ଓଡ଼ିଶା ଲିଡ୍ସ(ସୁକିନ୍ଦା):ସୁକିନ୍ଦା ବ୍ଲକ ଅନ୍ତର୍ଗତ ଖରଡ଼ି ଗ୍ରାମ ପଞ୍ଚୟତରେ ଆଜି ଅନୁଷ୍ଠିତ ସ୍ଵତନ୍ତ୍ର ଗ୍ରାମସଭା ବୈଠକରେ ଶାସକ ଦଳର ଦୁଇ ଗୋଷ୍ଠୀ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି । ଉଭୟ ପକ୍ଷ ମୁହାଁମୁହିଁ ହେବାରୁ ଗ୍ରାମ ସଭାରେ ବ୍ୟାଘାତ ସୃଷ୍ଟି ହୋଇଥିଲା । ଘଟଣାରୁ ପ୍ରକାଶ ଯେ ସରକାରଙ୍କ ନିର୍ଦ୍ଦେଶ କ୍ରମେ ଆଜି ଖରଡ଼ି ଗ୍ରାମ ପଞ୍ଚାୟତରେ ଏକ ସ୍ବତନ୍ତ୍ର ଗ୍ରାମ ସଭାର ଆୟୋଜନ କରାଯାଇଥିଲା। ଗ୍ରାମସଭା ଆରମ୍ଭ ପୂର୍ବରୁ ସଭା ଗୃହକୁ ଶରତ ସାହୁ ନାମକ ଜନୈକ ଶାସକ ଦଳର ଯୁବ ସମର୍ଥକ ତାଲା ପକାଇ ଦେଇଥିଲେ। ପରେ ତାଲା ଖୋଲିବା ପରେ ଗ୍ରାମ ସଭା ବୈଠକ ଆରମ୍ଭ ହେଉ ଥିବା ବେଳେ ସରପଞ୍ଚଙ୍କ ସ୍ବାମୀ ସୁରେଶ ସାହୁ ସଂପୃକ୍ତ ଯୁବକକୁ କାହିଁକି ସଭା ଗୃହକୁ ତାଲା ପକାଇଥିଲୁ ବୋଲି ପଚାରିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଉପସ୍ଥିତ ଗ୍ରାମବାସୀ ମାନେ ଏଥିରେ ହସ୍ତକ୍ଷେପ କରିବା ପରିବର୍ତ୍ତେ ଏହି ବିବାଦର ମଜା ନେବା ସହିତ ଘଟଣାର ଭିଡିଓ ଉତ୍ତୋଳନ ରେ ବ୍ୟସ୍ତ ଥିଲେ।
ଗ୍ରାମବାସୀଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଉଭୟ ଯୁବକ ପରସ୍ପରର ରାଜନୈତିକ ବିରୋଧୀ । ପୂର୍ବରୁ ବିଜୁ ଜନତା ଦଳରେ ଥାଇ କ୍ଷମତା ଉପଭୋଗ କରୁଥିବା ସୁରେଶଙ୍କ ବିଜେପିରେ ଯୋଗଦାନକୁ ଶରତ ଗ୍ରହଣ କରି ପାରୁ ନାହାଁନ୍ତି ଓ ତାଙ୍କୁ ସମସ୍ତ କ୍ଷେତ୍ରରେ ବିରୋଧ କରି ଆସୁଛନ୍ତି।
