ଓଡ଼ିଶା ଲିଡ୍ସ(ବ୍ୟୁରୋ): ବିଜେପି ସରକାରକୁ ଦୁଇବର୍ଷ ପୁର୍ତ୍ତି ହେବାକୁ ଯାଉଥିଲା ବେଳେ ବିଜେଡି ପ୍ରଥମ ଥର ପାଇଁ ସମ୍ମୁଖ ଭାଗକୁ ଓହ୍ଲାଇ ସରକାର ବିରୁଦ୍ଧରେ ରଣ ହୁଙ୍କାର ଦେଇଛି । ଆଉ ଏହି ସରକାର ଵିରୋଧି ଲଢେଇର ନେତୃତ୍ୱ ନେଇଛନ୍ତି ଦଳର ସର୍ବମାନ୍ୟ ନେତା ତଥା ଵିରୋଧି ଦଳ ନେତା ନବୀନ ପଟ୍ଟନାୟକ । ବିଜେଡି ରାଜ୍ୟର ଚାଷୀ ମାନଙ୍କ ମଧ୍ୟରେ ଦେଖା ଦେଇଥିବା ତୀବ୍ର ଅସନ୍ତୋଷ କାରଣରୁ ସରକାର ବିରୁଦ୍ଧରେ ଆନ୍ଦୋଳନ ଡାକରା ଦେଇଥିଲା । ଲୋୟର ପିଏମଜି ଠାରେ ଦଳର ସମସ୍ତ ବିଧାୟକ, ବିଧାୟିକା, ନେତା, ନେତ୍ରୀଙ୍କ ସହିତ ହଜାର ହଜାର ଚାଷୀ ଓ ବିଜେଡି କର୍ମୀ ଯୋଗଦାନ କରିଥିଲେ । ଦଳର ନେତା ମାନେ ସରକାରଙ୍କ ଚାଷୀ ମାରଣ ନୀତିକୁ ତୀବ୍ର ଆକ୍ଷେପ କରିଥିଲେ । ଏହା ସହିତ ବିଗିଡି ଯାଇଥିବା ରାଜ୍ୟର ଆଇନ ଶୃଂଖଳାକୁ ନେଇ ମଧ୍ୟ ସରକାରଙ୍କୁ ଘେରିଥିଲେ ।
କାର୍ଯ୍ୟକ୍ରମରେ ଦଳ ସଭାପତି ନବୀନ ପଟ୍ଟନାୟକ ଯୋଗଦେବା ଦଳର ନେତା ଓ କର୍ମୀଙ୍କୁ ବେଶ ଉତ୍ସାହିତ କରିଥିଲା । ଦୀର୍ଘ ଦିନ ପରେ ନବୀନ ଦଳୀୟ କାର୍ଯ୍ୟକ୍ରମରେ ଯୋଗଦେଇ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ । ବିଜେଡି ସରକାର ସମୟରେ ସରକାର କୃଷକ ମାନଙ୍କ ପାଇଁ କାଳିଆ ଯୋଜନା ସହିତ ଅନ୍ୟ ବିଭିନ୍ନ ଯୋଜନା କରିଥିବା ପ୍ରକାଶ କରିବା ସହିତ ସରକାରଙ୍କୁ ଆଇନ ଶୃଙ୍ଖଳା ନେଇ ମଧ୍ୟ ଆକ୍ଷେପ କରିଥିଲେ । ନବୀନ କହିଥିଲେ ସରକାର ନିର୍ବାଚନ ସମୟରେ ଯେଉଁ ପ୍ରତିଶୃତି ଦେଇଥିଲେ ତାକୁ ପାଳନ କରନ୍ତୁ ।
