ସ୍ବର୍ଗତ ମଦନ ମୋହନ ସ୍ୱାଇଁଙ୍କ ୮୪ ତମ ଜୟନ୍ତୀ ଅବସରର ଆଲୋଚନା ଚକ୍ର

ଓଡ଼ିଶା ଲିଡ୍ସ(ଯାଜପୁର): ଯାଜପୁର ଜିଲ୍ଲା ଟ୍ୟାକ୍ସ ବାର ଆସୋସିଏସନ ତରଫରୁ ସ୍ୱର୍ଗତଃ ମଦନ ମୋହନ ସ୍ୱାଇଁଙ୍କ ୮୪ତମ ଜନ୍ମ ଜୟନ୍ତୀ ବ୍ୟାସଦେବ ଟାଉନ ହଲରେ ପାଳିତ ହୋଇ ଯାଇଛି । ଏହି ଅବସରରେ ଏକ ଆଲୋଚନା ଚକ୍ର ମଧ୍ୟ ଅନୁଷ୍ଠିତ ହୋଇଯାଇଛି । “ବିକଶିତ ଓଡ଼ିଶା ୨୦୩୬ : ସ୍ବପ୍ନ ଓ ବାସ୍ତବତା ଏବଂ ଗଣ ସଙ୍ଗଠନର ଭୂମିକା ” ଶୀର୍ଷକ ଆଲୋଚନା ଚକ୍ର ଆସୋସିଏସନର ସଭାପତି ବିବେକାନନ୍ଦ ମହାନ୍ତିଙ୍କ ପୌରହିତ୍ୟରେ ଅନୁଷ୍ଠିତ ହୋଉଥିଲା । ଆଲୋଚନା ଚକ୍ରକୁ କୋରାଇ ବିଧାୟକ ଆକାଶ ଦାସନାୟକ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ସେ ନିଜ ବକ୍ତବ୍ୟରେ କହିଥିଲେ ସମସ୍ତଙ୍କ ସହଯୋଗରେ ବିକଶିତ ଓଡ଼ିଶା, ୨୦୩୬ର ସ୍ବପ୍ନ ବାସ୍ତବରେ ପରିଣତ ହେବ । ସମସ୍ତଙ୍କ ସହଯୋଗରେ ବିଶେଷ କରି ଯୁବକ ଓ ଛାତ୍ର ବର୍ଗଙ୍କ ଉଦ୍ୟମରେ ହେବ ବୋଲି ପ୍ରକାଶ କରିଥିଲେ ଏବଂ ସମାଜରେ ଭାଇଚାରା, ପରସ୍ପର ଭଲ ପାଇବା ଭୟ ନ ରହିଲେ ରାଜ୍ୟର ପ୍ରକୃତ ବିକାଶ ସମ୍ଭବ ହେବ ବୋଲି ମତ ଦେଇଥିଲେ । ଆଲୋଚନା ଚକ୍ରରେ ମୁଖ୍ୟ ଅତିଥି ଭାବେ ପୂର୍ବତନ ଅର୍ଥମନ୍ତ୍ରୀ ତଥା ବରିଷ୍ଠ ରାଜନେତା ପ୍ରଫୁଲ୍ଲ ଚନ୍ଦ୍ର ଘଡ଼ାଇ ଯୋଗଦେଇ ଟ୍ୟାକ୍ସ ବାର ଆସୋସିଏସନର ବିଭିନ୍ନ ସମାଜସେବା ମୂଳକ କାର୍ଯ୍ୟକୁ ଭୁୟସୀ ପ୍ରଶଂସା କରିଥିଲେ । ଓଡ଼ିଶାରୁ ବେରୋଜଗାର, ବେକାରୀ, ଶିଶୁ ମହିଳା ମୃତ୍ୟୁ, ଅନାହାର ମୃତ୍ୟୁ, ବନ୍ଦ ହୋଇପାରିଲେ ପ୍ରକୃତ ବିକାଶ ସମ୍ଭବ ହେଇପାରିବ ବୋଲି ମତ ଦେଇଥିଲେ । ବିଗତ ୨୦ ବର୍ଷରେ ରାଜ୍ୟରେ ପ୍ରଭୁତ ବିକାଶ ସମ୍ଭବ ହୋଇଥିଲେ ମଧ୍ୟ ଆମେ ବିକାଶଶୀଳ ଅବସ୍ଥାରେ ଅଛୁ, ବିକଶିତ ହେବକୁ ହେଲେ ସ୍ଥାନୀୟ ନିଯୁକ୍ତି ସହିତ ପ୍ରାକୃତିକ ସମ୍ପଦକୁ ପ୍ରକୃତ ବିନିଯୋଗ କରି ଛୋଟ ଛୋଟ ଶିଳ୍ପ ପ୍ରତିଷ୍ଠା କଲେ ଏହା ସମ୍ଭବ ହେଇପାରିବ ବୋଲି ମତ ଦେଇଥିଲେ । ମୁଖ୍ୟବକ୍ତା ଭାବେ ଇଷ୍ଟର୍ନ ମିଡ଼ିଆ ଲିମିଟେଡ଼ ତଥା ଆମ ଓଡ଼ିଶା ଓ ସମ୍ବାଦ ପରିବାରର ମୁଖ୍ୟ ସୌମ୍ୟ ରଞ୍ଜନ ପଟ୍ଟନାୟକ ଯୋଗଦେଇ ସରକାରଙ୍କର ଦୃଢ଼ ଇଚ୍ଛା ଶକ୍ତି ବଳରେ ହିଁ ଓଡ଼ିଶା ବିକଶିତ ହେଇପାରିବ ବୋଲି ମତ ଦେଇଥିଲେ । ସମ୍ମାନିତ ଅତିଥି ଭାବେ ପାଟଣା ବିଧାୟକ ଅଖିଳ ଚନ୍ଦ୍ର ନାୟକ ଯୋଗଦେଇ କେନ୍ଦୁଝର ଜିଲ୍ଲା ଯାଜପୁର ଜିଲ୍ଳା ଉପରେ ନିର୍ଭରଶୀଳ ଏବଂ ଯାଜପୁର ଜିଲ୍ଳା କେନ୍ଦୁଝର ଜିଲ୍ଲା ଉପରେ ନିର୍ଭରଶୀଳ, କେନ୍ଦୁଝର ଯାଜପୁର ଭଳି ଦୁଇ ଜିଲ୍ଲା ଅଙ୍ଗାଙ୍ଗି ଭାବରେ ଜଡ଼ିତ ବୋଲି ମତ ଦେଇଥିଲେ । ମୋହନ ସରକାର ଓଡ଼ିଶାକୁ ସମ୍ପୂର୍ଣ୍ଣ ବିକଶିତ କରିବା ପାଇଁ ବଦ୍ଧ ପରିକର ବୋଲି ପ୍ରକାଶ କରିଥିଲେ । ଅତିରିକ୍ତ କମିଶନର ସତ୍ୟ ନାରାୟଣ ପଣ୍ଡା ଯୋଗଦେଇ ଟିକସ ଆଦାୟରେ ଜଣା ପଡ଼େ ଅଞ୍ଚଳ ତଥା ରାଜ୍ୟ କେତେ ବିକଶିତ । ଯାଜପୁର ରେଞ୍ଜ ଓଡିଶାରେ ଟିକସ ଆଦୟରେ ୨ୟ ସ୍ଥାନ ହାସଲ କରିଥିବାରୁ ଏହା ଆମ ପାଇଁ ଖୁସିର କଥା ବୋଲି କହିଥିଲେ । ସମ୍ପାଦକ ଧନେଶ୍ଵର ବାରିକ ସଂପାଦକୀୟ ବିବରଣୀ ପାଠ କରିଥିଲା ବେଳେ ମଞ୍ଚ ପରିଚାଳନା କରିଥିଲେ ଉପସଭାପତି ସସ୍ମିତା ସ୍ୱାଇଁ । ଯୁଗ୍ମ ସମ୍ପାଦକ ଅଶୋକ କୁମାର ଶର୍ମା ଧନ୍ୟବାଦ ଜ୍ଞାପନ କରିଥଲେ। ସଭାରେ ବିଭିନ୍ନ ପ୍ରତିଭା ସମ୍ପନ୍ନ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରାଯାଇଥିଲା।