ଓଡ଼ିଶା ଲିଡ୍ସ(ବ୍ୟୁରୋ: ଗତ ନିର୍ବାଚନରେ ବରିଷ୍ଠ ତଥା ଅନୁଭବୀ ନେତା ଅମର ପ୍ରସାଦ ଶତପଥୀଙ୍କୁ ବିଜେଡି ଅଣଦେଖା କରିଥିଲା । ସେବେଠାରୁ ଦଳ ଛାଡି ନଥିଲେ ବି ଦଳଠାରୁ ଦୂରତା ରକ୍ଷା କରୁଛନ୍ତି ଅମର । ଗତ ବିଜୁ ପଟ୍ଟନାୟକ ଜୟନ୍ତୀରେ ତେରଛା ବାଣ ମାରିଛନ୍ତି ଅମର । ସେ କହିଛନ୍ତି ବିଜେଡ଼ି ଗଠନ ହୋଇଥିଲା ବିଜୁ ବାବୁଙ୍କ ନାଁରେ। ଦଳ ଗଠନର ଉଦ୍ଦେଶ୍ୟ ଥିଲା ବିଜୁ ବାବୁଙ୍କ ସ୍ଵପ୍ନ ସାକାର କରିବା ସହିତ ତାଙ୍କ ବିଚାର ଓ ଆଦର୍ଶକୁ କାର୍ଯ୍ୟକାରୀ କରିବା। କିନ୍ତୁ ବିଡ଼ମ୍ବନାର ବିଷୟ ବିଗତ ଦିନରେ ସେଥିରେ ଅନେକ ତ୍ରୁଟି ବିଚ୍ୟୁତି ହେଲା। ଯେଉଁଥିପାଇଁ ଓଡିଶା ଲୋକେ ଦଳ ଠାରୁ ମୁହଁ ମୋଡି ଦେଲେ । ଏବେ ସେକଥା ଖୋଜିଲେ ତାର କୌଣସି ପ୍ରାସଙ୍ଗିକତା ନାହିଁ।
ବିଜୁ ଲିଗାସୀ ଓ ପଞ୍ଚାୟତିରାଜ ଦିବସ ପାଳନକୁ ନେଇ ବିଜେଡିକୁ ଏଭଳି ତେରଛା ବାଣ ମାରିଛନ୍ତି ଏକଦା ବିଜୁ ବାବୁଙ୍କର ଘନିଷ୍ଠ ଥିବା ଅମର । ବରିଷ୍ଠ ଅମର କହିଛନ୍ତି, ବିଜୁ ଲିଗାସୀକୁ କେହି ଚାହିଁଲେ ବି କାଟି ପାରିବେନି। ପଞ୍ଚାୟତିରାଜ ଦିବସ ପାଳନ ରାଜ୍ୟ ସରକାରଙ୍କ ନିଷ୍ପତ୍ତି । ଏବେ ଜାତୀୟ ସ୍ରୋତରେ ସାମିଲ ହୋଇଛି ରାଜ୍ୟର ବିଜେପି ସରକାର। ଏଥିରେ କୌଣସି ତ୍ରୁଟି ବିଚ୍ୟୁତି ବି ନାହିଁ । ରାଜ୍ୟ ସରକାର ପଞ୍ଚାୟତ ରାଜ ଦିବସ ତାରିଖ ପରିବର୍ତ୍ତନ କରିଥିଲେ ମଧ୍ୟ ସଠିକ ଢଙ୍ଗରେ ବିଜୁ ଜୟନ୍ତୀ ପାଳନ କରିଛନ୍ତି । ବିଜୁ ବାବୁଙ୍କୁ ସମ୍ମାନ ଦେଇ ମୁଖ୍ୟମନ୍ତ୍ରୀ ବିଜୁ ବାବୁଙ୍କ ସ୍ୱପ୍ନ ପୂରଣ କରିବାକୁ କହିଛନ୍ତି । ଏହା ରାଜ୍ୟ ସରକାରଙ୍କର କୌଣସି କ୍ଷୁଦ୍ର ମାନସିକତା ନୁହେଁ । ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ ନିମନ୍ତ୍ରଣ କରିବା ଯଥାର୍ଥ ଓ ଏଥିରେ କୌଣସି ବିଲକ୍ଷଣ ନାହିଁ ବୋଲି କହିଛନ୍ତି ବରିଷ୍ଠ ନେତା ଅମର ପ୍ରସାଦ ଶତପଥୀ ।
