ଜିଲ୍ଲାରେ ହଇଜା ସ୍ଥିତି ବେକାବୁ, ନେଡ଼ିଗୁଡ଼ କହୁଣିକୁ ବୋହିବା ପରେ ଚେତୁଛି ପ୍ରଶାସନ

ଓଡ଼ିଶା ଲିଡ୍ସ(ବ୍ୟୁରୋ): ଯାଜପୁର ଜିଲ୍ଲାରେ ହଇଜା ସ୍ଥିତି ବେକାବୁ ହୋଇ ପଡିଛି । କେବଳ ଯାଜପୁର ନୁହେଁ ରାଜ୍ୟର ଅନ୍ୟ ଜିଲ୍ଲା ଗୁଡିକୁ ବ୍ୟାପିଲାଣି ହଇଜା । ଏହି ରୋଗରେ ଆକ୍ରାନ୍ତ ରୋଗୀଙ୍କର ଦୈନିକ ମୃତ୍ୟୁ ହେଉଛି । ଜିଲ୍ଲାରେ ମୃତ୍ୟୁ ସଂଖ୍ୟା ୧୭ରେ ପହଞ୍ଚିଛି । ଯାହା ଚିନ୍ତାର ବିଷୟ ହୋଇଛି । ଦୀର୍ଘ ବର୍ଷ ପରେ ରାଜ୍ୟକୁ ହଇଜା ଫେରିବା ଯେତିକି ଚିନ୍ତାର ବିଷୟ, ଦିନକୁ ଦିନ ଏହା ନିୟନ୍ତ୍ରଣ ବାହାରକୁ ଚାଲିଯିବା ତା ଠାରୁ ଅଧିକ ଚିନ୍ତା ଜନକ ବିଷୟ ହୋଇଛି । ଆଉ ଏକ ଚିନ୍ତାର ବିଷୟ ହେଉଛି ହଇଜା ବ୍ୟାପିବାର ଦୀର୍ଘ ଦିନ ପରେ ଯେତେବେଳେ ନେଡ଼ିଗୁଡ଼ କହୁଣିକୁ ବୋହି ଯିବା ସ୍ଥିତି ଉପୁଜିଛି ସେତିକି ବେଳେ ପ୍ରଶାସନ ପଦକ୍ଷେପ ନେବା ଆରମ୍ଭ କରିଛି । ପ୍ରଥମେ ବରୀ ତହସିଲ ପରେ ବିଂଝାରପୁର, ରସୁଲପୁର ତହସିଲ ପକ୍ଷରୁ ନୋଟିସ ଜାରି କରାଯାଇ ସମସ୍ତ, ହୋଟେଲ, ଢ଼ାବା, ଜଳଖିଆ ଦୋକାନ, ଫାଷ୍ଟଫୁଡ଼ ଦୋକାନ ସହିତ ମାଛ ଚିକେନ୍ ଦୋକାନକୁ ଦୁଇ ସପ୍ତାହ ପାଇଁ ବନ୍ଦ କରାଯାଇଛି । ସହରାଞ୍ଚଳରେ ମଧ୍ୟ ବିଭିନ୍ନ ହୋଟେଲ, ଜଳଖିଆ ଦୋକାନ ଗୁଡିକୁ ବ୍ୟାପକ ଯାଞ୍ଚ କରାଯାଉଛି । କିଛି ଦୋକାନ ଓ ହୋଟେଲକୁ ସିଲ ମଧ୍ୟ କରାଯାଇଛି । ହେଲେ ବର୍ଷ ବର୍ଷ ଧରି ନିରବ ବସି ହୋଟେଲ ଓ ଜଳଖିଆ ଦୋକାନରେ ବାସି ଓ ନିମ୍ନମାନର ଖାଦ୍ୟ ବିକ୍ରୟ କରିବାକୁ ପ୍ରୋତ୍ସାହନ ଦେଉଥିବା ଜନ ସ୍ଵାସ୍ଥ୍ୟ ବିଭାଗ ଏବେ ତତ୍ପର ହୋଇ ଉଠିବା ଦେଖିବାକୁ ମିଳିଛି । ବିଭିନ୍ନ ହୋଟେଲ ଓ ଫାଷ୍ଟ ଫୁଡ଼ ଦୋକାନ ଗୁଡିକରେ ଅତି ନିମ୍ନ ମାନର ଶସ ବର୍ଷ ବର୍ଷ ଧରି ଵ୍ୟଵହାର କରାଯାଉଛି । ଏହା ମାରାତ୍ମକ ପେଟ ରୋଗର କାରଣ ସାଜିଥିଲା ବେଳେ ଏଥି ପ୍ରତି କେବେ କାହାର ନଜର ନାହିଁ । ପୂର୍ବରୁ ଏହି ବିଭାଗ ଅଧିକାରୀ ମାନେ ନିଜ କାର୍ଯ୍ୟାଳୟ ରେ ବସି ରହୁଥିଲେ କାହିଁକି ବୋଲି ସାଧାରଣରେ ପ୍ରଶ୍ନ ଉଠିଛି । ଜିଲ୍ଲାରେ ହଇଜା ବ୍ୟାପି ଚାଲିବା ବେଳେ ମଧ୍ୟ ଏହି ବିଭାଗ ନୀରବରେ ହାତ ବାନ୍ଧି ବସିଥିଲା । ହେଲେ ସ୍ଥିତି ଯେତେ ବେଳେ ଅଣାୟତ ହେଲା ଏହି ବିଭାଗର ନିଦ ଭାଙ୍ଗିଲା । ଜିଲ୍ଲା ପ୍ରଶାସନ ଅଧୀନରେ ଥିବା ଏହି ବିଭାଗ ବିଭିନ୍ନ ହୋଟେଲ ଓ ଢ଼ାବା ପ୍ରତି କେବେ ନଜର ନଦେଇ ବରଂ ନିମ୍ନମାନର ଖାଦ୍ୟ ବ୍ୟବସାୟକୁ ପ୍ରୋତ୍ସାହନ ଦେଉଥିଲା । ଜିଲ୍ଲାରେ ବ୍ୟାପୁଥିବା ହଇଜା ପଛରେ ହୋଟେଲ, ଢ଼ାବା, ଜଳଖିଆ ଦୋକାନ ଓ ଫାଷ୍ଟ ଫୁଡ଼ ଦୋକାନର ଗୁରୁତ୍ୱପୂର୍ଣ୍ଣ ଭୂମିକା ଥିଲା ବେଳେ ଏମାନଙ୍କୁ ଖୋଲା ଛାଡିଥିବା ଅଧିକାରୀଙ୍କ ବିରୁଦ୍ଧରେ ସରକାର ପଦକ୍ଷେପ ନ ନେବା ଜରୁରୀ ବୋଲି ବୁଦ୍ଧିଜୀବି ମତ ଦେଇଛନ୍ତି ।