ଏବେ ବି ଶ୍ରଦ୍ଧା ଓ ସମ୍ମାନ ସାଉଁଟୁଛନ୍ତି ବରିଷ୍ଠ ନେତା ଅମର ଶତପଥୀ

ଓଡ଼ିଶା ଲିଡ୍ସ(ଯାଜପୁର): କେବଳ ଯାଜପୁର ଜିଲ୍ଲାର ନୁହେଁ ରାଜ୍ୟର ଅନ୍ୟତମ ବରିଷ୍ଠ ତଥା ଅନୁଭବୀ ରାଜନେତା ହେଲେ ପୂର୍ବତନ ମନ୍ତ୍ରୀ ତଥା ବିଜେଡି ସରକାର ସମୟର ପୂର୍ବତନ ମୁଖ୍ୟ ସଚେତକ ଅମର ପ୍ରସାଦ ଶତପଥୀ । ଗତ ନିର୍ବାଚନରେ ଦଳ ତାଙ୍କୁ ଟିକେଟ ଦେଇ ନଥିଲା । ତାଙ୍କ ସ୍ଥାନରୁ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ବିଜେଡି ଟିକେଟ ଦେଇଥିଲା । ଅମର ନିଶ୍ଚିତ ବିଜୟ ହାସଲ କରିବେ ବୋଲି ସମସ୍ତେ ଜାଣିଥିଲା ବେଳେ ଦଳ କିନ୍ତୁ ତାଙ୍କୁ ଟିକେଟ ନ ଦେଇ ଅପଦସ୍ତ କରିଥିଲା । ଯାହା ଏହି ବରିଷ୍ଠ ନେତାଙ୍କୁ ବେଶ ଆଘାତ ଦେଇଥିଲା । ଦଳ ନିଷ୍ପତ୍ତିରେ ହାତବାକ ହୋଇ ଅମର ନିରବ ହୋଇ ଯାଇଥିଲେ । ହେଲେ ଅମରଙ୍କୁ ଖୁବ ଶ୍ରଦ୍ଧା ଓ ସମ୍ମାନ କରୁଥିବା ବଡ଼ଚଣା ଭୋଟର କିନ୍ତୁ ଦଳର ନିଷ୍ପତିକୁ ଗ୍ରହଣ ନ କରି ବର୍ଷାଙ୍କୁ ପରାଜୟର ରାସ୍ତା ଦେଖାଇ ଦେଇଥିଲେ । ବଡ଼ଚଣାରେ ଏକଦା ଅମରଙ୍କ ରାଜନୀତି ପାଠ ଶାଳାର ଛାତ୍ର ଥିବା ଅମର କୁମାର ନାୟକ ବିଜେପିରୁ ବିଜୟୀ ହୋଇଥିଲେ । ଏବେ ବିଧାୟକ ଅମରଙ୍କୁ ନେଇ ବଡ଼ଚଣା ରାଜନୀତି କେନ୍ଦ୍ରୀଭୂତ ହୋଇଥିଲା ବେଳେ ନିର୍ବାଚନ ନ ଲଢ଼ିବି ବରିଷ୍ଠ ନେତା ଅମର କିନ୍ତୁ ବଡ଼ଚଣାବାସୀଙ୍କ ଶ୍ରଦ୍ଧା ଓ ସମ୍ମାନ ସାଉଁଟୁଛନ୍ତି । ଅନ୍ୟ ପକ୍ଷରେ ଦଳ କିମ୍ବା କୌଣସି ପଦ ପଦବୀରେ ନଥିଲେ ବି ନା ଅମର ବଡ଼ଚଣା ଛାଡୁଛନ୍ତି ନା ବଡ଼ଚଣାବାସୀ ଅମରଙ୍କୁ ଛାଡୁଛନ୍ତି । ଭୁବନେଶ୍ୱରରେ ରହୁଥିଲେ ମଧ୍ୟ ପ୍ରାୟ ସମୟରେ ଅମର ବଡ଼ଚଣାରେ ଘୁରି ବୁଲୁଥିବା ଦେଖିବାକୁ ମିଳୁଛି । ସମସ୍ତ ସାମାଜିକ କାର୍ଯ୍ୟକ୍ରମରେ ତାଙ୍କ ଖୋଜା ପଡୁଥିଲା ବେଳେ ନିଜ ଲୋକଙ୍କ ଆଦର ପଣକୁ ବି ଆଡେଇ ଦେଇ ପାରୁ ନାହାନ୍ତି ଅମର । କିଏ ସମସ୍ୟାରେ ପଡିଲେ, ରୋଗରେ ପଡିଲେ କିମ୍ବା ମୃତ୍ୟୁ ବରଣ କଲେ ଅମର ସେମାନଙ୍କ ନିକଟରେ ପହଞ୍ଚି ସହାୟତା ଦେବା ସହିତ ସାନ୍ତ୍ୱନା ଦେବାକୁ ଆଦୌ ଅବହେଳା କରୁ ନାହାନ୍ତି । କାରଣ ଆଜକୁ ବର୍ଷ ବର୍ଷ ହେଲା ବଡ଼ଚଣାବାସୀଙ୍କ ଭାବାବେଗ ସହିତ ଯୋଡି ହୋଇ ରହିଛନ୍ତି । ଅନ୍ୟ ପକ୍ଷରେ ବିଜେଡି ଠାରୁ ଦୂରେଇ ଯାଇଥିବା ଅମରଙ୍କ ବିନା ବଡ଼ଚଣା ବିଜେପି ଏକ ପ୍ରକାର ଦିଗ ହରା ହୋଇ ଯାଇଛି । ଦିନେ ଏକକ ନେତୃତ୍ୱରେ ସଫଳ ପ୍ରଦର୍ଶନ କରୁଥିବା ବିଜେଡି ଆଗକୁ ଅମରଙ୍କ ବିନା ନିଜ ସ୍ଥିତି ରକ୍ଷା କରିବାକୁ ସଂଘର୍ଷ କରିବ ଏଥିରେ ସନ୍ଦେହ ନାହିଁ ।