ଓଡ଼ିଶା ଲିଡ୍ସ(ବ୍ୟୁରୋ): ଆଜି ମହାଶିବରାତ୍ରୀରେ ଭାରତ ଓ ପାକିସ୍ତାନ ମଧ୍ୟରେ ଥିଲା T-20 ବିଶ୍ୱକପର ମହାସମର । ସାରା ବିଶ୍ୱର କୋଟି କୋଟି କ୍ରିକେଟ ପ୍ରେମୀ ଏହି ମ୍ୟାଚକୁ ଦେଖିବାକୁ ଚାତକ ପରି ଚାହିଁ ରହିଥିଲେ । ମ୍ୟାଚ ମଧ୍ୟରେ ବର୍ଷା ଆଶଙ୍କା ଥିଲା ବେଳେ ବର୍ଷା କିନ୍ତୁ ବାଧକ ସାଜି ନଥିଲା । ହେଲେ ବିଶ୍ୱକପରେ ପାକିସ୍ତାନର ପରାଜୟ ଧାରା କିନ୍ତୁ ଭାଙ୍ଗି ନଥିଲା । ଇଶାନ କିଷାନଙ୍କ ବିସ୍ପୋରକ ବ୍ୟାଟିଂ ଓ ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ପାକିସ୍ତାନ ଆତ୍ମସମର୍ପଣ କରିଥିଲା ।
ଟସ ଜିତି ଭାରତକୁ ବ୍ୟାଟିଂ କରିବାର ସୁଯୋଗ ଦେଇ ପ୍ରଥମରୁ ଭୁଲ କରିଥିଲା ପାକିସ୍ତାନ । ଭାରତ ନିର୍ଦ୍ଧାରିତ ୨୦ ଓଭରରେ ୧୭୫ ରନ ସଂଗ୍ରହ କରିଥିଲା ୭ ଉଇକେଟ ବିନିମୟରେ । ଯାହା କଲମ୍ବୋର ପ୍ରେମଦାସା ଷ୍ଟାଡିୟମରେ ଏକ ବଡ଼ ସ୍କୋର ଥିଲା । ରନର ଏହି ପାହାଡ଼ ପାକିସ୍ତାନ ଉପରେ ଚାପ ବଢ଼ାଇ ଦେଇଥିଲା । ପ୍ରଥମ ଓଭରରେ ହାର୍ଦ୍ଧିକ ପାଣ୍ଡ୍ୟା ମେଡେନ ଓଭର ବୋଲିଂ କରିବା ସହିତ ପାକିସ୍ତାନର ପ୍ରଥମ ଉଇକେଟ ଝଡାଇ ଦେଇଥିଲେ । ବ୍ୟାଟିଂରେ ଆଜି ହାର୍ଦ୍ଧିକ ବିଫଳ ହୋଇଥିଲେ ମଧ୍ୟ ବୋଲିଂରେ ପ୍ରଶଂସକଙ୍କୁ ନିରାଶ କରିନଥିଲେ । ଦ୍ଵିତୀୟ ଓଭରରେ ବୁମରା ଦୁଇଟି ଉଇକେଟ ନେଇ ପାକିସ୍ତାର ମେରୁଦଣ୍ଡ ଭାଙ୍ଗି ଦେଇଥିଲେ । ଏହା ପରେ ପାକିସ୍ତାନର ଉଇକେଟ ପଡିବା ଧାରା ଜାରି ରହିଥିଲା । ଶେଷରେ ୧୮ ଓଭରରେ ପାକିସ୍ତାନ ମାତ୍ର ୧୧୪ ରନ କରି ୬୧ ରନରେ ପରାଜିତ ହୋଇଥିଲା । ଏହି ବିଜୟ ସହିତ ଭାରତ ସୁପର ଏଇଟକୁ ପ୍ରବେଶ କରିଛି ।
