ଓଡ଼ିଶା ଲିଡ୍ସ(ବ୍ୟୁରୋ): ମାର୍ଚ୍ଚ ମାସରେ ଓଡ଼ିଶାରେ ୪ଟି ରାଜ୍ୟସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ । ଏହାକୁ ନେଇ ରାଜ୍ୟ ରାଜନୀତି ବେଶ ଉଷ୍ଣ ହୋଇ ପଡିଛି । ବିଧାନସଭାରେ ବିଭିନ୍ନ ଦଳର ସ୍ଥିତି ଅନୁଯାୟୀ ଶାସକ ବିଜେପି ଦୁଇଟି ଆସନ, ବିଜେଡି ଗୋଟିଏ ଆସନ ନିର୍ଦ୍ୱନ୍ଦରେ ଜିତୁ ଥିଲା ବେଳେ ଆଉ ଗୋଟିଏ ଆସନ କିଏ ନେବ ତାକୁ ନେଇ ଅଙ୍କକଷା ଆରମ୍ଭ ହୋଇଛି । ବିଧାନସଭାରେ ବିଭିନ୍ନ ଦଳର ସ୍ଥିତି ଅନୁଯାୟୀ ବିଜେଡିର ଜଣେ ବିଜୟୀ ହେଲା ପରେ ଆହୁରି ବଳକା ଭୋଟ ରହିବ । ବିଜେପି ଦୁଇଟି ଆସନ ଜିତିବା ପରେ ମଧ୍ୟ ବିଜେପିର ବଳକା ଭୋଟ ରହିବ । ଦୁଇ ଦଳର ବଳକା ଭୋଟ ନମିଶିଲେ ଅନ୍ୟ ଜଣେ ପ୍ରାର୍ଥୀ ବିଜୟୀ ହୋଇ ପାରିବେ ନାହିଁ । ଏଭଳି ସ୍ଥିତିରେ ଚତୁର୍ଥ ଆସନ କାହା ପକ୍ଷକୁ ଯିବ ତାକୁ ନେଇ ଅଙ୍କ କଷା ଆରମ୍ଭ ହୋଇଛି ।ତ ବିଗତ ଦିନରେ ରାଜ୍ୟ ଶାସନ ସମ୍ଭାଳୁଥିବା ବିଜେଡି ମଧ୍ୟ ବିଜେପିର ପ୍ରାର୍ଥୀଙ୍କୁ ସମର୍ଥନ ଦେଇ ବିଜୟୀ କରିବାର ନଜିର ରହିଛି । ଆଗକୁ କିଏ କାହାକୁ ସମର୍ଥନ କରିବ ଅବା ନକରିବ ତାହା ଭିନ୍ନ କଥା, ହେଲେ ରାଜ୍ୟସଭା ନିର୍ବାଚନରେ ଶାସକ ବିଜେପି ଓ ଵିରୋଧିତ ଦଳ ବିଜେଡି ପ୍ରାର୍ଥୀ କରିବାକୁ କି ଆଭିମୁଖ୍ୟ ଗ୍ରହଣ କରିବେ ତା ଉପରେ ରାଜ୍ୟର ନଜର ରହିଛି ।
ଶାସକ ବିଜେପି ଗତ ସାଧାରଣ ନିର୍ବାଚନରେ ୨୪ ବର୍ଷ ଧରି ଶାସନ କ୍ଷମତାରେ ଥିବା ବିଜେଡିକୁ ପରାଜିତତ କରିଥିଲା । ନିର୍ବାଚନରେ ଓଡ଼ିଆ ଅସ୍ମିତାର ଡାକରା ଦେଇଥିଲା ବିଜେପି । ଏହି ଅସ୍ମିତାର ଡାକରା ରେ ରାଜ୍ୟବାସୀ ସରକାର ପରିବର୍ତ୍ତନ କରିଦେଇଥିଲେ । ଆସୁଥିବା ରାଜ୍ୟସଭା ନିର୍ବାଚନରେ ବିଜେପି ଓଡ଼ିଆ ଅସ୍ମିତାକୁ ବଜାୟ ରଖିବ ନା ରାଜ୍ୟ ବାହାରୁ ଅଣ ଓଡ଼ିଆଙ୍କୁ ସୁଯୋଗ ଦେବ ତାକୁ ନେଇ ଚର୍ଚ୍ଚା ଜୋର ଧରିଛି । ରାଜନୈତିକ କରିଡ଼ରରେ ହେଉଥିବା ଚର୍ଚ୍ଚା ଆଲୋଚନା ଅନୁଯାୟୀ ବିଜେପି ରାଜ୍ୟ ସଭାପତି ମନମୋହନ ସାମଲ ବିଜେପିର ପ୍ରଥମ ପସନ୍ଦ ପ୍ରାର୍ଥୀ ହେଉଛନ୍ତି । ଗତ ନିର୍ବାଚନରେ ଦଳକୁ ବିଜୟୀ କରିବାରେ ପ୍ରମୁଖ ଭୂମିକା ମନମୋହନ ସାମଲ ନେଇଥିଲା ବେଳେ ନିଜ ନିର୍ବାଚନ ମଣ୍ଡଳୀରେ ସମୟ ଦେଇ ନପାରି ପରାଜିତ ହୋଇଥିଲେ । ଏବେ ଦଳ ତାଙ୍କୁ ରାଜ୍ୟସଭା ପଠାଇ ପୁରସ୍କୃତ କରିବାକୁ ଯାଉଛି ବୋଲି ଚର୍ଚ୍ଚା ହେଉଛି । ହେଲେ ଅବଶିଷ୍ଟ ଦୁଇ ଆସନ ବିଜେପି ନେବାକୁ ରଣନୀତି ଆଙ୍କୁଥିଲା ବେଳେ ଏହି ଦୁଇ ଆସନରୁ ଓଡ଼ିଆ ନା ଅଣ ଓଡ଼ିଆ ସୁଯୋଗ ପାଇବେ ତାହା ସନ୍ଦେହ ସୃଷ୍ଟି କରିଛି । ଆଗକୁ ପଞ୍ଚାୟତ ନିର୍ବାଚନତ ଆସୁଥିଲା ବେଳେ ଦଳ ଯଦି ଅଣ ଓଡ଼ିଆଙ୍କୁ ସୁଯୋଗ ଦିଏ ତେବେ ଯେଉଁ ଓଡ଼ିଆ ଅସ୍ମିତା ଡାକରା ଦେଇ ଦଳ ରାଜ୍ୟ ଶାସନ କରୁଛି ତାହା ରାଜ୍ୟବାସୀଙ୍କୁ ଗ୍ରହଣ ହୋଇ ନପାରେ । ଏହା ବାଦ ଵିରୋଧି ମଧ୍ୟ ଏହାକୁ ପଞ୍ଚାୟତ ନିର୍ବାଚନରେ ଇସ୍ୟୁ କରିବା ବି ବିଚିତ୍ର ନୁହେଁ ।
ଅନ୍ୟ ପକ୍ଷରେ ବିଜେଡି ଯେଉଁ ଗୋଟିଏ ଆସନରେ ଜିତିବା ନିଶ୍ଚିତ ସେଇ ଆସନରୁ କାହାକୁ ପ୍ରାର୍ଥୀ କରିବ ତାହା ମଧ୍ୟ ଦଳର ଭବିଷ୍ୟତ ପାଇଁ ବେଶ ଗୁରୁତ୍ୱପୂର୍ଣ୍ଣ । ଦଳ କ୍ଷମତାରୁ ଯିବା ପରେ ଏବେ ସଙ୍କଟ ଦେଇ ଗତି କରୁଛି । ଏପରି ସ୍ଥଳେ ଦଳ ସଭାପତି ନବୀନ ପଟ୍ଟନାୟକ କି ନିଷ୍ପତି ନେଉଛନ୍ତି ତା ଉପରେ ସମସ୍ତଙ୍କ ନଜର କେନ୍ଦ୍ରୀଭୂତ ହୋଇଛି । ଦଳ ଲୋକସଭାରେ ପ୍ରତିନିଧିତ୍ୱ କରୁ ନଥିଲା ବେଳେ କେବଳ ରାଜ୍ୟସଭାରେ ଦଳର ସଦସ୍ୟ ଅଛନ୍ତି । ତେଣୁ ରାଜ୍ୟସଭାକୁ ଯିବା ପାଇଁ ଗୋଡ଼ଟେକି ବସିଥିବା ନେତାଙ୍କ ମଧ୍ୟରୁ କାହାକୁ ନବୀନ ସୁଯୋଗ ଦେବେ ତାହା ବେଶ ପ୍ରଣିଧାନ ଯୋଗ୍ୟ । ବର୍ତ୍ତମାନ ସମୟରେ ଅଣ ରାଜନୈତିକ ବ୍ୟକ୍ତିଙ୍କୁ ସୁଯୋଗ ଦେବା ଦଳ ପାଇଁ ବିପଦର କାରଣ ମଧ୍ୟ ହୋଇପାରେ । ତେଣୁ ନବୀନ ମାପିଚୁପି ପଦକ୍ଷେପ ନେବା ଜରୁରୀ । ବିବାଦରୁ ଦୂରରେ ଥିବା ଓ ଦଳ ପାଇଁ ନିଷ୍ଠାର ସହିତ କାମ କରୁଥିବା ଜଣେ ଯୁବ ନେତାଙ୍କୁ ରାଜ୍ୟସଭାକୁ ପଠାଇବା ଉଚିତ ହେବ ବୋଲି ରାଜନୈତିକ ବ୍ୟକ୍ତି ମତ ପୋଷଣ କରିଛନ୍ତି । ବିଧାନସଭାରେ କଂଗ୍ରେସ ଦଳର ଯେଉଁ ସ୍ଥିତି ସେ ନିଜର ପ୍ରାର୍ଥୀ ଦେବାକୁ ମଧ୍ୟ ଅସମର୍ଥ ।
