ଓଡ଼ିଶା ଲିଡ୍ସ(ଯାଜପୁର): ବିଜେଡିର ଅନ୍ୟତମ ଗଡ଼ ଭାବେ ପରିଚିତ ବରୀ ନିର୍ଵାଚନ ମଣ୍ଡଳୀରେ ଆଜି ବଡ଼ ହଲଚଲ ଦେଖିବାକୁ ମିଳିଛି । ଗତ ସାଧାରଣ ନିର୍ବାଚନରେ ରାଜ୍ୟରେ ସର୍ବାଧିକ ଭୋଟ ବ୍ୟବଧାନରେ ଜିତିଥିବା ବରୀ ବିଧାୟକ ବିଶ୍ୱରଞ୍ଜନ ମଲ୍ଲିକଙ୍କ ଗଡ଼ ଆଜି ଭାଙ୍ଗିଛି । ବିଶ୍ଵଙ୍କ ଦୃଢ଼ ସମର୍ଥକ ତଥା ବରୀ ବ୍ଲକ ଅଧ୍ୟକ୍ଷ ଅଶୋକ କୁମାର ଗେଡି ତାଙ୍କ ସମର୍ଥକ ୫ ସମିତି ସଭ୍ୟ ଓ ୩ ସରପଞ୍ଚଙ୍କୁ ନେଇ ବିଜେପିରେ ସାମିଲ ହୋଇଛନ୍ତି । ଦଳରେ ସାମିଲ ହୋଇଥିବା ନେତା ଓ କର୍ମୀଙ୍କୁ ବିଜେପି ନେତା ଉମେଶ ଜେନା ଦଳୀୟ ଉତ୍ତରୀୟ ଦେଇ ସ୍ୱାଗତ କରିଥିଲେ । ବ୍ଲକ ଅଧ୍ୟକ୍ଷ ବିଧାୟକ ବିଶ୍ୱରଞ୍ଜନ ମଲ୍ଲିକଙ୍କ ନିଜ ପଞ୍ଚାୟତର ସମିତି ସଭ୍ୟ । ଅଶୋକ ଥରେ ବିଜେଡି ଛାଡି ବିଜେପିରେ ସାମିଲ ହୋଇ ବିଶ୍ଵଙ୍କ ନାଲିଆଖିକୁ ଡରି ବିଜେଡିକୁ ଫେରିଥିବା ଅଶୋକ ଆଜି ଦ୍ଵିତୀୟ ଥର ବିଜେପିରେ ସାମିଲ ହୋଇଛନ୍ତି । ବିଧାୟକ ବିଶ୍ୱରଞ୍ଜନ ମଲ୍ଲିକ ନୂଆପଡା ଉପ ନିର୍ବାଚନରେ ଦଳ ପାଇଁ ପ୍ରଚାର କରୁଥିଲା ବେଳେ ତାଙ୍କ ଗଡ଼ ଦୋହଲାଇ ଦେଇଛି ବିଜେପି । ଆଜିର ମିଶ୍ରଣ ପର୍ବ ବରୀ ବିଜେଡିରେ ନୀରବତା ଖେଳାଇ ଦେଇଛି । ଅତି ସତର୍କତା ସହିତ ବିଜେପି ମିଶ୍ରଣ ପର୍ବ କରି ବିଜେଡିକୁ ଝଟକା ଦେଇଛି । ଏହି ଝଟକା ବିଜେଡିକୁ ନିରବ ହେବାକୁ ଏକ ପ୍ରକାର ବାଧ୍ୟ କରିଛି । ଆଜି ବରୀ ମାଉଣ୍ଡ ନିକଟରେ ଅପରାହ୍ନରେ ଆୟୋଜିତ ମିଶ୍ରଣ ପର୍ବରେ ଅଧ୍ୟକ୍ଷ ଅଶୋକ ଗେଡ଼ିଙ୍କ ସହିତ ସମିତି ସଭ୍ୟ, ସରପଞ୍ଚଙ୍କ ଓ ଶତାଧିକ ବିଜେଡି ଆଗଧାଡ଼ିର କର୍ମୀ ଓ ପୂର୍ବତନ ସରପଞ୍ଚ ବିଜେଡି ଛାଡି ପଦ୍ମ ଧରିଛନ୍ତି । ବରୀ ପଞ୍ଚାୟତ ସରପଞ୍ଚ ସୋନାଲି ସିଂହ, ବୋଦୁଅ ସରପଞ୍ଚ ଦେବୀ ପ୍ରସାଦ ମିଶ୍ର, ବାଇଁଶିରିଆ ସରପଞ୍ଚ ସୁଶାନ୍ତ ଦାସ, ରତ୍ନଗିରି ସମିତି ସଭ୍ୟl ସସ୍ମିତା ମଲ୍ଲିକ, ସାହୁପଡ଼ା ପଞ୍ଚାୟତ ସମିତି ସଭ୍ୟା ଶାନ୍ତିଲତା ଦଳାଇ, ଅରଙ୍ଗାବଦ ପଞ୍ଚାୟତ ସମିତି ସଭ୍ୟା ଅନୁଷୟା ମଲ୍ଲିକ, ଗୋଳକୁଣ୍ଡ ସମିତି ସଭ୍ୟା ପ୍ରିୟଙ୍କା ମଲ୍ଲିକ, ଇଶାଣପୁର ସମିତି ସଭ୍ୟ ଚିନ୍ତାମଣି ଜେନା, ପ୍ରାକ୍ତନ ସରପଞ୍ଚ ସଚ୍ଚିଦାନନ୍ଦ ମହାକୁଳ, ଦଳିତ ନେତା କୁଳମଣି ମଲ୍ଲିକ, ପ୍ରଭାତ ବାରିକ, ଯୁବ ନେତା ଲକ୍ଷ୍ମଣ ମଲ୍ଲିକ, କିଶୋର ଚନ୍ଦ୍ର ଧଳ, ଧନେଶ୍ଵର ଧଳ ପ୍ରମୁଖ ବିଜେପିରେ ସାମିଲ ହୋଇଥିଲେ । ଏହି କାର୍ଯ୍ୟକ୍ରମରେ ବରୀ ନିର୍ବାଚନ ମଣ୍ଡଳୀର ବହୁ ବରିଷ୍ଠ ନେତା ଯୋଗଦାନ କରିଥିଲେ । ଦଳରେ ସାମିଲ ହେଲା ପରେ ଅଧ୍ୟକ୍ଷ ଅଶୋକ ଗେଡି ନିଜ ପ୍ରତିକ୍ରିୟାରେ କହିଛନ୍ତି ବରୀର ବିକାଶ ଯେଉଁ ଦଳ କରିବ ମୁଁ ସେଇ ଦଳରେ ସାମିଲ ହେବି ।
କେତେଦିନ ବିଜେପିରେ ରହିବେ ଅଧ୍ୟକ୍ଷ ଅଶୋକ ଗେଡି
କିଛି ମାସ ମଧ୍ୟରେ ଦ୍ଵିତୀୟ ଥର ବିଜେଡି ଛାଡି ବିଜେପିରେ ସାମିଲ ହୋଇଛନ୍ତି ବରୀ ବ୍ଲକ ଅଧ୍ୟକ୍ଷ ଅଶୋକ କୁମାର ଗେଡି । ପ୍ରଥମ ଥର ନିଜ ସମର୍ଥକଙ୍କୁ ଧରି ରାଜ୍ୟ ବିଜେପି କାର୍ଯ୍ୟାଳୟରେ ସାମିଲ ହୋଇଥିଲେ ଅଶୋକ । ହେଲେ ବିଶ୍ଵଙ୍କ ନାଲି ଆଖି ଆଗରେ ମିଶିବାର ମାତ୍ର କିଛି ଦିନ ପରେ ବିଜେପି ଛାଡି ପୁଣି ବିଜେଡିରେ ସାମିଲ ହୋଇଥିଲେ । ଆଜି ବିଜେପିରେ ସାମିଲ ହୋଇଥିଲେ ବି ନିଜକୁ କେତେ ଦିନ ବିଜେପିରେ ସାମିଲ କରିବେ ତାକୁ ନେଇ ସାଧାରଣରେ ସଦେହ ସୃଷ୍ଟି ହେବା ସହିତ ବିଶ୍ୱ ଫେରିଲେ ପୁଣି ଅଶୋକ ବିଜେଡିରେ ସାମିଲ ହେବା ବିଚିତ୍ର ନୁହେଁ ବୋଲି ବରୀ ଅଞ୍ଚଳରେ ଚର୍ଚ୍ଚା ହେଉଛି ।
