ବୟସର ପ୍ରଭାବ ନାହିଁ, ବଢୁଛି ଧୋନି କ୍ରେଜ

ଓଡ଼ିଶା ଲିଡ୍ସ(ବ୍ୟୁରୋ): ଗୋଟିଏ ଷ୍ଟମ୍ପିଙ୍ଗ କରିବାର ସମୟ ମାତ୍ର ୦.୧୨ ସେକେଣ୍ଡ । ଏହା କେବଳ ୪୩ ବର୍ଷୀୟ ଧୋନିଙ୍କ ଦ୍ୱାରା ସମ୍ଭବ । ଆଉ ଏହାକୁ ଗତକାଲି କରି ଦେଖାଇଛନ୍ତି ମହେନ୍ଦ୍ର ସିଂ ଧୋନି । ଆଖି ପିଛୁଳାକେ ସୂର୍ଯ୍ୟକୁମାର ଯାଦବଙ୍କୁ ପାଭିଲିୟନ ଫେରାଇ ଦେଇଥିଲେ ଧୋନି । କିଛି ବୁଝିବା ପୂର୍ବରୁ ଆଉଟ ହୋଇ ଯାଇଥିଲେ ସୂର୍ଯ୍ୟ ।
ଧୋନିଙ୍କ ବୟସର ଖେଳାଳି ଅବସର ନେଇ କିଏ ଧାରା ବିବରଣୀ ଦେଉଛି ତ କିଏ ନୂଆ ପିଢୀକୁ ପ୍ରଶିକ୍ଷଣ ଦେଉଛି । କିଛି ଖେଳାଳିଙ୍କୁ ପ୍ରସଂଶକ ଭୁଲି ବି ଗଲେଣି । ହେଲେ କ୍ରିକେଟ ଦୁନିଆର ମହାନ ଖେଳାଳିଙ୍କ ମଧ୍ୟରୁ ଅନ୍ୟତମ ଭାରତର ଅନ୍ୟତମ ସର୍ବାଧିକ ସଫଳ ତମ ଅଧିନାୟକ ମହେନ୍ଦ୍ର ସିଂ ଧୋନୀଙ୍କର କ୍ରେଜ କିନ୍ତୁ ବଢି ବଢି ଚାଲିଛି । ତାଙ୍କୁ ନେଇ ଚର୍ଚ୍ଚା ଥମୁନାହିଁ । ଅବସରକୁ ଢେର ବର୍ଷ ହୋଇ ଗଲାଣି, ହେଲେ ଏବେ ବି ବିଶ୍ୱର ସର୍ବାଧିକ ଲୋକପ୍ରିୟ କ୍ରିକେଟ ଲିଗ ଆଇପିଏଲ ରେ ନିଜର ଖେଳ ଜାରି ରଖିଛନ୍ତି ଧୋନି । ଆଉ ଧୋନିଙ୍କ ଦଳର ମ୍ୟାଚ ବେଳେ ଧୋନିଙ୍କ ନାମରେ ଦର୍ଶକରେ ଭରପୁର ହୋଇ ଯାଉଛି ଷ୍ଟାଡିୟମ ।
ଚେନ୍ନାଇ ସୁପର କିଙ୍ଗ ଦଳର ମେରୁଦଣ୍ଡ ହୋଇ ରହିଥିବା ଧୋନି ଏବେ ବି ନିଜ ଦଳର ଦାୟିତ୍ୱକୁ ନିଜ କାନ୍ଧରେ ବୋହୁଛନ୍ତି । ଦଳର ଅଧିନାୟକ ଋତୁରାଜ ଗାଏକ୍ବାଡ଼ ହୋଇଥିଲେ ମଧ୍ୟ ଧୋନି କିନ୍ତୁ କଠିନ ସମୟରେ ନିଷ୍ପତି ନେଉଛନ୍ତି । ସମ୍ପୂର୍ଣ୍ଣ ଦଳ ଧୋନିଙ୍କ ଚତୁର ରଣନୀତିକୁ ପଡିଆ ମଧ୍ୟରେ ଅପେକ୍ଷା ରଖୁଛି । ପଡିଆ ଭିତରେ ଖୁବ ଶାନ୍ତ ସରଳ ରହୁଥିବା ଏହି ଖେଳାଳି ପଡିଆ ଭିତରର କଠୋର ନିଷ୍ପତ୍ତି ନେବାରେ ମାହିର ।
ଗତକାଲି ଚଳିତ ବର୍ଷର ଆଇପିଏଲରେ ଚେନ୍ନାଇ ତାର ପ୍ରଥମ ମ୍ୟାଚରେ ଭେଟିଥିଲା ମୁମ୍ବାଇ ଇଣ୍ଡିଆନ୍ସକୁ । ଆଉ ପ୍ରଥମ ଲଢେଇରେ ଚେନ୍ନାଇ ବିଜୟୀ ମଧ୍ୟ ହୋଇଥିଲା । ବିଜୟ ପାଇଁ ମାତ୍ର ୪ ରନ ଆବଶ୍ୟକ ଥିଲା ବେଳେ ଏକ ଉଇକେଟ ପଡିଥିଲା । ହେଲେ ଉଇକେଟ ପତନ ପରେ ଚେନ୍ନାଇ ଦର୍ଶକ ନିରାଶ ହେବା ବଦଳରେ ଉତ୍ସାହିତ ହୋଇ ପଡ଼ିଥିଲେ । କାରଣ ବି ଥିଲା ଭିନ୍ନ । କାରଣ ପଡ଼ିଆକୁ ଓହ୍ଲାଇ ଥିଲେ ମହେନ୍ଦ୍ର ସିଂ ଧୋନି । ଦର୍ଶକରେ ଭରପୁର ଷ୍ଟାଡିୟମ ଧୋନି ଧୋନି ଚିତ୍କାରରେ ଫାଟି ପଡୁଥିଲା । ଏହା ଥିଲା ଧୋନିଙ୍କ ଲୋକପ୍ରିୟତାର ଝଲକ ମାତ୍ର । ଧୋନି ଦୁଇଟି ବଲ ଖେଳି କୌଣସି ରନ କରିନଥିଲେ ମଧ୍ୟ ନ୍ୟୁଜିଲ୍ୟାଣ୍ଡ ଖେଳାଳି ରଚିନ ରବୀନ୍ଦ୍ର ଛକା ମାରି ଦଳକୁ ବିଜୟୀ କରିଥିଲେ । ହେଲେ ଏହା ପୂର୍ବରୁ ଧୋନିଙ୍କ ଏକ ଷ୍ଟମ୍ପିଙ୍ଗ ବେଶ ଚର୍ଚ୍ଚା ସୃଷ୍ଟି କରିଥିଲା । ମୁମ୍ବାଇର ସୂର୍ଯ୍ୟକୁମାର ବ୍ୟାଟିଂ କଲା ବେଳେ ତାଙ୍କୁ ଧୋନି ଷ୍ଟମ୍ପିଙ୍ଗ କରିଥିଲେ । ଏହି କାମ କରିବାକୁ ଧୋନି ନେଇଥିଲେ ମାତ୍ର ୦.୧୨ ସେକେଣ୍ଡ । ଯାହା ଆଜି କ୍ରିକେଟ ପ୍ରେମୀଙ୍କ ମଧ୍ୟରେ ଚର୍ଚ୍ଚାର କେନ୍ଦ୍ରବିନ୍ଦୁରେ ରହିଛି । ଆଗକୁ ଧୋନି ଉଭୟ ବ୍ୟାଟିଂ ଓ କିପିଙ୍ଗରେ କମାଲ ଦେଖାଇବେ ବୋଲି ତାଙ୍କ ପ୍ରସଂଶକ ବେଶ ଆଶାବାଦୀ ।