ଓଡ଼ିଶା ଲିଡ୍ସ(ବ୍ୟୁରୋ): ରାଜ୍ୟ ରାଜନୀତିର ଅନ୍ୟତମ ଚର୍ଚ୍ଚିତ ଯୁବନେତା ତଥା ପୂର୍ବତନ ମନ୍ତ୍ରୀ ଇଂ ପ୍ରୀତିରଞ୍ଜନ ଘଡାଇ । ତାଙ୍କୁ ତାଙ୍କ ପୁରା ନାମରେ ଯେତିକି ଲୋକ ନ ଜାଣନ୍ତି ଡ୍ୟାନି ନାମରେ ଅଧିକ ଜାଣନ୍ତି । ଲଗାତାର ତିନିଥର ବିଧାୟକ ହେଲା ପରେ ଗତ ନିର୍ବାଚନରେ ସେ ପରାଜିତ ହୋଇଥିଲେ । ହେଲେ ପରାଜୟକୁ ବେଶ ଖେଳୁଆଡ଼ ମନୋଭାବରେ ନେଇଥିଲେ । ରାଜନୀତିରେ ଜୟ ପରାଜୟ ଅଛି କହି ପରାଜୟର ଦୋଷ କର୍ମୀ କିମ୍ବା ସହଯୋଗୀଙ୍କ ଉପରେ ନ ଲଦି ନିଜ ମୁଣ୍ଡକୁ ନେଇଥିଲେ । ପରାଜୟ ପରେ ତାଙ୍କ ଆଭିମୁଖ୍ୟ କଣ ହେବ ସେ ନେଇ ଵିରୋଧି ଖୁବ ପ୍ରଚାର କରିଥିଲେ । ହେଲେ ସବୁ ଆଲୋଚନା ସମାଲୋଚନାକୁ ପଛରେ ଛାଡି ନିଜ ନିର୍ବାଚନ ମଣ୍ଡଳୀ ସହିତ ଯୋଡି ହୋଇ ରହିଛନ୍ତି । ନିଜ ଆଭିମୁଖ୍ୟରେ କିନ୍ତୁ ପରିବର୍ତ୍ତନ କରିଛନ୍ତି । ନିଜ ଅଞ୍ଚଳ ପ୍ରତି ଓ ନିଜ ଅଞ୍ଚଳର ଲୋକଙ୍କ ପ୍ରତି ଅଧିକ ଦାୟିତ୍ୱବାନ ହୋଇଛନ୍ତି । ସରକାର ବଦଳିବା ପରେ ଓ ସୁକିନ୍ଦାର ନେତୃତ୍ୱ ବଦଳିବା ପରେ ଶାନ୍ତ ସୁକିନ୍ଦା ଯେତେବେଳେ ଅଶାନ୍ତ ହୋଇଛି ସେତେବେଳେ ସେ ସ୍ୱର ଉଠାଇଛନ୍ତି । ପ୍ରଶାସନ ନିଜ ଦାୟିତ୍ୱ ସଠିକ ଭାବେ ନିର୍ବାହ ଯେତେବେଳେ ନକରିଛି ସେତେବେଳେ ସେ ପ୍ରଶାସନକୁ ତାଗିଦ କରିଛନ୍ତି । ନିଜ ଅଞ୍ଚଳର ଲୋକଟିଏ ମରିଗଲେ ନିଜ ପରିବାର ଲୋକଭଳି ସ୍ମଶାନ ଘାଟକୁ ଯାଇଛନ୍ତି । ରାତି ଅଧରେ ମେଡ଼ିକାଲ ଯାଇ ରୋଗୀଙ୍କୁ ଉଚିତ ଚିକିତ୍ସା ସେବା ମିଳୁଛିନା ନାହିଁ ତାକୁ ତଦାରଖ କରିଛନ୍ତି । ଭୁବନେଶ୍ୱରରେ ସମୟ ନ ବିତାଇ ନିଜ ଅଞ୍ଚଳରେ ଅଧିକ ସମୟ ବିତାଇ ଵିରୋଧିଙ୍କ ଅପ ପ୍ରଚାର ଯେ ନିରାଧାର ତାକୁ ପ୍ରମାଣିତ କରିଛନ୍ତି ।
ତାଙ୍କ ବଦଳା ଆଭିମୁଖ୍ୟ, ତାଙ୍କୁ ବଦଳାଇ ଅନ୍ୟକୁ ନେତୃତ୍ୱ ଦେଇଥିବା ସୁକିନ୍ଦାବାସୀଙ୍କ ଚିନ୍ତା ଓ ଚେତନାକୁ ବେଶ ପ୍ରଭାବିତ କରିଛି । ବିଭିନ୍ନ କାର୍ଯ୍ୟରେ ତାଙ୍କୁ ଯୋଗଦେବାକୁ ଅନୁରୋଧ କରୁଥିବା ଲୋକମାନଙ୍କୁ ନିରାଶ ନକରି ସବୁ ଠାରେ ପହଞ୍ଚି କାର୍ଯ୍ୟକ୍ରମରେ ସାମିଲ ହେଉଛନ୍ତି । ଲୋକଙ୍କ ସୁଖ ଦୁଃଖ ଶୁଣୁଛନ୍ତି ଡେରି ରାତି ପର୍ଯ୍ୟନ୍ତ । ପୁଣି ସକାଳୁ ଲୋକଙ୍କ ସହିତ ସାମିଲ ହେଉଛନ୍ତି । ସରକାର ନଥିଲା ବେଳେ ନିଜେ ବିଧାୟକ ଓ ମନ୍ତ୍ରୀ ନଥିଲା ବେଳେ ତାଙ୍କ ଲୋକପ୍ରିୟତା ବଢିବା ତାଙ୍କ ବିରୋଧୀଙ୍କୁ ଚିନ୍ତାରେ ପକାଇ ଦେଇଛି । ତାଙ୍କ ଲୋକପ୍ରିୟତାକୁ ପ୍ରତିହତ କରିବାକୁ ଵିରୋଧି ସାମାଜିକ ଗଣ ମାଧ୍ୟମରେ ବିଭିନ୍ନ କୁତ୍ସାରଟନା କରି ଚାଲିଥିଲା ବେଳେ ତାର ପ୍ରଭାବ କିନ୍ତୁ ସୁକିନ୍ଦାବାସୀଙ୍କ ଉପରେ ପଡୁନାହିଁ । ନିଜେ କାହା ବିରୁଦ୍ଧରେ ପଦୁଟିଏ ନ କହି ନିଜ ଦାୟିତ୍ୱ ଓ କର୍ତ୍ତବ୍ୟକୁ ଗୁରୁତ୍ୱ ଦେଉଛନ୍ତି । ଵିରୋଧି ଯେତେ କୁତ୍ସାରଟନା କରୁଛନ୍ତି ତାକୁ ସେତେ ନାପସନ୍ଦ କରୁଛନ୍ତି ସାଧାରଣ ଲୋକେ । ହେଲେ ଏହାକୁ ଆଦୌ ଗୁରୁତ୍ୱ ନ ଦେଇ ଡ୍ୟାନି କିନ୍ତୁ ଆଗକୁ ଆଗକୁ ମାଡି ଚାଲିଛନ୍ତି ଓ ସାଉଁଟି ଚାଲିଛନ୍ତି ସୁକିନ୍ଦାବାସୀଙ୍କ ସ୍ନେହ, ଶ୍ରଦ୍ଧା ଓ ସମର୍ଥନ ।
