ଓଡ଼ିଶା ଲିଡ୍ସ(ବ୍ୟୁରୋ): ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ତଥା ବରିଷ୍ଠ ଖେଳାଳି ରୋହିତ ଶର୍ମାଙ୍କ ପାଇଁ ଆସନ୍ତା ଲର୍ଡ୍ସ ଏକ ଦିବସୀୟ ମ୍ୟାଚ ଶେଷ ଆନ୍ତର୍ଜାତୀୟ ମ୍ୟାଚ ହେବାକୁ ଯାଉଛି । ଭାରତୀୟ ଚୟନକର୍ତ୍ତାଙ୍କ ପକ୍ଷରୁ ସେ ଆଗାମୀ ୨୦୨୭ ବିଶ୍ୱକପ ଦଳର ଅଂଶ ନୁହଁନ୍ତି ବୋଲି ସୂଚନା ଦିଆ ଯାଇଥିବା ଚର୍ଚ୍ଚା ହେଉଛି । ଫଳରେ ଲର୍ଡ୍ସ ଏକଦିବସୀୟ ତାଙ୍କ କ୍ୟାରିୟରର ଶେଷ ମ୍ୟାଚ ହେବାକୁ ଯାଉଛି । ପୂର୍ବରୁ ସେ ଟେଷ୍ଟ ଓ T-20ରୁ ଅବସର ନେଇ ସାରିଥିଲା ବେଳେ କେବଳ ଏକ ଦିବସୀୟ ମ୍ୟାଚ ଖେଳୁଥିଲେ । ୩୯ ବର୍ଷୀୟ ରୋହିତ ଏକ ଦିବସୀୟ କ୍ରିକେଟରେ ୧୧ ହଜାରରୁ ଅଧିକ ରନ ସଂଗ୍ରହ କରିଥିଲା ବେଳେ ୨୦୨୭ ବିଶ୍ୱକପ ଖେଳିବାକୁ ଇଚ୍ଛା ରଖିଥିଲେ । ହେଲେ ଆଜି ରୋହିତଙ୍କ ଅବସର ବିଷୟରେ ବିଭିନ୍ନ ସାମାଜିକ ଗଣ ମାଧ୍ୟମରେ ବ୍ୟାପକ ଚର୍ଚ୍ଚା ଆରମ୍ଭ ହୋଇଛି । ବିଶ୍ୱକପ ଖେଳିବାକୁ ରୋହିତ ମଧ୍ୟ କଠିନ ପରିଶ୍ରମ କରୁଥିଲେ । ଇଂଲଣ୍ଡ ଗସ୍ତରେ ଥିବା ବେଳେ ପ୍ରଥମ ଦୁଇଟି ମ୍ୟାଚରେ ସେ ଆଶାନୁରୂପ ପ୍ରଦର୍ଶନ କରି ପାରିନଥିଲେ । ଅନ୍ୟ ପକ୍ଷରେ ଗୌତମ ଗମ୍ଭୀର ଭାରତୀୟ ଦଳର ମୁଖ୍ୟକୋଚ ହେବା ପରେ ବରିଷ୍ଠ ଖେଳାଳି ରୋହିତ ଓ କୋହଲିଙ୍କ ସହିତ ତାଙ୍କ ବିବାଦ ନେଇ ସବୁ ସମୟରେ ଚର୍ଚ୍ଚା ହୋଇଥାଏ । ଗୌତମଙ୍କ ପାଇଁ ଫର୍ମରେ ଥାଇ ମଧ୍ୟ ବିରାଟ କୋହିଲି ଟେଷ୍ଟ ମ୍ୟାଚରୁ ଅବସର ନେଇଥିଲେ । ବିଗତ କିଛି ଦିନ ମଧ୍ୟରେ ଭାରତୀୟ କ୍ରିକେଟ ଦଳ ଖରାପ ପ୍ରଦର୍ଶନ କରୁଥିଲା ବେଳେ ଗମ୍ଭୀର ତୀବ୍ର ସମାଲୋଚନାର ଶିକାର ହୋଇଛନ୍ତି । ଭାରତୀୟ ଦଳର ଖେଳାଳି ଚୟନରେ ମଧ୍ୟ ବ୍ୟାପକ ଅନିୟମିତତା ହେଉଥିବା ନେଇ ଅଭିଯୋଗ ହେଉଛି ।
orissaleads@admin
July 17, 2026
