ଭକ୍ତଙ୍କ ୟୁ-ଟର୍ଣ୍ଣ: ପଞ୍ଚାୟତ ନିର୍ବାଚନରେ ଏକାକୀ ଲଢ଼ିବ କଂଗ୍ରେସ

ଓଡ଼ିଶା ଲିଡ୍ସ(ବ୍ୟୁରୋ): ବିଧାନସଭା ନିର୍ବାଚନରେ ଆବଶ୍ୟକ ପଡ଼ିଲେ ବୁଝାବଣା ହୋଇପାରେ କିନ୍ତୁ ପଞ୍ଚାୟତ ନିର୍ବାଚନରେ ମେଣ୍ଟ ହେବନାହିଁ ବୋଲି କହିଛନ୍ତି ପିସିସି ସଭାପତି ଭକ୍ତ ଚରଣ ଦାସ । ଗତ ରାଜ୍ୟସଭା ନିର୍ବାଚନରେ ବିଜେଡି ସହିତ ହାତ ମିଳାଇଥିଲା କଂଗ୍ରେସ । ଉଭୟ ବିଜେଡି ଓ କଂଗ୍ରେସର ଏହି ମଧୁଚନ୍ଦ୍ରିକା ଉଭୟ ଦଳରେ ଅସନ୍ତୋଷ ସୃଷ୍ଟି କରିଥିଲା । କଂଗ୍ରେସ ସହିତ ହାତ ମିଳାଇବାକୁ ନେଇ ବିଜେଡି ଦଳରେ ମଧ୍ୟ ଅସନ୍ତୋଷ ତୀବ୍ର ହୋଇଥିଲା । ଅପରପକ୍ଷେ ଭକ୍ତଙ୍କ ଏହି ନିଷ୍ପତି କଂଗ୍ରେସ ଦଳରେ ମଧ୍ୟ ଅସନ୍ତୋଷ ସୃଷ୍ଟି କରିଥିଲା । ଦଳର ବହୁ ବରିଷ୍ଠ ନେତା ଏହାକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ । ବିଜେପିକୁ ପ୍ରତିହତ କରିବାକୁ ବିଜେଡି ଓ କଂଗ୍ରେସ ମଧ୍ୟରେ ଆଗାମି ଦିନରେ ମେଣ୍ଟ ହେବାକୁ ନେଇ ରାଜନୈତିକ ଚର୍ଚ୍ଚା ଆରମ୍ଭ ହୋଇଥିଲା । ନିଜ ଦଳ ଭିତରେ ଅସନ୍ତୋଷ ରହିଥିବା ବେଳେ ଭକ୍ତ ଏବେ ୟୁ-ଟର୍ଣ୍ଣ ନେଇଛନ୍ତି । ଆଜି ଭକ୍ତଙ୍କ ଏହି ବୟାନ ରାଜ୍ୟ ରାଜନୀତିରେ ନୂଆ ଚର୍ଚ୍ଚା ସୃଷ୍ଟି କରିଛି । ପଞ୍ଚାୟତ ନିର୍ବାଚନରେ ମେଣ୍ଟ କରିବ ନାହିଁ କଂଗ୍ରେସ । ପିସିସି ସଭାପତି ଭକ୍ତ କହିଛନ୍ତି, ଆମେ ଏକାକୀ ନିର୍ବାଚନ ଲଢ଼ିବୁ, ଆମ ଦଳ ସୁଦୃଢ଼ ଅଛି । ବିଧାନସଭା ନିର୍ବାଚନରେ ଆବଶ୍ୟକ ପଡ଼ିଲେ ବୁଝାବଣା ହୋଇପାରେ କିନ୍ତୁ ପଞ୍ଚାୟତ ନିର୍ବାଚନରେ ମେଣ୍ଟ ହେବନାହିଁ । ପୂର୍ବରୁ ନିଜେ ଭକ୍ତ ଦାସ କହିଥିଲେ ବିଜେଡି ସହିତ ମେଣ୍ଟ ହୋଇପାରେ କିନ୍ତୁ ଏବେ ସେ ସ୍ପଷ୍ଟ କରିଛନ୍ତି ପଞ୍ଚାୟତ ନିର୍ବାଚନରେ ବିଜେଡି ସହିତ ମେଣ୍ଟ ହେବନାହିଁ ।