ଓଡ଼ିଶା ଲିଡ୍ସ(ବ୍ୟୁରୋ): ଆସନ୍ତା ମାର୍ଚ୍ଚ ମାସରେ ୪ ରାଜ୍ୟସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ । ବିଧାନସଭାରେ ଶାସକ ବିଜେପି ଓ ଵିରୋଧି ଦଳ ବିଜେଡିର ସଂଖ୍ୟା ଦୃଷ୍ଟିରୁ ଉଭୟ ଦଳ ତିନିଟି ଆସନରେ ନିଜ ପ୍ରାର୍ଥୀଙ୍କୁ ବିଜୟୀ କରି ପାରିବେ । ସେଥିମଧ୍ୟରୁ ବିଜେପି ଦୁଇଟି ଆସନରେ ନିଜ ପସନ୍ଦର ପ୍ରାର୍ଥୀଙ୍କୁ ବିଜୟୀ କରିବା ସମ୍ଭବ ଥିଲା ବେଳେ ବିଜେଡି ଗୋଟିଏ ଆସନରେ ନିଜ ପସନ୍ଦର ପ୍ରାର୍ଥୀଙ୍କୁ ବିଜୟୀ କରି ପାରିବ । ଉଭୟ ଦଳ ତିନି ଜଣ ପ୍ରାର୍ଥୀଙ୍କୁ ବିଜୟୀ କରିବା ପରେ ଅବଶିଷ୍ଠ ଭୋଟ ଚତୁର୍ଥ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବ । ଆଗାମି ରାଜ୍ୟସଭା ନିର୍ବାଚନରେ କିଏ ଚତୁର୍ଥ ପ୍ରାର୍ଥୀ ହେବ ସେ ନେଇ ବ୍ୟାପକ ଚର୍ଚ୍ଚା ଚାଲିଥିଲା ବେଳେ ବିଜେଡିର କିଏ ପ୍ରଥମ ପସନ୍ଦର ପ୍ରାର୍ଥୀ ହେବ ତାକୁ ନେଇ ମଧ୍ୟ ଚର୍ଚ୍ଚା ଥମୁ ନାହିଁ । ଭି.କେ.ପାଣ୍ଡିଆନଙ୍କ ଧର୍ମପତ୍ନୀ ସୁଜାତା ପାଣ୍ଡିଆନ ବିଜେଡିର ପ୍ରଥମ ପସନ୍ଦ ପ୍ରାର୍ଥୀ ହେବା ନେଇ ଜୋରଦାର ଆଲୋଚନା ଚାଲିଥିଲା ବେଳେ ଦଳ ମଧ୍ୟରେ ଏହାକୁ ନେଇ ବିବାଦ ଦେଖା ଦେଇଛି । ଦଳ ମଧ୍ୟରେ ଗୋଷ୍ଠି ବିବାଦ ତୀବ୍ର ହେଉଥିଲା ବେଳେ ଅରବିନ୍ଦ ମହାପାତ୍ରଙ୍କ ନିଲମ୍ବନ ମଧ୍ୟ ଝଡ଼ ସୃଷ୍ଟି କରିଛି । ଏ ନେଇ କେହି ମୁହଁ ଖୋଲୁ ନଥିଲେ ମଧ୍ୟ ସଂଖ୍ୟାଧିକ ନେତା ଦଳ ସଭାପତି ନବୀନଙ୍କ ମନ୍ତବ୍ୟକୁ ନେଇ ଖୁସି ନଥିବା ଚର୍ଚ୍ଚା ହେଉଛି । ଏପରି ସ୍ଥଳେ ନବୀନ ସୁଜାତାଙ୍କୁ ପ୍ରାର୍ଥୀ କରି ରିକ୍ସ ନେବାକୁ ଚାହୁଁ ନଥିବା ମଧ୍ୟ ମତ ପ୍ରକାଶ ପାଇଛି ।
ବିଗତ ଦିନରେ ବିଜେଡି ରାଜ୍ୟର ମହିଳା ଭୋଟରଙ୍କୁ ନେଇ ବେଶ ବଳଶାଳୀ ଥିଲା । ସରକାର ମହିଳାଙ୍କ ଉନ୍ନତି ପାଇଁ ବିଭିନ୍ନ ପଦକ୍ଷେପ ମଧ୍ୟ ନେଇଥିଲେ । ହେଲେ ବିଜେପି ସରକାରର ସୁଭଦ୍ରା ଯୋଜନା ବିଜେଡିର ଅଙ୍କକୁ ବିଗାଡି ଦେଇ ସାରିଛି । ତେଣୁ ଦଳ ଚାହୁଁଚି ରାଜ୍ୟ ସଭାକୁ ଜଣେ ମହିଳାଙ୍କୁ ପଠାଇ ରାଜ୍ୟର ମହିଳାଙ୍କ ଭିତରେ ଦଳ ପ୍ରତି ସମର୍ଥନ ବୃଦ୍ଧି କରିବ । ଦଳର ପାଣ୍ଡିଆନ ସମର୍ଥକ ଗୋଷ୍ଠି ସୁଜାତାଙ୍କୁ ନେଇ ଲବି ଆରମ୍ଭ କରିଥିଲା ବେଳେ ସେମାନଙ୍କୁ ବିରୋଧ ଭୟ ଘାରିଛି ।
ଏପରି ସ୍ଥଳେ ଯାଜପୁରର ପୂର୍ବତନ ସାଂସଦ ଶର୍ମିଷ୍ଠା ସେଠୀଙ୍କ ନାମ ଚର୍ଚ୍ଚାର ପରିଧି ଭିତରେ ଥିବା ବିଶ୍ୱସ୍ଥ ସୁତରୁ ଜଣା ଯାଇଛି । ୨୦୧୯ ରୁ ୨୦୨୪ ପର୍ଯ୍ୟନ୍ତ ଲୋକସଭା ସାଂସଦ ଥିଲେ ଶର୍ମିଷ୍ଠା । ଜଣେ ଭଦ୍ର, ନମ୍ର ଓ ଉଚ୍ଚଶିକ୍ଷିତା ମହିଳା ଭାବେ ପରିଚିତ ଶର୍ମିଷ୍ଠା ଦୀର୍ଘ ୫ ବର୍ଷ ମଧ୍ୟରେ ଲୋକସଭାରେ ବେଶ ପ୍ରଭାବୀ ପ୍ରଦର୍ଶନ କରିଥିଲେ । ଏବେ ମଧ୍ୟ ସେ ନିଜକୁ ରାଜ୍ୟ ରାଜନୀତି ସହିତ ଜିଲ୍ଲା ରାଜନୀତିରେ ବେଶ ସକ୍ରିୟ ରଖିଛନ୍ତି । ଯାଜପୁର ଜିଲ୍ଲା ବିଜେଡିରେ ବିବାଦ ଉଗ୍ରରୂପ ନେଉଥିଲା ବେଳେ ସେ ବିବାଦ ଠାରୁ ଉର୍ଦ୍ଧ୍ବରେ ମଧ୍ୟ ରହିଛନ୍ତି । ବିଭିନ୍ନ ନିର୍ବାଚନ ମଣ୍ଡଳୀର ଦଳୀୟ କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରୁଛନ୍ତି । ଦଳ ତାଙ୍କୁ ଯଦି ରାଜ୍ୟ ସଭା ପଠାଏ ତେବେ ସେ ରାଜ୍ୟ ସଭାରେ ମଧ୍ୟ ପ୍ରଭାବୀ ପ୍ରଦର୍ଶନ କରି ପାରିବେ ବୋଲି ମତ ପ୍ରକାଶ ପାଇଛି । ଏହା ସହିତ ଯାଜପୁର ବିଜେଡି ମଧ୍ୟ ସଙ୍ଗଠିତ ହୋଇ ପାରିବ । ଅନ୍ୟ ପକ୍ଷରେ ରାଜ୍ୟ ସଭାର ଅନ୍ୟତମ ମହିଳା ସାଂସଦ ସୁଲତା ଦେଓ ରାଜ୍ୟସଭାରେ ରାଜ୍ୟ ସ୍ୱାର୍ଥ ପାଇଁ ଲଢେଇ ଜାରି ରଖିଥିଲା ବେଳେ ଉଭୟ ଶର୍ମିଷ୍ଠା ଓ ସୁଲତା ମିଳିତ ଭାବେ ରାଜ୍ୟ ସ୍ୱାର୍ଥ ପାଇଁ ପ୍ରଭାବୀ ପ୍ରଦର୍ଶନ କରି ପାରିବେ ବୋଲି ମତ ପ୍ରକାଶ ପାଇଛି ।
