ଓଡ଼ିଶା ଲିଡ୍ସ(ବ୍ୟୁରୋ):ପହଲଗାମ ଆତଙ୍କୀ ହମଲାର ମାଷ୍ଟର ମାଇଣ୍ଡ ମୁସାକୁ ନିପାତ କରିଛି ଭାରତୀୟ ସେନା। ଅପରେସନ ସିନ୍ଦୁର ପରେ ଭାରତୀୟ ସେନା ବାହିନୀକୁ ବଡ଼ ସଫଳତା ମିଳିଛି। ଲସ୍କର-ଇ-ତୋଇବାର ଏହି ଟପ୍ କମାଣ୍ଡର ହାସିମ ମୁସାକୁ ଏନକାଉଣ୍ଟରରେ ମାରିଛି ଭାରତୀୟ ସେନା। ମୁସା ପୂର୍ବରୁ ପାକିସ୍ତାନ ସେନାରେ ସାମିଲ ଥିଲା। ଶ୍ରୀନଗରରେ ସେନା ପକ୍ଷରୁ ଅପରେସନ ମହାଦେବ ମାଧ୍ୟମରେ ତାକୁ ନିପାତ କରାଯାଇଛି । ପହଲଗାମ ହମଲା ସହ ସୋନମାର୍ଗ ଟନେଲ ଆକ୍ରମଣ ଘଟଣାର ମଧ୍ୟ ସେ ମାଷ୍ଟର ମାଇଣ୍ଡ ଥିଲା ।
୨୦୨୨ରେ ଲସ୍କର ସହ ସାମିଲ ହୋଇଥିଲା ମୁସା। ପହଲଗାମ ହମଲା ପାଇଁ ଯୋଜନା କରିବାରୁ ଆରମ୍ଭ କରି ଆକ୍ରମଣ ପର୍ଯ୍ୟନ୍ତ ହାସିମ ମୁସା ଗୁରୁତ୍ବପୂର୍ଣ୍ଣ ଭୂମିକା ନେଇଥିଲା। ଅପରେସନ୍ ମହାଦେବରେ ସେନା ଓ ଜମ୍ମୁ କାଶ୍ମୀର ପୋଲିସ ସାମିଲ ଥିଲେ । ଏହି ମିଳିତ ଅପରେସନରେ ୩ ଆତଙ୍କବାଦୀ ନିହତ ହୋଇଛନ୍ତି।
ଲିଡୱାସରେ ଏହି ଅପରେସନ ହୋଇଥିଲା । ଏହି ଅଞ୍ଚଳ ହେଉଛି ଶ୍ରୀନଗର ବାହାରେ ଘନ ଜଙ୍ଗଲ ଭିତରେ ଥିବା ଅଞ୍ଚଳ। ଏଠାରେ ଆତଙ୍କବାଦୀଙ୍କ ଗତିବିଧି ଚାଲେ। ଗୁଇନ୍ଦା ତଥ୍ୟ ଆଧାରରେ ଏଠାରେ ମିଳିତ ଅପରେସନ ହୋଇଥିଲା । ଏବେ ବି ସେଠାରେ ଅପରେସନ୍ ଜାରି ରହିଛି।
ଚଳିତ ବର୍ଷ ଏପ୍ରିଲ ମାସ ୨୨ ତାରିଖରେ ପହଲଗାମ ଆତଙ୍କୀ ହମଲା ହୋଇଥିଲା । ଯେଉଁଥିରେ ୨୫ ଭାରତୀୟଙ୍କ ସହ ଜଣେ ନେପାଳୀ ନାଗରିକଙ୍କର ମୃତ୍ୟୁ ହୋଇଥିଲା। ଯାହା ସାରା ଦେଶକୁ ସ୍ତବ୍ଧ କରି ଦେଇଥିଲା । ଯାହାକୁ ନେଇ ଦେଶ ଅପରେସନ ସିନ୍ଦୁର ଜରିଆରେ ପାକିସ୍ତାନ ଆତଙ୍କୀ ଆଡ୍ଡା ଉପରେ ଆକ୍ରମଣ କରିଥିଲା ।
