ଓଡ଼ିଶା ଲିଡ୍ସ(ବ୍ୟୁରୋ): ଧୁରୀଣ ରାଜନେତା ପ୍ରଫୁଲ୍ଲ ଚନ୍ଦ୍ର ଘଡାଇଙ୍କ ସୁପୁତ୍ର ପୂର୍ବତନ ମନ୍ତ୍ରୀ ତଥା ବିଜୁ ଜନତା ଦଳର ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇ । ଡ୍ୟାନି ନାମରେ ସାରା ରାଜ୍ୟରେ ପରିଚିତ । ଏକଦା ରାଜ୍ୟ ରାଜନୀତିରେ ପ୍ରମୁଖ ଭୂମିକା ଗ୍ରହଣ କରୁଥିବା ପ୍ରଫୁଲ୍ଲ ଚନ୍ଦ୍ର ଘଡାଇ ଯାଜପୁର ଜିଲ୍ଲାରେ ବିଜେଡିକୁ ତୃଣମୂଳ ସ୍ଥରରୁ ସଙ୍ଗଠିତ କରିବା ସହିତ ରାଜ୍ୟରେ ଯାଜପୁର ଜିଲ୍ଲାକୁ ବିଜେଡିର ଅଭେଦ୍ୟ ଦୁର୍ଗରେ ପରିଣତ କରିଥିଲେ । ତାଙ୍କ ସୁପୁତ୍ର ଡ୍ୟାନି କୋରେଇ ନିର୍ବାଚନ ମଣ୍ଡଳୀରୁ ବିଧାୟକ ଭାବେ ରାଜନୈତିକ ଜୀବନ ଆରମ୍ଭ କରି ପରେ ସୁକିନ୍ଦାରୁ ଦୁଇଥର ବିଧାୟକ ଭାବେ ନିର୍ବାଚିତ ହୋଇଥିଲେ । ରାଜ୍ୟ ସରକାରରେ ଗ୍ରାମ୍ୟ ଉନ୍ନୟନ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ଭାବେ ଦାୟିତ୍ୱରେ ରହି ନିଜ ବିଭାଗକୁ ବେଶ କ୍ରିୟାଶୀଳ କରିଥିଲେ । ସୁନ୍ଦରଗଡ ଜିଲ୍ଲାର ପର୍ଯ୍ୟବେକ୍ଷକ ଭାବେ ଦାୟିତ୍ୱ ନେଇ ଦଳକୁ ସଫଳତାର ସିଡ଼ି ଚଢାଇଥିଲେ । ଜଣେ ଅତ୍ୟନ୍ତ ମେଳାପି ଓ ଦୃଢ଼ ସଂଗଠକ ଭାବେ ସେ ନିଜର ଭିନ୍ନ ରାଜନୈତିକ ପରିଚୟ ସାରା ରାଜ୍ୟରେ ସୃଷ୍ଟି କରିଛନ୍ତି । ନିଜର ସ୍ଵଭାବ ସୁଲଭ ଢଙ୍ଗରେ ଅନାବଶ୍ୟକ ମନ୍ତବ୍ୟ ଦେବା କିମ୍ବା ଗଣ ମାଧ୍ୟମ ଆଗରେ ବାରମ୍ବାର ବିବୃତ୍ତି ଦେବାରୁ ଦୂରରେ ରୁହନ୍ତି । ନିଜ ନିର୍ବାଚନ ମଣ୍ଡଳୀର ବୁଭିନ୍ନ ସମସ୍ୟା ସହିତ ଜଡିତ ରହିବା ଓ ଲୋକଙ୍କ ସହିତ ମିଶିବାକୁ ସର୍ବାଧିକ ଗୁରୁତ୍ୱ ଦେଉଛନ୍ତି । ନିର୍ବାଚନରେ ପରାଜୟ ପରେ ବିଗତ ଦିନରେ ବହୁ ଆଗଧାଡ଼ିର ନେତା ଓ କର୍ମୀ ତାଙ୍କ ହାତ ଛାଡିଛନ୍ତି । ହେଲେ ସେ ସେମାନଙ୍କୁ ଫେରାଇ ଆଣିବାକୁ କୌଣସି ଉଦ୍ୟମ ନକରିବା ସମସ୍ତଙ୍କୁ ଚକିତ କରିଛି । ଯେଉଁ ମାନେ ଦଳ ଛାଡି ବିଜେପିରେ ସାମିଲ ହୋଇଛନ୍ତି ସେମାନଙ୍କ ପାଇଁ ସେ ବିଗତ ଦିନରେ ନିନ୍ଦିତ ହୋଇଥିଲେ ମଧ୍ୟ ସେମାନଙ୍କ ବିରୁଦ୍ଧରେ ମୁହଁ ମଧ୍ୟ ଖୋଲି ନାହାନ୍ତି । ହେଲେ ନିଜ କର୍ମୀ ଓ ସାଧାରଣ ଲୋକଙ୍କ ଉପରେ ଅନ୍ୟାୟ ହେଲା ବେଳେ ସରକାର ଓ ପ୍ରଶାସନକୁ ନିଜର ଉଗ୍ରରୂପ ଦେଖାଇବାରେ ଅବହେଳା କରି ନାହାନ୍ତି ।
ଗତ ଦୁଇଦିନ ତଳେ ଜିଲ୍ଲା ବିଜେଡିରେ ଭୂକମ୍ପ ଦେଖିବାକୁ ମିଳିଥିଲା । ଜିଲ୍ଲା ପରିଷଦ ଅଧ୍ୟକ୍ଷା ଓ ଉପାଧ୍ୟକ୍ଷଙ୍କ ସହିତ ୧୮ ଜଣ ସଭ୍ୟ ବିଜେଡି ଛାଡି ବିଜେପିରେ ଯୋଗଦେଇଥିଲେ । ଏହା ଭିତରେ ସୁକିନ୍ଦା ନିର୍ବାଚନ ମଣ୍ଡଳୀର ଦୁଇଜଣ ସାମିଲ ଥିଲେ । ଅନ୍ୟ ନିର୍ବାଚନ ମଣ୍ଡଳୀର ସଭ୍ୟ ସଭ୍ୟା ବିଜେଡି ଛାଡି ବିଜେପିରେ ସାମିଲ ହୋଇଥିଲା ବେଳେ ସମସ୍ତେ ନିରବ ବସିଛନ୍ତି । ହେଲେ ଡ୍ୟାନି କିନ୍ତୁ ନିରବ ବସି ନଥିଲେ । ସାମାନ୍ୟ ଅସୁସ୍ଥତା ଭିତରେ ରଣନୀତି ଆଙ୍କି ବିଜେପିକୁ ଚକମା ଦେଇଛନ୍ତି । ଦାନଗଦି ବ୍ଳକର ୯ ନମ୍ବର ଜୋନ ଜିଲ୍ଲା ପରିଷଦ ସଭ୍ୟା ଟିନା ହାଇବୃଙ୍କୁ ଦଳକୁ ଫେରାଇ ଆଣିବାରେ ସଫଳ ହୋଇଛନ୍ତି । ଏହା ଦ୍ୱାରା ତାଙ୍କ ସାଙ୍ଗଠନିକ ଦକ୍ଷତା ଓ ଦଳ ପ୍ରତି ଥିବା ପ୍ରତିବଦ୍ଧତାକୁ ମଧ୍ୟ ପ୍ରମାଣିତ କରିଛନ୍ତି ।
ଅନ୍ୟ ପକ୍ଷରେ ବିଜେଡି ଗଡ଼ରେ କମ୍ପନ ସୃଷ୍ଟି କରି ବିଜେପି ଖୁସି ମନାଉଥିଲା ବେଳେ ଡ୍ୟାନିଙ୍କ ଏହି ଚତୁର ଗୋଟି ଚାଳନା ବିଜେଡି ମହଲରେ ଆଶା ଓ ଉତ୍ସାହ ଭରିଥିଲା ବେଳେ ବିଜେପିକୁ ଚକିତ କରିଦେଇଛି । ଉଭୟ ଦଳର କର୍ମୀ କିନ୍ତୁ ଗୋଟିଏ ମତ ଦେଉଛନ୍ତି ଡ୍ୟାନିଙ୍କ ଦ୍ୱାରା ଏହା ସମ୍ଭବ । ଏହି ଗୋଟି ଚାଳନାରେ ଡ୍ୟାନି କିନ୍ତୁ ଏକ ବାର୍ତ୍ତା ଛାଡିଛନ୍ତି ତାହା ହେଲା ମୁଁ ଯେଉଁ ମାନଙ୍କ ଠାରୁ ମୁହଁ ଫେରାଇ ନେଇଛି ସେମାନଙ୍କୁ ବିଜେପି ନେଲେ ମୋର କୌଣସି ମତଲବ ନାହିଁ ହେଲେ ଯେଉଁ ମାନେ ମୋ ସହିତ, ଦଳ ଶହିତ ଲୋକଙ୍କ ସହିତ ଅଛନ୍ତି ସେମାନଙ୍କ ଉପରେ ନଜର ପକାଇଲେ ମୁଁ ଛାଡ଼ିବି ନାହିଁ । ଯାହାର ଝଲକ ଗତକାଲି ଦେଖାଇ କେବଳ ଯାଜପୁର ଜିଲ୍ଲା ନୁହେଁ ରାଜ୍ୟ ରାଜନୀତିରେ ଚର୍ଚ୍ଚା ସୃଷ୍ଟି କରିଛନ୍ତି ।
