ଓଡ଼ିଶା ଲିଡ୍ସ(ବ୍ୟୁରୋ): ବିଜେପି ଶାସିତ ମଧ୍ୟପ୍ରଦେଶର ଦତିଆ ଉପ ନିର୍ବାଚନରେ କଂଗ୍ରେସର ବିଜୟ ଦଳକୁ ଉତ୍ସାହିତ କରିଛି । ଅନ୍ୟ ପକ୍ଷରେ ଏହା ଶାସକ ଦଳକୁ ଚିନ୍ତାରେ ପକାଇ ଦେଇଛି । ଉପ ନିର୍ବାଚନରେ କଂଗ୍ରେସର ଘନଶ୍ୟାମ ସିଂହ ବିଜେପିର ଆଶୁତୋଷ ତିୱାରୀଙ୍କୁ ୬,୦୧୬ ଖଣ୍ଡ ଭୋଟରେ ପରାଜିତ କରିଛନ୍ତି । କଂଗ୍ରେସ ପ୍ରାର୍ଥୀ ଘନଶ୍ୟାମଙ୍କ ଏହି ବିଜୟ କଂଗ୍ରେସକୁ ମଧ୍ୟ ରାଜ୍ୟରେ ବଳ ଯୋଗାଇଛି। କଂଗ୍ରେସର ଘନଶ୍ୟାମ ସିଂହ ୬୬,୭୫୭ ଖଣ୍ଡ ଭୋଟ ପାଇଥିବା ବେଳେ ବିଜେପିର ଆଶୁତୋଷ ତିୱାରୀ ୫୭,୨୭୭ ଖଣ୍ଡ ଭୋଟ ପାଇଛନ୍ତି। ଉପ ନିର୍ବାଚନ ବିଜୟ ପରେ କଂଗ୍ରେସ କର୍ମୀମାନେ ଭୋପାଳ ପାର୍ଟି ମୁଖ୍ୟାଳୟରେ ଉତ୍ସବ ପାଳନ କରିଛନ୍ତି।
ବିଜେପି ଠାରୁ କ୍ରମାଗତ ହାରୁଥିବା କଂଗ୍ରେସକୁ ଏହି ବିଜୟ କିଛି ପରିମାଣରେ ଆଶ୍ୱସ୍ତି ଦେଇଛି। ମୁଖ୍ୟାଳୟରେ ଦୀର୍ଘଦିନ ପରେ କଂଗ୍ରେସ କର୍ମୀମାନେ ନୃତ୍ୟ କରିବା ସହ ଢୋଲ ବଜାଇ ବାଣ ଫୁଟାଇଛନ୍ତି। ଏହି ବିଜୟ ପାଇଁ ମଧ୍ୟପ୍ରଦେଶ କଂଗ୍ରେସ ମୁଖ୍ୟ ଜିତେନ୍ଦ୍ର ପଟୱାରି ଦତିଆର ଭୋଟରଙ୍କୁ ବିଜୟର ଶ୍ରେୟ ଦେଇଛନ୍ତି। କଂଗ୍ରେସ ମୁଖ୍ୟ କହିଛନ୍ତି ଲୋକମାନେ ବିଜେପିର ଅହଂକାର ଓ ଦୁର୍ନୀତିର ପର୍ଦ୍ଦାଫାସ କରିଛନ୍ତି। ନିର୍ବାଚନ ଜିତିଥିବା ଘନଶ୍ୟାମ ମଧ୍ୟ ବିଜୟରୁ ସବୁ ଶ୍ରେୟ ଲୋକମାନଙ୍କୁ ଦେଇ ସେମାନଙ୍କୁ କୃତଜ୍ଞତା ଜ୍ଞାପନ କରିଛନ୍ତି ।ଅନ୍ୟପକ୍ଷରେ ପରାଜୟ ପରେ ବିଜେପି କ୍ୟାମ୍ପରେ ନିରାଶା ଦେଖିବାକୁ ମିଳିଛି। ଉପ ନିର୍ବାଚନ ଜିତିବାକୁ ଦଳ ସବୁ ପ୍ରକାରର ଉଦ୍ୟମ କରିଥିଲା ବେଳେ ଏହା ସଫଳ ହୋଇନାହିଁ ।
୨୦୨୩ ମଧ୍ୟପ୍ରଦେଶର ଦତିଆରେ ନିର୍ବାଚନ ହାରିଥିବା ଡକ୍ଟର ନରୋତ୍ତମ ମିଶ୍ରା ଏଠାରୁ ପୁଣି ନିର୍ବାଚନ ଲଢ଼ିବାକୁ ଇଚ୍ଛୁକ ଥିଲେ । ନିର୍ବାଚନ ପୂର୍ବରୁ ସାଧାରଣ ସଭା କରି ପୁରୁଣା ଭୁଲକୁ ସୁଧାରିବାକୁ ଚେଷ୍ଟା କରିଥିଲେ। ଦତିଆରୁ କ୍ରମାଗତ ୩ଥର ଜିତିଥିବା ଶ୍ରୀ ମିଶ୍ରା ଉପ ନିର୍ବାଚନର ତାରିଖ ଘୋଷଣା ହେବା ମାତ୍ରେ ନାମାଙ୍କନ ପତ୍ର ମଧ୍ୟ କିଣିଥିଲେ। କିନ୍ତୁ ବିଜେପି ପୂର୍ବତନ ଡିଭିଜନାଲ ସାଂଗଠନିକ ସମ୍ପାଦକ ଆଶୁତୋଷ ତିୱାରୀଙ୍କୁ ଉପ ନିର୍ବାଚନ ପାଇଁ ଟିକେଟ ଦେଇଥିଲା। ଏହା ବରିଷ୍ଠ ନେତା ଶ୍ରୀ ମିଶ୍ରାଙ୍କ ପାଇଁ ଝଟକା ସଦୃଶ ହୋଇଥିଲା। ଶ୍ରୀ ମିଶ୍ରାଙ୍କ ସମର୍ଥକମାନେ ଏହାକୁ ତୀବ୍ର ବିରୋଧ କରି ରାସ୍ତାକୁ ଓହ୍ଲାଇଥିଲେ, ମହିଳାମାନେ ରାସ୍ତାରେ ଶୋଇ ରହି ଏହାର ପ୍ରତିବାଦ କରିଥିଲେ, ଦଳୀୟ କର୍ମକର୍ତ୍ତାମାନେ ଇସ୍ତଫା ଘୋଷଣା କରିଥିଲେ । ହେଲେ ଦଳୀୟ ନେତୃବୃନ୍ଦ ନିଷ୍ପତ୍ତି ପରିବର୍ତ୍ତନ ନକରି ଏଥିରେ ତାଳି ପକାଇବାକୁ ଉଦ୍ୟମ କରିଥିଲେ। ହେଲେ ଏହା ଶ୍ରୀ ମିଶ୍ରାଙ୍କୁ ଏହା ସନ୍ତୁଷ୍ଟ କରି ନଥିଲା। ଦଳୀୟ ଗୋଷ୍ଠି କନ୍ଦଳ ଶେଷରେ କଂଗ୍ରେସ ବିଜୟର ବାଟ କଢ଼ାଇଥିଲା ।
