ଚୋରା ବାଲି ଗାଡି ଜବତ,ଡ୍ରାଇଭର ଗିରଫ

ଓଡ଼ିଶା ଲିଡ୍ସ(ଯାଜପୁର):ରସୁଲପୁର ତହସିଲ ଅନ୍ତର୍ଗତ ବ୍ରହ୍ମବରଦା ଅଞ୍ଚଳ ଏବେ ବାଲି ମାଫିଆଙ୍କ ଭୂସ୍ୱର୍ଗ ପାଲଟିଛି। ସ୍ପଷ୍ଟ ଦିବାଲୋକରେ ମାଫିଆମାନେ ବିପୁଳ ବାଲି ଲୁଟ କରୁଛନ୍ତି । ବାରମ୍ବାର ଅଭିଯୋଗ ପରେ ଗତକାଲି ବିଳମ୍ବିତ ରାତ୍ରିରେ ବ୍ରହ୍ମବରଦା ପୋଲିସ ପଦକ୍ଷେପ ନେଇଛି । ପୋଲିସ ମାଛ ମାର୍କେଟ ନିକଟରୁ ଏକ ଚୋରା ବାଲି ବୋଝେଇ ହାଇୱା ଗାଡି ଜବତ କରିଛି । ପୋଲିସ ମାମଲା ରୁଜୁ କରିବା ସହିତ ଡ୍ରାଇଭରକୁ ଗିରଫ କରି କୋର୍ଟଚାଲାଣ କରିଛି। ଗିରଫ ଡ୍ରାଇଭର ଜଣକ କୁଆଖିଆ ଥାନା ଅଧିନସ୍ଥ ନରସିଂହପୁର ଗ୍ରାମର ରଞ୍ଜନ ସାହୁ ବୋଲି ପୋଲିସ ସୂତ୍ରରୁ ଜଣା ପଡିଛି। ବ୍ରାହ୍ମଣୀ ନଦୀରୁ ବାଲି ଲୋଡ଼ କରି ଏହି ବାଲି ବୋଝେଇ ଗାଡି ବେପରୁଆ ଭାବେ ଯିବା ଦ୍ୱାରା ବରୁଆଁ-ବାଲିଚନ୍ଦ୍ରପୁର ରାସ୍ତାରେ ଗତାଗତ କରୁଥିବା ଲୋକେ ବିପଦର ସମ୍ମୁଖୀନ ହେଉଛନ୍ତି। ଏନେଇ ଗ୍ରାମବାସୀ ଏହି ଗାଡି ଗୁଡିକୁ ଅନେକଥର ଅଟକ ରଖିବା ନଜିର ରହିଛି । ଏ ନେଇ ବିଭାଗୀୟ ମନ୍ତ୍ରୀ,ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନେଉ ନାହାନ୍ତି। ଅନ୍ୟପକ୍ଷରେ ଯାତାୟତ ପାଇଁ ରାସ୍ତା କିମ୍ବା ପରିବେଶ ମଞ୍ଜୁର ନଥିବା ବେଳେ ଦିନରାତି ବାଲି ବୋଝେଇ ଗାଡି ଗୁଡିକ ବିପଦପୂର୍ଣ୍ଣ ଭାବେ ଗାଁ ରାସ୍ତାରେ ଯାତାୟତ କରୁଥିବା ଗ୍ରାମବାସୀ ବାରମ୍ବାର ଅଭିଯୋଗ କରି ଆସୁଥିଲେ ମଧ୍ୟ ପ୍ରଶାସନ ନିରବ ଦ୍ରଷ୍ଟା ସାଜିଥିବା ଅଭିଯୋଗ ହୋଇଛି ।