ଓଡ଼ିଶା ଲିଡ୍ସ(ଯାଜପୁର): ପୋଲିସ କାର୍ଯ୍ୟାନୁଷ୍ଠାନ ନଥିବାରୁ ଯାଜପୁର ଜିଲ୍ଲାରେ ଦିନକୁ ଦିନ ଅନୈତିକ କାର୍ଯ୍ୟ ବୃଦ୍ଧି ପାଉଛି । ଯାହା ଜିଲ୍ଲାକୁ ନିନ୍ଦିତ କରୁଥିଲା ବେଳେ ଯୁବ ଗୋଷ୍ଠି ବିପଥଗାମୀ ହେଉଛନ୍ତି । କୋଲକାତା ରୁ ପୁରୀ ପର୍ଯ୍ୟନ୍ତ ଲମ୍ବିଥିବା ନିଶା କରିଡର ମଧ୍ୟ ସ୍ଥଳରେ ଯାଜପୁର ଜିଲ୍ଲା ରହିଛି । ରେଳପଥ ଓ ସଡ଼କ ପଥ ଦେଇ ନିଶା ଦ୍ରବ୍ୟ ଚୋରା ଚାଲାଣ ହେଉଥିଲା ବେଳେ ଚୋରା ଗଞ୍ଜେଇ ଓ ବ୍ରାଉନ ସୁଗାର ଭଳି ମାରାତ୍ମକ ନିଶା ଦ୍ରବ୍ୟ ଯାଜପୁର ଜିଲ୍ଲାର ବିଭିନ୍ନ ସ୍ଥାନରେ ଖୋଲା ମେଲା ଭାବେ ବିକ୍ରି ହେଉଛି । ପ୍ରଥମେ ଏହା ସହରାଞ୍ଚଳରେ ବ୍ୟାପକ ଭାବେ ବିକ୍ରି ହେଉଥିଲା ବେଳେ ଏବେ ଗ୍ରାମାଞ୍ଚଳରେ ପହଞ୍ଚି ସାରିଲାଣି । ନିଶା ବେପାରୀ ନିଜ ବ୍ୟବସାୟର ଜାଲ ଜିଲ୍ଲାର ବିଭିନ୍ନ ସ୍ଥାନରେ ବିଛାଇ ସାରିଲେଣି । ଯୁବ ଗୋଷ୍ଠି ଏବେ ବିଭିନ୍ନ ମାରାତ୍ମକ ନିଶାର ଶିକାର ହୋଇ ସାରିଲେଣି । ଦିନକୁ ଦିନ ଏହି ଜାଲରେ ଅଧିକରୁ ଅଧିକ ଯୁବକ ଧରା ପଡୁଛନ୍ତି । ବିଶେଷ କରି ଛାତ୍ର ମାନଙ୍କୁ ଟାର୍ଗେଟ କରୁଛନ୍ତି ନିଶା ବେପାରୀ । ଆଉ ଥରେ ଏହି ଜାଲରେ ପଡିଲେ ସେଥିରୁ ବାହାରିବାର ବାଟ ପାଉ ନାହାଁନ୍ତି ଏହି ଛାତ୍ର ମାନେ । ବିଭିନ୍ନ ଦୋକାନ ମାନଙ୍କରେ ଗଞ୍ଜେଇ, ଗଞ୍ଜେଇ ଯୁକ୍ତ ସିଗାରେଟ ଖୋଲା ମେଲାରେ ବିକ୍ରି ହେଉଛି । ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ବ୍ରାଉନ ସୁଗାର ମଧ୍ୟ ବିକ୍ରି ହେଉଛି । ଛାତ୍ର ଓ ଯୁବକ ଏହାକୁ ଅନ୍ୟାୟସରେ ନେଇ ସେବନ କରୁଛନ୍ତି । ହେଲେ ଏ ନେଇ ପୋଲିସ ଓ ଅବକାରୀ ବିଭାଗ ନିରବ ଦ୍ରଷ୍ଟା ସାଜି ଆଖି ବୁଜି ଦେଇଥିବାର ଅଭିଯୋଗ କରୁଛନ୍ତି ବୁଦ୍ଧିଜୀବି । ନିଶା କବଳରେ ପଡି ଛାତ୍ର ଓ ଯୁବକ ବାଟ ହୁଡୁଥିଲା ବେଳେ ନିଶା ବେପାରୀ କିନ୍ତୁ ମାଲେମାଲ ହେଉଛନ୍ତି । ଆଉ ଏହି ବ୍ୟବସାୟରୁ ହେଉଥିବା ଲାଭର ସିଂହଭାଗ ପୋଲିସ ଓ ଅବକାରୀ ବିଭାଗର ପକେଟକୁ ଯାଉଥିବାରୁ ଉଭୟ ବିଭାଗ ଚୁପ ରହୁଥିବା ଅଭିଯୋଗ ହେଉଛି ।
ନିଶା ବ୍ୟବସାୟ ପରେ ଏବେ ଜିଲ୍ଲାରେ କାୟା ମେଳାଇଛି ଦେହ ବ୍ୟବସାୟ । ବିଭିନ୍ନ ହୋଟେଲ, ଲଜ ଓ ମଣ୍ଡପ ଗୁଡିକରେ ଦେହ ବ୍ୟବସାୟ ଖୋଲା ମେଲାରେ ଚାଲିଛି। ବିଶେଷ କରି ମଣ୍ଡପ ଗୁଡିକରେ ରହିଥିବା ଲଜ ଗୁଡିକ ଦେହ ବ୍ୟବସାୟର ପେଣ୍ଠସ୍ଥଳ ସାଜିଛି । ଯୁବକ ଯୁବତୀ ମାନେ ଏଠାରେ ବିଭିନ୍ନ ଅନୈତିକ କାର୍ଯ୍ୟରେ ଲିପ୍ତ ରହୁଛନ୍ତି । ବିଶେଷ କରି ଜିଲ୍ଲା ବାହାରୁ ବହୁ ସଂଖ୍ୟାରେ ଯୁବତୀ ଓ ମହିଳା ଆସି ଦେହ ବ୍ୟବସାୟ କରୁଛନ୍ତି । ଏବେ ରାଜ୍ୟ ବାହାରୁ ମଧ୍ୟ ଯୁବତୀ ଓ ମହିଳା ଆସି ଏହି ବ୍ୟବସାୟରେ ସାମିଲ ହେଉଥିବା ଚର୍ଚ୍ଚା ହେଉଛି । ଆଉ ଜିଲ୍ଲାର ଯୁବକ ଓ ମଧ୍ୟ ବୟସ୍କ ଏମାନଙ୍କର ପ୍ରମୁଖ ଗରାଖ ସାଜିଛନ୍ତି । ହୋଟେଲ ଓ ଲଜ ଗୁଡିକ ପ୍ରଭାବଶାଳୀ ବ୍ୟକ୍ତିଙ୍କର ହୋଇଥିବାରୁ ପୋଲିସ ଏହା ଉପରେ ନଜର ଦେଉନଥିବା ଅଭିଯୋଗ ହୋଇଛି । ଏହା ବ୍ୟତିତ ବିଭିନ୍ନ ଥାନା ଅଧିନରେ ଥିବା ହୋଟେଲ ଓ ଲଜ ଗୁଡିକରୁ ପୋଲିସ ମାସିକିଆ ଚାନ୍ଦା ନେଉଥିବା ମଧ୍ୟ ଆଲୋଚନା ହେଉଛି । ଦୁଇଟି କାରଣ ପାଇଁ ପୋଲିସ ନିରବ ବସିବା ଜିଲ୍ଲାରେ ଦେହ ବ୍ୟବସାୟ ସଂପ୍ରସାରଣର ପ୍ରମୁଖ କାରଣ ହୋଇଥିଲା ବେଳେ ଏହା ଐତିହାସିକ, ସାଂସ୍କୃତିକ ଜିଲ୍ଲା ଯାଜପୁର ସୁନାମରେ ଆଞ୍ଚ ଆଣି ସାରିଛି । ଏ ନେଇ ପୋଲିସ ବିନା ଚାପରେ ଦୃଢ଼ ପଦକ୍ଷେପ ନେବା ଜରୁରୀ ହୋଇଛି ।
