ଓଡିଶା ଲିଡ୍ସ(ସୁକିନ୍ଦା): ସୁଳିନ୍ଦା ଥାନା ଅଞ୍ଚଳ ବେଆଇନ କାର୍ଯ୍ୟର ଆଡ୍ଡାସ୍ଥଳୀ ପାଲିଟିଥିଲା ବେଳେ ସୁକିନ୍ଦା ପୋଲିସ ନିରବ ବସିବା ଜନ ସାଧାରଣଙ୍କୁ ଚକିତ କରିଛି । ଥାନା ଅଞ୍ଚଳରେ ଚୋରା ବିଦେଶୀ ଓ ଦେଶୀ ମହୁଲି ମଦ କାରବାର ଠାରୁ ନେଇ ଜୁଆ ଆଡ୍ଡା, ଗଞ୍ଜାପଡ଼ା ଆଦି କାର୍ଯ୍ୟ ବେଧଡ଼କ ଚାଲିଛି । ଏଠି ବଟି ଦେଲେ ସବୁ ସମ୍ଭବ ବୋଲି ବିଭିନ୍ନ ପଞ୍ଚାୟତର ନିର୍ବାଚିତ ପ୍ରତିନିଧ ଅଭିଯୋଗ କରିଛନ୍ତି । ସ୍ବତନ୍ତ୍ର ମଧ୍ୟସ୍ଥି ମାଧ୍ୟମରେ ଏହି ବେଆଇନ କାର୍ଯ୍ୟ ଅତ୍ୟନ୍ତ ବ୍ୟବସ୍ଥିତ ଢଙ୍ଗରେ ଚାଲିଛି । ଏହି ଥାନା ଅଞ୍ଚଳରେ ଏକାଧିକ ସ୍ଥାନରେ ଗଞ୍ଜାପଡ଼ା ଓ ଜୁଆ ଆଡ୍ଡା ପସରା ମେଲାଇଲାଣି। ଯାହାକୁ ନେଇ ଅନେକ ସମୟରେ ଆଇନ୍ ଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି ।
କାଳିଆପାଣି, ଟମକା ଓ କଳିଙ୍ଗନଗର ଥାନା ଅଞ୍ଚଳରେ ବସୁଥିବା ସାପ୍ତାହିକ ହାଟ ସଂଲଗ୍ନ ଅଞ୍ଚଳରେ ଗଞ୍ଜାପଡ଼ା ଓ ଜୁଆ ଆଡ୍ଡା ଏବେ ବନ୍ଦ ଥିଲା ବେଳେ ସୁକିନ୍ଦା ଥାନା ଅଞ୍ଚଳର ବାଣ୍ଟିଲୋ ଶାଳ ଜଙ୍ଗଲ, ସଂସାଇଲୋ ପଞ୍ଚାୟତର ସୋରଷିଆପଦା, ପିମ୍ପୁଡ଼ିଆ ପଞ୍ଚାୟତ ହାଟ ନିକଟ, ଚିଲିକିମାଟିଆ ବନ୍ଧ, ଓଳିଆ ପଞ୍ଚାୟତର ସୁକରଣ ଗାଁ ମୁଣ୍ଡ ଆଦି ସ୍ଥାନରେ ବଡ଼ ଧରଣର ଗଞ୍ଜାପଡ଼ା ଓ ନୂଆ ଆଡ୍ଡା ଚାଲୁଛି ବୋଲି ଲୋକେ ଆଲୋଚନା କରୁଛନ୍ତି । ଗୋବରଘାଟି ବିସ୍ଥାପିତ କଲୋନୀରେ ଚାଲୁଥିବା ବେଆଇନ ଗଞ୍ଜା ପଢା ଓ ଜୁଆ ଆଡ୍ଡାକୁ କଳିଙ୍ଗନଗର ପୁଲିସ ବିଗତ ବର୍ଷ ମାନଙ୍କରେ ବାରମ୍ବାର ଚଢ଼ଉ କରିବା ଫଳରେ ସଂପୃକ୍ତ ମାଫିଆ ମାତ୍ର କେତେ ମିଟର ଡେଇଁ ସୁକିନ୍ଦା ଥାନା ଅଞ୍ଚଳକୁ ପଶି ଆସି ବେଫିକର ଭାବେ ଏହି ବେଆଇନ୍ କାର୍ଯ୍ୟ ଜାରି ରଖିଛନ୍ତି। ଏଥିରେ ସମ୍ପୃକ୍ତ ହୋଇ ବହୁ ନିରୀହ ଲୋକ ସର୍ବସ୍ବ ହରାଉଥିଲା ବେଳେ ପୋଲିସ ଏହା ଉପରେ କେବେ ପଦକ୍ଷେପ ନେବ ତାକୁ ଅପେକ୍ଷା ।
