ଓଡ଼ିଶା ଲିଡ୍ସ(ଯାଜପୁର): ଯାଜପୁର ବ୍ଲକ ଝାଲପଡା ପଞ୍ଚାୟତ କାକୁଡିକୁଦ- ନୀଳକଣ୍ଠପୁର ଗ୍ରାମରେ ବହୁ ଲକ୍ଷ୍ମୀ-ନୃସିଂହ ଓ ଜଗନ୍ନାଥ ମନ୍ଦିର ପ୍ରତିଷ୍ଠା ସହିତ ଦିବ୍ୟ ଶ୍ରୀ ବିଗ୍ରହ ପ୍ରତିଷ୍ଠା ଉତ୍ସବ ଅନୁଷ୍ଠିତ ହୋଇଯାଇଛି। ଏହି ଅବସରରେ ମଙ୍ଗଳବାର ସକାଳୁ ପଣ୍ଡିତ ଡ. ପ୍ରଭଞ୍ଜନ ପତି ନେତୃତ୍ୱରେ ପଣ୍ଡିତ ମାନେ ପୂଜାର୍ଚ୍ଚନା କରିଥିଲେ । ମୁଖ୍ୟ କର୍ତ୍ତା ଅଜୟ କୁମାର ସାହୁ ଓ ତାଙ୍କ ସହଧର୍ମିଣୀ ମଧୁଶ୍ରୀ ସାହୁଙ୍କ ପ୍ରତ୍ୟକ୍ଷ ତତ୍ୱାବଧାନରେ ପୂଜା କାର୍ଯ୍ୟ ସମାପନ ହୋଇଥିଲା । ଗ୍ରାମର ଶତାଧିକ ମହିଳା ଓ ପୁରୁଷ କଳସଧାରୀ ପବିତ୍ର ବ୍ରାହ୍ମଣୀ ନଦୀରୁ ଜଳ ଉଠାଇ ଏକ ବିରାଟ ଶୋଭାଯାତ୍ରାରେ ଗ୍ରାମ ପରିକ୍ରମା କରି ମନ୍ଦିର ଜଜ୍ଞ ମଣ୍ଡପ ନିକଟରେ କଳସ ସ୍ଥାପନ କରିଥିଲେ । ପରେ ଜଗତ କଲ୍ୟାଣ ଉଦ୍ଧେଶ୍ୟରେ ଶଙ୍ଖ, ଘଣ୍ଟ, ହୁଳହୁଳି ଧ୍ୱନି ମଧ୍ୟରେ ବିଶ୍ଵଶାନ୍ତି ମହାଯଜ୍ଞ କାର୍ଯ୍ୟ ଆରମ୍ଭ ହୋଇଥିଲା । ଗତ ୩ ତାରିଖ ସୋମବାର ଠାରୁ ଏହା ଆରମ୍ଭ ହୋଇଥିଲା ବେଳେ ୯ ତାରିଖ ରବିବାର ସମାପନ ହେବ।
ଉତ୍ସବର ପ୍ରଥମ ଦିବସରେ ଅଙ୍କୁରାରୋପଣ, ଦିତୀୟ ଦିବସରେ କଳସଯାତ୍ରା, ତୃତୀୟ ଦିବସରେ ସୂର୍ଯ୍ୟପୂଜା, ଗୋ-ପୂଜା ଓ ରୁଦ୍ର ମହାଯଜ୍ଞ, ଚତୁର୍ଥ ଦିବସରେ ଗୀତା ମହାଯଜ୍ଞ ଓ ଦେବତା ପ୍ରତିଷ୍ଠା, ପଞ୍ଚମ ଦିବସରେ ଶ୍ରୀ ଜଗନ୍ନାଥ ମନ୍ଦିର ପ୍ରତିଷ୍ଠା, ଷଷ୍ଠ ଦିବସରେ ଚଣ୍ଡି ମହାଯଜ୍ଞ ଓ ସପ୍ତମ ଦିନ ରବିବାର ପୂର୍ଣ୍ଣାହୁତି ସହିତ ଶ୍ରୀ ବିଗ୍ରହଙ୍କ ନବଯୌବନ ଦର୍ଶନ ଉତ୍ସବ ଅନୁଷ୍ଠିତ ହେବ । ଏହି ଉତ୍ସବ ଦୀର୍ଘ ୭ଦିନ ଧରି ଚାଲୁ ରହିବା ସହ ବିଭିନ୍ନ ଦିବସରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ମନ୍ଦିର ପରିଚାଳନା କମିଟି ପକ୍ଷରୁ ସୂଚନା ଦିଆଯାଇଛି।
