କାଳିଆ ପାଣି ପୋଲିସର ବର୍ବରତା,ବିଜେଡି ଯୁବ କର୍ମୀଙ୍କୁ ଘରୁ ଟେକି ନେଇ ମାଡ଼, ମେଡିକାଲରେ ପହଞ୍ଚିଲେ ଇଂ ପ୍ରୀତିରଞ୍ଜନ ଘଡାଇ

ଓଡ଼ିଶା ଲିଡ୍ସ(ବ୍ୟୁରୋ): କାଳିଆପାଣି ଥାନା ଅଧିକାରୀଙ୍କ ବର୍ବରତାର ଆଉ ଏକ ଝଲକ ଆଜି ସୁକିନ୍ଦାରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ଥାନା ଅଧିକାରୀ ଶିବ ଚରଣ ବେହେରା ବିଜୁ ଜନତା ଦଳର ଜଣେ ଯୁବ କର୍ମୀ ସିଦ୍ଧାର୍ଥ ବେହେରାଙ୍କୁ ଘରୁ ଟେକି ନେଇ ଥାନା ଗେଟରେ ତାଲା ପକାଇ ନିର୍ଧୁମ ମାଡ଼ ମାରିଥିବା ଦେଖିବାକୁ ମିଳିଛି । ଯୁବକଙ୍କ ଶରୀରର ବିଭିନ୍ନ ସ୍ଥାନରେ ଆକ୍ରମଣର ଚିହ୍ନ ଥିବା ଦେଖିବାକୁ ମିଳିଛି । ଏହି ଖବର ପ୍ରକାଶ ପରେ ସୁକିନ୍ଦା ଅଞ୍ଚଳରେ ତୀବ୍ର ପ୍ରତିକ୍ରିୟା ଦେଖା ଯାଇଛି । ସିଦ୍ଧାର୍ଥଙ୍କ ନାମରେ ମିଛ ଏତଲା କରିଥିବା ଅଭିଯୋଗ ମଧ୍ୟ ହୋଇଛି । ପୋଲିସ ମାଡ଼ରେ ଗୁରୁତର ଆହତ ହେଲା ପରେ ସିଦ୍ଧାର୍ଥଙ୍କୁ ପୋଲିସ ଚିକିତ୍ସା ପାଇଁ ସୁକିନ୍ଦା ଗୋଷ୍ଠୀ ସୁସ୍ଥ୍ୟ କେନ୍ଦ୍ର ଆଣିଲା ବେଳେ ଏହି ଖବର ପାଇ ପୂର୍ବତନ ବିଧାୟକ ତଥା ମନ୍ତ୍ରୀ ଇଂ ପ୍ରୀତିରଞ୍ଜନ ଘଡାଇ ସେଠାରେ ପହଞ୍ଚିଥିଲେ । ସିଦ୍ଧାର୍ଥଙ୍କ ସହିତ କଥା ହେଲା ବେଳେ ସିଦ୍ଧାର୍ଥ କାନ୍ଦି କାନ୍ଦି ପୋଲିସ କିଭଳି ତାଙ୍କୁ ନିର୍ମମ ଭାବେ ମାଡ଼ ମାରିଛି ତାକୁ ପ୍ରକାଶ କରି କ୍ଷତ ଚିହ୍ନ ଦେଖାଇଥିଲେ। ଏହା ଦେଖି ଇଂ ଘଡାଇ ମାଡ଼ ମାରିବାକୁ ପୋଲିସକୁ କିଏ ଅଧିକାର ଦେଲା ବୋଲି ଉପସ୍ଥିତ ପୋଲିସଙ୍କୁ ପ୍ରଶ୍ନ କରିଥିଲେ । ପୋଲିସ କୌଣସି ଉତ୍ତର ନ ଦେଇ ନୀରବରେ ଛିଡା ହୋଇଥିବା ଦେଖିବାକୁ ମିଳିଥିଲା । ଏହି ଖବର ପାଇ ଶହ ଶହ ବିଜେଡି ନେତା ଓ କର୍ମୀ ମେଡିକାଲରେ ପହଞ୍ଚିଥିଲେ । ମେଡ଼ିକାଲ ପରିସରରେ ତୀବ୍ର ଉତ୍ତେଜନା ଦେଖା ଦେଇଥିଲା । ଖବର ଅନୁଯାଇ ଆଜି ସିଦ୍ଧାର୍ଥ ଘରେ ଖାଇବାକୁ ବସିଥିବା ବେଳେ ହଠାତ ପୋଲିସ ସିଦ୍ଧାର୍ଥ ବେହେରାଙ୍କ ଘରେ ଦିନ ୧୧ଟା ସମୟରେ ପହଞ୍ଚି କବାଟ ବାଡେଇଥିଲା | ସିଦ୍ଧାର୍ଥଙ୍କ ମା କବାଟ ଖୋଲିବାରୁ କାଳିଆପାଣି ଥାନା ଅଧିକାରୀ ସିଦ୍ଧାର୍ଥଙ୍କ ମାଙ୍କୁ ଧକା ମାରି ଘର ଭିତରେ ପସି ଖାଇ ବସିଥିବା ସିଦ୍ଧାର୍ଥକୁ ମାଡ଼ି ବସିଥିଲେ | ପରିବାର ଲୋକ ଏ ନେଇ ପୋଲିସକୁ ପ୍ରଶ୍ନ କରିବା ସହ କେଉଁ କାରଣ ପାଇ ତାଙ୍କ ପୁଅକୁ ଗିରଫ କରୁଛ ପଚାରିବାରୁ ଥାନା ଅଧିକାରୀ ସମସ୍ତଙ୍କୁ ଧମକ ଦେଇ ଯୋର କରି ସିଦ୍ଧାର୍ଥକୁ କାଳିଆପାଣି ଥାନାକୁ ଆଣି ଥାନା ବାହାର ଗେଟକୁ ତାଲା ପକାଇ ଦେଇଥିଲେ । ଖବର ପାଇ ଜିଲ୍ଲା ପରିଷଦ ସଭ୍ୟା ଜେମା ଚାଖି ଥାନାକୁ ପଚାରିବାକୁ ଯାଇଥିଲା ବେଳେ ତାଙ୍କୁ ମଧ୍ୟ ପୋଲିସ ଭିତରକୁ ଛାଡି ନଥିଲା ବୋଲି ଅଭିଯୋଗ ହୋଇଛି। ଥାନା ଅଧିକାରୀଙ୍କ ବିରୁଦ୍ଧରେ ପୂର୍ବତନ ମନ୍ତ୍ରୀ ଇଂ ଘଡାଇ ଜିଲ୍ଲା ଏସ୍ପିଙ୍କ ସହିତ କଳିଙ୍ଗନଗର ଅତିରିକ୍ତ ଏସ୍ପିଙ୍କ ସହିତ ଆଲୋଚନା କରିଥିଲେ ମଧ୍ୟ ସେମାନେ ଏ ନେଇ କୌଣସି ପଦକ୍ଷେପ ନେଉ ନାହାନ୍ତି । ଏହାକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଥିଲା ବେଳେ ଆଗକୁ ଏହା ବିସ୍ପୋରକ ପରିସ୍ଥିତି ସୃଷ୍ଟି କରିବ ବୋଲି ଆଶଙ୍କା ପ୍ରକାଶ ପାଇଛି ।