସେ ପରିଚୟ ସୃଷ୍ଟି କରିଥିଲେ । ସ୍ବାମୀ ଉଚ୍ଚ ବେତନ ପ୍ରାପ୍ତ ଶିକ୍ଷାବିତ୍, ନିଜେ ପେସାରେ ଡାକ୍ତର ହୋଇ ମଧ୍ୟ ଜଣେ ସାଧାରଣ ଗୃହିଣୀ ଭାବେ ରହିବାକୁ ପସନ୍ଦ କରୁଥିଲେ । ବୃତ୍ତି ଗତ ରୋଗୀ ସେବା ସହିତ ଜଣେ ସୁଗୃହିଣୀ ଭାବେ ପରିବାର ଯତ୍ନ ମଧ୍ୟ ନେଇଥାନ୍ତି। ଓଡ଼ିଆ ଘରର ପୂଜାପାଠ ଓ ପରମ୍ପରା ଉପରେ ମଧ୍ୟ ସମାନ ଗୁରୁତ୍ବ ଦେଇଥାନ୍ତି । ରୋଗୀ ମାନଙ୍କୁ ତାଙ୍କ ମାତୃବତ ବ୍ୟବହାର ସମସ୍ତଙ୍କୁ ଆପଣାର କରିଥାଏ। ତିନିପୁତ୍ରର ମା ହୋଇଥିଲା ବେଳେ ବଡ଼ ପୁଅ ବରୀ ଅଞ୍ଚଳର ବିଶିଷ୍ଟ ବ୍ୟବସାୟୀ, ଦ୍ଵିତୀୟ ପୁତ୍ର ଇଞ୍ଜିନିୟର ଓ ସାନପୁଅ ସରକାରୀ ଡାକ୍ତର । ପୁଅ, ବୋହୁ, ନାତି, ନାତୁଣୀଙ୍କୁ ନେଇ ତାଙ୍କ ପରିବାରର ସେ ହିଁ ଥିଲେ ମୁଖ୍ୟ । ସମସ୍ତଙ୍କୁ ଗୋଟିଏ ସୁତାରେ ବାନ୍ଧି ରଖିଥିଲେ ।
ଜଣେ ମହିୟସୀ ମହିଳା ଭାବେ ଜୀବନର ଶେଷ ସମୟ ପଯ୍ୟନ୍ତ ସେବା ଯୋଗାଇ ଗତ ଗତ ୨୯ ତାରିଖରେ ପରଲୋକ ଗମନ କରିଥିଲେ । ତାଙ୍କୁ ହରାଇ ସମଗ୍ର ବରୀ ଅଞ୍ଚଳ ଆଜି ଶୋକରେ ବୁଡି ଯାଇଥିଲା। ସମସ୍ତଙ୍କ ମୁହଁରେ ଥିଲା ସୁରେଖା ଓଝା ଚାଲିଗଲେ । ଆଜି ତାଙ୍କର ଏକାଦଶାହ ତିଥିରେ ସମଗ୍ର ବରୀ ଅଞ୍ଚଳବାସୀ ଅମର ଆତ୍ମାର ସଦ୍ ଗତି କାମନା କରିବା ସହିତ ବିନମ୍ର ଶ୍ରଦ୍ଧାଞ୍ଜଳି ଜଣାଉଛନ୍ତି ତାଙ୍କ ପ୍ରିୟ ମଣିଷ ଡାକ୍ତର ସୁରେଖା ଓଝାଙ୍କୁ । ଏହି ମହାନ ଡାକ୍ତରଙ୍କୁ ଓଡ଼ିଶା ଲିଡ୍ସ ପରିବାର ପକ୍ଷରୁ ଭକ୍ତିପୂତ ଶ୍ରଦ୍ଧାଞ୍ଜଳି ।
