ଓଡ଼ିଶା ଲିଡ୍ସ(ବ୍ୟୁରୋ): ସମାଜର ଅବହେଳିତ ମାନଙ୍କୁ ସହାୟତାର ହାତ ବଢାଇବାକୁ ପ୍ରତିଷ୍ଠା ହୋଇଥିବା ଅମର ଫାଉଣ୍ଡେସନକୁ “ଦର୍ଶନ ବିପଦର ବନ୍ଧୁ ସମ୍ମାନ” ୨୦୨୫-୨୬ରେ ସମ୍ମାନୀତ କରାଯାଇଛି । ଗତ ୮ ତାରିଖ ଦିନ ଭୁବନେଶ୍ୱର ସ୍ଥିତ କସ୍ତୁରବା ନାରୀ ସଦନ ଠାରେ ଦର୍ଶନର ବାର୍ଷିକ ଉତ୍ସବରେ ଅମର ଫାଉଣ୍ଡେସନକୁ ଏହି ସମ୍ମାନରେ ସମ୍ମାନିତ କରାଯାଇ ସେବା କାର୍ଯ୍ୟକୁ ସ୍ୱୀକୃତି ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ସ୍କୁଲ ଓ ଗଣ ଶିକ୍ଷାମନ୍ତ୍ରୀ ନିତ୍ୟାନନ୍ଦ ଗଣ୍ଡ, ସାଂସଦ ପ୍ରଦୀପ ପୁରୋହିତ, ବରିଷ୍ଠ ସାମ୍ବାଦିକ ପ୍ରସନ୍ନ ମହାନ୍ତି, ଦର୍ଶନର ସମ୍ପାଦକ ବିଭୁତି ନାୟକ ପ୍ରମୁଖ ଯୋଗଦାନ କରିଥିଲେ । କାର୍ଯ୍ୟକ୍ରମରେ ଅମର ଫାଉଣ୍ଡେସନର ପ୍ରତିଷ୍ଠାତା ଅମର ମହାନ୍ତିଙ୍କୁ ମାନପତ୍ର ଦେଇ ଏହି ସମ୍ମାନରେ ସମ୍ମାନିତ କରାଯାଇଥିଲା ।
ସମାଜର ଅବହେଳିତ ମାନଙ୍କୁ ସହାୟତାର ହାତ ବଢାଇବାକୁ ବେଶ କିଛି ବର୍ଷ ହେଲା ଅମର ଫାଉଣ୍ଡେସନ ଉଦ୍ୟମ କରୁଛି । ଚଳିତ ବର୍ଷ ଫାଉଣ୍ଡେସନ ପକ୍ଷରୁ ଯାଜପୁର, କଟକ ଓ ଢେଙ୍କାନାଳ ଜିଲ୍ଲାର ବିଭିନ୍ନ ଅଞ୍ଚଳର ଅବହେଳିତ ମାନଙ୍କୁ ଶୀତ ବସ୍ତ୍ର, ଖାଦ୍ୟ ସାମଗ୍ରୀ ବଣ୍ଟନ କରାଯାଇଛି । ନିକଟରେ ଅମର ପାଉଣ୍ଡେସନ ଦ୍ଵିତୀୟ ଥର ପାଇଁ ଚର୍ଚ୍ଚିତ ନଗଡାର ତୁମୁଣି ଠାରେ ସେବା କାର୍ଯ୍ୟ କରିବାକୁ ପ୍ରସ୍ତୁତ ହେଉଥିବା ଜଣା ଯାଇଛି । ସମ୍ମାନିତ ହେଲା ପରେ ନିଜ ପ୍ରତିକ୍ରିୟାରେ ପ୍ରତିଷ୍ଠାତା ଅମର ମହାନ୍ତି କହିଛନ୍ତି ସମାଜର ଅବହେଳିତ ମାନଙ୍କୁ ସହାୟତା ପ୍ରଦାନ ଅନୁଷ୍ଠାନର ମୂଳ ଲକ୍ଷ । ଏହି ସମ୍ମାନ ଆମ ଫାଉଣ୍ଡେସନ ପରିବାରକୁ ଆଗକୁ ବଢିବାକୁ ପ୍ରେରଣା ଦେବ । ଏହା ସହିତ ସେ ଦର୍ଶନ ପରିବାରକୁ ମଧ୍ୟ କୃତଜ୍ଞତା ଜଣାଇଛନ୍ତି ।
