ଓଡ଼ିଶା ଲିଡ୍ସ(ଯାଜପୁର): ଧର୍ମଶାଳା ଥାନା ଜାରକାର ଅଜୟ କୁମାର ଜେନାଙ୍କ ଏକ ମାତ୍ର ୨୨ ବର୍ଷୀୟ ପୁଅ ଅରିଜିତ ଜେନା । ଏକ କ୍ରସରରେ କାମ କରୁଥିଲା ବେଳେ ଅର୍ଥ ହେରଫେର ଅଭିଯୋଗରେ ତାଙ୍କ ଉପରେ ହୋଇଥିଲା ବର୍ବରୋଚିତ ଆକ୍ରମଣ । ଲୁହା ରଡ଼ରେ ଅତି ନୃଶଂସ ଭାବେ ତାଙ୍କୁ ମାଡ଼ ମରାଯାଇଥିଲା । କେବଳ ସେତିକିରେ ସନ୍ତୁଷ୍ଟ ହୋଇ ନଥିଲେ ଆକ୍ରମଣକାରୀ । ତାଙ୍କ ଉପରେ ଗରମ ତେଲ ମଧ୍ୟ ଢଳା ଯାଇଥିଲା । ତାଙ୍କ ଉପରେ ଅତ୍ୟାଚାର ସୀମା ଟପିଥିଲା । ତାଙ୍କୁ ବହୁ ଉଦ୍ୟମ ପରେ ପରିବାର ଲୋକେ ଉଦ୍ଧାର କରି ଚିକତ୍ସା କରୁଥିଲା ବେଳେ ଶ୍ରମିକ ଦିବସ ଦିନ ତାଙ୍କ ମୃତ୍ୟୁ ହୋଇଥିଲା । ତାଙ୍କୁ ଏଭଳି ଭାବେ ମାଡ଼ ମାରି ମାରିଦେବା ଘଟଣା ସମସ୍ତଙ୍କୁ ଆନ୍ଦୋଳିତ କରୁଛି । ଯଦି ସେ ଅର୍ଥ ତୋଷରପାତ କରିଥିଲେ ତେବେ ସମ୍ପୃକ୍ତ କ୍ରସର ମାଲିକ ତାଙ୍କ ପରିବାରକୁ କହି ପାରି ଥାଆନ୍ତେ, ନ ହେଲେ ଆଇନର ଆଶ୍ରୟ ନେଇ ଥାଆନ୍ତେ । ସେପରି ନ କରି ଅତି ନିଷ୍ଠୁର ଆଚରଣ ଦେଖାଇଛନ୍ତି । ମୃତ ଅରିଜିତ ମାତ୍ର ତିନି ମାସ ହେଲା ପଦ୍ମାବତୀ କ୍ରସରରେ କାର୍ଯ୍ୟ କରୁଥିଲେ । ଏହି କ୍ରସରକୁ ଜ୍ଞାନ ରଞ୍ଜନ ମହାପାତ୍ର ଚଳାଉଥିଲେ । ଗତ ୨୭ ତାରିଖରୁ ଅରିଜିତଙ୍କ ସହିତ ତାଙ୍କ ପରିବାରର ଲୋକେ ସମ୍ପର୍କ କରି ପାରିନଥିଲେ । ଏହା ପରେ ପରିବାର ଲୋକେ କ୍ରସରରେ ପହଞ୍ଚିଥିଲେ । ମାଲିକ ଅରିଜିତଙ୍କୁ ତାଙ୍କ ଆରୁହା ସ୍ଥିତ ଘରକୁ ନେଇ ଯାଇଥିବା ଜାଣିବାକୁ ପାଇଥିଲେ । ପୁଅକୁ ସେଠାରେ ଅତି ନିର୍ଦ୍ଧୟ ଭାବେ ମାଡ଼ ମରା ଯାଇଥିବା ଦେଖିବାକୁ ପାଇଥିଲେ । କାକୁତି ମିନତି କରି ଅରିଜିତଙ୍କୁ ଘରକୁ ଆଣିଥିଲେ ପରିବାର ଲୋକେ । ହେଲେ ଚିକିତ୍ସା କରି ମଧ୍ୟ ବଞ୍ଚାଇ ପାରି ନଥିଲେ । ଶେଷରେ ଗତ ଏକ ତାରିଖ ଦିନ ଆଖି ବୁଝିଥିଲେ ଅରିଜିତ । ଏ ନେଇ ଅରିଜିତଙ୍କ ବାପା ଧର୍ମଶାଳା ଥାନାରେ ଜ୍ଞାନରଞ୍ଜନ ମହାପାତ୍ର, ତାଙ୍କ ଭଣଜା ଓ ମ୍ୟାନେଜରଙ୍କ ବିରୁଦ୍ଧରେ ଅଭିଯୋଗ କରିଛନ୍ତି । ଏକ ମାତ୍ର ପୁଅକୁ ହରାଇ ସମ୍ପୂର୍ଣ୍ଣ ଭାଙ୍ଗି ପଡିଛି ଅରିଜିତଙ୍କ ପରିବାର । ଥାନାରେ ଅଭିଯୋଗ କରି ନ୍ୟାୟ ମାଗିଛନ୍ତି ତାଙ୍କ ବାପା । ହେଲେ ତାଙ୍କୁ ନ୍ୟାୟ ମିଳିବ ତ ? ଏ ନେଇ ସନ୍ଦେହ ସୃଷ୍ଟି ହୋଇଛି । କାରଣ ପ୍ରଭାବଶାଳୀ ଏହି କ୍ରସର ବ୍ୟବସାୟୀ ମାନେ ବିଗତ ଦିନରେ ଆଇନକୁ ଦଳି ମକଚି ଦେବାର ବହୁ ନଜିର ରହିଛି । ନ୍ୟାୟ ପାଇବାକୁ ଚିତ୍କାର କରି ବହୁ କଣ୍ଠ ଶୁଖି ଯାଇଛି ତ ଆଉ କାହାର କଣ୍ଠରୋଧ କରାଯାଇଛି । ନା ଅଭିଯୋଗ କାରୀଙ୍କ ସ୍ୱର ପ୍ରଶାନ କାନରେ ପଡିଛି ନା ପ୍ରତିପତ୍ତିଶାଳୀ ଓ କ୍ଷମତାଶାଳୀ ମାଲିକ ମାନେ ଶୁଣିଛନ୍ତି । କ୍ଷମତା ଓ ଅର୍ଥର ଚକ୍ରବ୍ୟୁହ ମଧ୍ୟରେ ମୃତକଙ୍କ ପରିବାରର ଦାବି ହଜି ଯାଇଛି । ଅକଥନୀୟ ନିର୍ଯ୍ୟାତନା ସହି ନପାରି ମୃତ୍ୟୁ ବରଣ କରିଥିବା ଅରିଜିତଙ୍କ ପରିବାର ଆଜି ତାଙ୍କୁ ହରାଇ ଆଖିରୁ ଲୁହ ଝରାଉଛନ୍ତି । ତାଙ୍କ ପରିବାର ନ୍ୟାୟ ପାଇଁ ଦ୍ୱାରସ୍ଥ ହୋଇଥିଲା ବେଳେ ପ୍ରଶାସନ ତାଙ୍କୁ ନ୍ୟାୟ ଦେବ ତ ?
orissaleads@admin
May 3, 2025
