ମୃତ ଅର୍ଜିତଙ୍କ ଭାଇଙ୍କୁ ମରଣାନ୍ତକ ଆକ୍ରମଣ, କଟକ ସ୍ଥାନାନ୍ତରିତ

ଓଡ଼ିଶା ଲିଡ୍ସ(ଯାଜପୁର): ଧର୍ମଶାଳା ଥାନା ଅନ୍ତର୍ଗତ ଜାରକାର ଅଜୟ କୁମାର ଜେନାଙ୍କ ଏକମାତ୍ର ପୁଅ ଅର୍ଜିତ ଜେନାଙ୍କୁ କ୍ରସର ମାଲିକ, ତାଙ୍କ ମ୍ୟାନେଜର ଓ ତାଙ୍କ ଭଣଜା ଅତି ଅମାନୁଷିକ ଭାବେ ମାଡ଼ ମାରି ହତ୍ୟା କରିଥିବା ଅଭିଯୋଗ ହୋଇଥିଲା ବେଳେ ଆଜି ମୃତ ଅର୍ଜିତଙ୍କ ମାଉସୀ ପୁଅ ଭାଇଙ୍କୁ ମରଣାନ୍ତକ ଆକ୍ରମଣ ହୋଇଛି । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ପାଇଁ କଟକ ପଠା ଯାଇଛି । ଯାଜପୁର ଜିଲ୍ଲା ଜେନାପୁର ଥାନା ଅନ୍ତର୍ଗତ ରାହାଡ଼ପୁରରେ ଥିବା ଜ୍ଞାନରଞ୍ଜନ ମହାପାତ୍ରଙ୍କ ପଦ୍ମାବତୀ କ୍ରସରରେ କ୍ୟାସିୟର ଭାବେ କାର୍ଯ୍ୟ କରୁଥିଲେ ମୃତ ଅର୍ଜିତ। ଅର୍ଥ ତୋଷରପାତ ଅଭିଯୋଗରେ କ୍ରସର ସହିତ ଜ୍ଞାନରଞ୍ଜନଙ୍କ ଆରୁହାସ୍ଥିତ ଘରେ ଅର୍ଜିତଙ୍କୁ କ୍ରସରର ମ୍ୟାନେଜର ଏବଂ ଭଣଜାଙ୍କ ସମେତ ଅନ୍ୟ କିଛି ଲୋକ ବର୍ବୋରଚିତ ଭାବେ ମାଡ଼ ମାରିଥିଲେ । ଏପରିକି ତାଙ୍କ ଶରୀରରେ ଲୁହା ରଡ଼କୁ ପଚାଇ ଚେଙ୍କ ଦେଇ ଓ ଗରମ ତେଲ ଢାଳି ତାଙ୍କୁ ପାଶବିକ ନିର୍ଯ୍ୟାତନା ମଧ୍ୟ ଦିଆଯାଇଥିଲା । ସୂଚନା ପାଇ ଅର୍ଜିତଙ୍କ ମାଆ ଏବଂ ତାଙ୍କ ମାଉସୀ ପୁଅ ଭାଇ ଢେଙ୍କାନାଳ ଜିଲ୍ଲା ନିହଲପ୍ରସାଦ ଥାନା ଅନ୍ତର୍ଗତ ଚଣ୍ଡିଆ ଗ୍ରାମର ସୁଜିତ ଜେନା ଆକ୍ରମଣକାରୀଙ୍କ କବଳରୁ ଗୁରୁତର ଆହତ ଅବସ୍ଥାରେ ଅର୍ଜିତଙ୍କୁ ଉଦ୍ଧାର କରି ଚିକିତ୍ସା ପାଇଁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରିଥିଲେ । ଚିକିତ୍ସାଧିନ ଅବସ୍ଥାରେ ସେଠାରେ ଶ୍ରମିକ ଦିବସ ଦିନ ତାଙ୍କର ମୃତ୍ୟୁ ହୋଇଥିଲା । ସୁଜିତ ହିଁ ମୃତକ ଅର୍ଜିତ ଜେନାଙ୍କ ହତ୍ୟାର କାରଣ ଜାଣିଥିଲେ ଏବଂ ଆକ୍ରମଣକାରୀଙ୍କୁ ମଧ୍ୟ ଚିହ୍ନିଥିଲେ ବୋଲି ଚର୍ଚ୍ଚା ହେଉଛି । ହତ୍ୟାକାଣ୍ଡରେ ସମ୍ପୃକ୍ତ ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲେ ସୁଜିତ । ସୁଜିତ ହିଁ ଅର୍ଜିତ ଜେନାଙ୍କ ହତ୍ୟାକାଣ୍ଡ ମାମଲାର ଜଣେ ମୁଖ୍ୟ ସାକ୍ଷୀ ଥିଲେ । ସମ୍ଭବତଃ ପ୍ରମାଣ ନଷ୍ଟ ପାଇଁ ମୁଖ୍ୟ ସାକ୍ଷୀ ସୁଜିତ ଜେନାଙ୍କୁ ସେ ନିଜ ଘରକୁ ଫେରୁଥିବା ସମୟରେ ସଂଧ୍ୟା ସମୟରେ ରମ୍ପେଇ ଛକ ନିକଟରେ କିଛି ଦୁବୁର୍ତ୍ତ ତାଙ୍କ ଉପରେ ମରଣାନ୍ତକ ଆକ୍ରମଣ କରିଥିବା ନେଇ ଅଭିଯୋଗ ହୋଇଛି । ଗୁରୁତର ଅବସ୍ଥାରେ ଚିକିତ୍ସା ପାଇଁ ତାଙ୍କୁ ପ୍ରଥମେ ବଡ଼ଚଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ମାତ୍ର ଅବସ୍ଥା ଗୁରୁତର ହେବାରୁ ଡାକ୍ତର ତାଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରିଛନ୍ତି । ଏହି ଘଟଣା ଚଞ୍ଚଲ୍ୟ ସୃଷ୍ଟି କରିଛି । ଗୋଟିଏ ହତ୍ୟା ଘଟଣା ପରେ ଆଉ ଗୋଟିଏ ହତ୍ୟା ପାଇଁ ମରଣାନ୍ତକ ଆକ୍ରମଣ ହେବା ଜିଲ୍ଲାର ଆଇନ ଶୃଙ୍ଖଳାକୁ ପଦାରେ ପକାଇ ଦେଇଛି । ଯାଜପୁର ଜିଲ୍ଲା ପୋଲିସ ଘଟଣାକୁ ଗମ୍ଭୀରତାର ସହ ଗ୍ରହଣ କରି ତ୍ୱରିତ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନେବା ଜରୁରୀ ହୋଇଛି ।