ବିଜୁ ବାବୁଙ୍କ ପ୍ରତିମୂର୍ତ୍ତି ନିକଟରୁ ଲାଇଟ ଭାଙ୍ଗିଦେବା ତାଙ୍କ ସ୍ମୃତି ପ୍ରତି ଗଭୀର ଅସମ୍ମାନ- ବିଜୟ ନାୟକ
ଓଡ଼ିଶା ଲିଡ୍ସ(ବ୍ୟୁରୋ): ଯାଜପୁର କିଆନାଳୀ ଠାରେ ସ୍ଥାପିତ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ନିକଟରୁ କେହି ଲାଇଟ ନେଇଯିବା ନେଇ ଆଜି “ଓଡିଶା ଲିଡ୍ସ”ରେ ଖବର ପ୍ରକାଶ ପାଇଥିଲା । ଏହି ଖବର ପ୍ରକାଶ ପରେ ବରିଷ୍ଠ ବିଜେଡି ନେତା ବିଜୟ ନାୟକ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ନିଜ ପ୍ରତିକ୍ରିୟାରେ ଶ୍ରୀ ନାୟକ କହିଛନ୍ତି ଯାଜପୁର ସ୍ଥିତ ମହାରାଜା ଯଯାତି କେଶରୀ ମେଡିକାଲ କଲେଜ ସମ୍ମୁଖରେ ଥିବା ମହାନ ଜନନାୟକ, ସ୍ୱାଧୀନତା ସଂଗ୍ରାମୀ, ପ୍ରବାଦ ପୁରୁଷ, ଓଡ଼ିଶାର ବରପୁତ୍ର ବିଜୁ ପଟ୍ଟନାୟକଙ୍କ ବିଶାଳ ପ୍ରତିମୂର୍ତ୍ତିକୁ ଆଲୋକିତ କରିବା ପାଇଁ ଲଗାଯାଇଥିବା ହାଲୋଜେନ ଲାଇଟ ଭାଙ୍ଗି ଦେବା ଘଟଣା ଅତ୍ୟନ୍ତ ନିନ୍ଦନୀୟ ଏବଂ ଦୁଃଖଦାୟକ। ଏହା ଓଡ଼ିଆ ଅସ୍ମିତା ଓ ବିଜୁ ବାବୁଙ୍କ ସ୍ମୃତି ପ୍ରତି ଗଭୀର ଅସମ୍ମାନ।
ଜିଲ୍ଲା ପ୍ରଶାସନ ଏହି ଘଟଣାର ତୁରନ୍ତ ତଦନ୍ତ କରି ଦୋଷୀଙ୍କୁ ଚିହ୍ନଟ କରି କଠୋର କାର୍ଯ୍ୟାନୁଷ୍ଠାନ ନେବା ସହ ଅବିଳମ୍ବେ ପ୍ରତିମୂର୍ତ୍ତି ଚତୁର୍ଦ୍ଦିଗରେ ଆଲୋକ ବ୍ୟବସ୍ଥା ପୁନଃସ୍ଥାପନ ପାଇଁ ତ୍ୱରିତ ପଦକ୍ଷେପ ନେବା ଆବଶ୍ୟକ।
ବିଜୁ ପଟ୍ଟନାୟକ ଓଡ଼ିଆ ସ୍ୱାଭିମାନ ଓ ସାହସର ପ୍ରତୀକ। ବିଜୁବାବୁଙ୍କ ସ୍ମୃତି ସୁରକ୍ଷାରେ କୌଣସି ପ୍ରକାର ଅବହେଳାକୁ ଯାଜପୁରବାସୀ କଦାପି ସହିବେ ନାହିଁ।
