ଓଡିଶା ଲିଡ୍ସ(ଯାଜପୁର): ସାଧାରଣ ଲୋକଙ୍କୁ ଅସମ୍ମାନୀତ କରୁଛନ୍ତି କାଳିଆପାଣି ଥାନାଧିକାରୀ ।ନିର୍ବାଚିତ ଜନ ପ୍ରତିନିଧିଙ୍କୁ ବି ସମ୍ମାନ ଦେଉ ନାହାନ୍ତି । ଜାତି ନାଁ ଧରି ଗାଳିଗୁଲଜ ମଧ୍ୟ କରୁଛନ୍ତି । ନିଜେ ଥାନାଧିକାରୀ ବିଜେପିର ଗୁଣ୍ଡା ସାଜିଛନ୍ତି । ରାଜ୍ୟର ମୁଖ୍ୟମନ୍ତ୍ରୀ ଜଣେ ଅଆଦିବାସୀ ଭାଇ ହୋଇଥିଲା ବେଳେ ସୁକିନ୍ଦାର ଆଦିବାସୀ ମାନଙ୍କୁ ଅସମ୍ମାନୀତ କରିବାର ଅଧିକାର ଥାନା ଅଧିକାରୀଙ୍କୁ କିଏ ଦେଲା ବୋଲି ପ୍ରଶ୍ନ କରିବା ସହିତ କାଳିଆପାଣି ଥାନା ଅଧିକାରୀ ସର୍ବ ସମ୍ମୁଖରେ କ୍ଷମା ପ୍ରାର୍ଥନା କରନ୍ତୁ ବୋଲି ଦାବି କରିଛନ୍ତି ପୂର୍ବତନ ମନ୍ତ୍ରୀ ଇଂ ପ୍ରୀତିରଞ୍ଜନ ଘଡାଇ । ଯଦି ସେ ସର୍ବ ସମ୍ମୁଖରେ କ୍ଷମା ପ୍ରାର୍ଥନା ନ କରନ୍ତି ତେବେ ଖଣି ଅଞ୍ଚଳକୁ ସମ୍ପୂର୍ଣ୍ଣ ବନ୍ଦ କରି ଦିଆଯିବ ବୋଲି କହିବା ସହିତ ଏଥିପାଇଁ ୨୪ ଘଣ୍ଟାର କଣ୍ଟ ଦେଇଛନ୍ତି ।
ଆଜି କଳିଙ୍ଗନଗର ଅତିରିକ୍ତ ଆରକ୍ଷୀ ଅଧିକ୍ଷକଙ୍କୁ ଭେଟି ଏହି ଭଳି ଚରମ ବାଣୀ ଶୁଣାଇଛନ୍ତି । ଜିଲ୍ଲାରେ ଆଇନ ଶୃଙ୍ଖଳା ପରିସ୍ଥିତି ବିଗିଡି ଯାଇଥିଲା ବେଳେ ଗତକାଲି ବିଜେପି ସମର୍ଥିତ କର୍ମୀ କାଳିଆପାଣି ସ୍ଥିତ ଶ୍ରମିକ ସଙ୍ଗଠନର କାର୍ଯ୍ୟାଳୟରେ ପଶି ବ୍ୟାପକ ଭଙ୍ଗାରୁଜା କରିବା ସହିତ ବନ୍ଧୁକ, ଖଣ୍ଡା ଦେଖାଇ ବୋମାମାଡ଼ କରି ହତ୍ୟା ଧମକ ଦେଇଥିଲେ । ଆକ୍ରମଣକାରୀଙ୍କ ମଧ୍ୟରୁ ଜଣକୁ ଧରି ସଧାରଣ ଲୋକ ପୋଲିସ ଜିମା ଦେଇଥିଲେ । ଖଣି ଅଞ୍ଚଳ ଅଶାନ୍ତ ହେଉଥିଲା ବେଳେ କାଳିଆପାଣି ପୋଲିସ ନିରବ ବସିଛି ।
ଅପରାଧିକ କାର୍ଯ୍ୟ କଳାପରେ ରୋକ ଲଗାଇବା ବଦଳରେ ଥାନା ଅଧିକାରୀ ସାଧାରଣ ଲୋକମାନଙ୍କୁ ଅସମ୍ମାନୀତ କରି ଧମକ ଦେଉଛନ୍ତି ବୋଲି ସାଧାରଣରେ ଅଭିଯୋଗ ପରେ ଆଜି ବେଶ କଡା ଆଭିମୁଖ୍ୟ ଦେଖାଇଛନ୍ତି ପୂର୍ବତନ ମନ୍ତ୍ରୀ । ଗତକାଲି ମଧ୍ୟ ଇଂ ଘଡାଇ ଜିଲ୍ଲା ଏସ୍ପିଙ୍କ ସହିତ ଏ ନେଇ ଆଲୋଚନା କରିଥିଲେ । ଦିନକୁ ଦିନ କାଳିଆପାଣି ଠାନାଧିକାରୀଙ୍କ ବିରୁଦ୍ଧରେ ବିଭିନ୍ନ ଅଭିଯୋଗର ଫର୍ଦ୍ଦ ବଢି ଚାଲିଛି । ତାଙ୍କ ବିରୁଦ୍ଧରେ ଜନ ଅସନ୍ତୋଷ ବଢୁଥିଲା ବେଳେ ଆଗକୁ ଜିଲ୍ଲା ପୋଲିସ ମୁଖିଆ କି ପଦକ୍ଷେପ ନେଉଛନ୍ତି ତାକୁ ଅପେକ୍ଷା ।
