ଓଡ଼ିଶା ଲିଡ୍ସ(ଯାଜପୁର):ଯାଜପୁର ଜିଲ୍ଲା ପାଣିକୋଇଲି ଠାରେ ପ୍ରାୟ ୧୦୨ କୋଟି ଟଙ୍କା ବ୍ୟୟରେ ନିର୍ମାଣ ହୋଇଛି ଟ୍ରୋମା କେୟାର ଫେଶିଲିଟି ସେଣ୍ଟର । ଏହାର ନିର୍ମାଣ କାର୍ଯ୍ୟ ଦୀର୍ଘ ଦିନହେଲା ସରିଥିଲେ ମଧ୍ୟ ଆଜି ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇ ପାରିନାହିଁ । ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖା ଦେଇଛି । ନିକଟରେ ଏ ନେଇ ଯାଜପୁର ୟୁଥ୍ ଫୋରମର ସଭାପତି ରାକେଶ ସାହୁ ଦଶ ହଜାର ଦସ୍ତଖତ ସଂଗ୍ରହ କରି ମୁଖ୍ୟମନ୍ତ୍ରୀଙ୍କ ନିକଟକୁ ପଠାଇଥିଲେ । ଏହା ପରେ କୋରେଇ ବିଧାୟକ ଆକାଶ ଦାସ ନାୟକ ମଧ୍ୟ ଏହାକୁ ଉପଖଣ୍ଡସ୍ତରୀୟ ଚିକିତ୍ସାଳୟରେ ପରିଣତ କରିବା ନିମନ୍ତେ ମୁଖ୍ୟମନ୍ତ୍ରୀ ଓ ସ୍ୱାସ୍ଥ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ।
ଏହି ଚିକିତ୍ସାଳୟକୁ ଏକ ଉପଖଣ୍ଡ ସ୍ତରୀୟ ଚିକିତ୍ସାଳୟ କରିବାକୁ ପଦକ୍ଷେପ ନେବା ପରିବର୍ତ୍ତେ ଗତ କାଲି ମୁଖ୍ୟମନ୍ତ୍ରୀ ଏହି ଚିକିତ୍ସାଳୟକୁ ଘରୋଇ ସଂସ୍ଥା ହାତକୁ ଟେକି ଦେବାକୁ ଘୋଷଣା କରିଛନ୍ତି । ଏହି ଖବର ପାଇ ଆଜି ଯାଜପୁର ୟୁଥ୍ ଫୋରମ ପକ୍ଷରୁ ଏକ ବିକ୍ଷୋଭ ପ୍ରଦର୍ଶନ କରାଯାଇଥିଲା । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବରିଷ୍ଠ ସମାଜସେବୀ ସୁବାସ ଧଳ, ରାଜକିଶୋର ମଲ୍ଲିକ, ରବୀନ୍ଦ୍ର ଘଡେ଼ଇ, ସନ୍ତୋଷ ରାୟ, ପ୍ରଶାନ୍ତ ବିଶ୍ଵାଳ, ରୁଦ୍ର ବେହେରା, ରଞ୍ଜିତ ପରିଡ଼ା, ଶ୍ରୀକାନ୍ତ ପରିଡ଼ା, ନିରାକାର ସ୍ୱାଇଁ, ରିତିକ ସାହୁ, ଉପସ୍ଥିତ ଥିଲେ । ସରକାର ତୁରନ୍ତ ନିଷ୍ପତ୍ତି ପ୍ରତ୍ୟାହାର କରିବା ଏବଂ ଏହି ଚିକିତ୍ସାଳୟକୁ ଉପଖଣ୍ଡସ୍ତରୀୟ ଚିକିତ୍ସାଳୟ ଘୋଷଣା କରିବାକୁ ସମସ୍ତେ ଦାବି କରିଥିଲେ । ଯଦି ସରକାର ତୁରନ୍ତ ପଦକ୍ଷେପ ନ ନିଅନ୍ତି ତେବେ ଆଗାମୀ ଦିନକୁ ତୀବ୍ରତର କରାଯିବ ବୋଲି ଚେତାବନୀ ଦିଆଯାଇଛି ।
