ଓଡ଼ିଶା ଲିଡ୍ସ(ବ୍ୟୁରୋ): ଆଜି ପୂର୍ବତନ ମୁଖ୍ୟମନ୍ତ୍ରୀ ତଥା ଵିରୋଧି ଦଳ ନେତା ନବୀନ ପଟ୍ଟନାୟକ ୭୯ ବର୍ଷରେ ପାଦ ଦେଇଛନ୍ତି। ନିଜର ନିଆରା ମଣିଷ ପଣିଆ ଓ ଭିନ୍ନ ରାଜନୀତି ପାଇଁ ସବୁବେଳେ ଚର୍ଚ୍ଚାରେ ରହୁଥିବା ନବୀନଙ୍କୁ ଏହି ଅବସରରେ ଶୁଭେଚ୍ଛାର ସୁଅ ଛୁଟିଛି ।
୧୯୪୬ ମସିହା ଅକ୍ଟୋବର ମାସ ୧୬ ତାରିଖରେ ନବୀନ ଜନ୍ମଗ୍ରହଣ କରିଥିଲେ। ଯୁବାବସ୍ଥାରେ ରାଜନୀତିରେ ରୁଚି ରଖୁ ନଥିବା ନବୀନ ବାପା ବିଜୁ ପଟ୍ଟନାୟକଙ୍କ ଦେହାନ୍ତ ପରେ ରାଜନୀତିରେ ପ୍ରବେଶ କରିଥିଲେ । ୧୯୯୭ରେ ବିଜୁ ପଟ୍ଟନାୟକଙ୍କ ଦେହାନ୍ତ ପରେ ସେ ଲୋକସଭା ନିର୍ବାଚନ ଲଢ଼ିଥିଲେ। ପରବର୍ତ୍ତୀ ସମୟରେ ବିଜେଡି ଗଠନ ହେଲା ପରେ ସେ ଦକର ସଭାପତି ହୋଇଥିଲେ । ରାଜନୀତିକୁ ପ୍ରବେଶ କରିବା ୨୯ ବର୍ଷ ହୋଇଗଲାଣି। ୨୯ ବର୍ଷ ମଧ୍ୟରୁ ୨୫ ବର୍ଷରୁ ଅଧିକ ସମୟ ଧରି ନବୀନ କ୍ଷମତାରେ ରହିଛନ୍ତି। ପ୍ରଥମେ କେନ୍ଦ୍ର ମନ୍ତ୍ରୀ ଥିଲା ବେଳେ ୨୦୦୦ ମସିହାରେ ଓଡ଼ିଶାରେ ବିଜେଡି-ବିଜେପି ମେଣ୍ଟ ଓଡ଼ିଶାରେ କଂଗ୍ରେସକୁ ହଟାଇ କ୍ଷମତାକୁ ଆସିଥିଲା । ମେଣ୍ଟ ସରକାରରେ ମୁଖ୍ୟମନ୍ତ୍ରୀ ଭାବେ ଦାୟିତ୍ବ ଗ୍ରହଣ କରିଥିଲେ ନବୀନ ପଟ୍ଟନାୟକ । ଏହା ପରେ ବିଭିନ୍ନ କାରଣ କୁ ନେଇ ବିଜେପି ସହିତ ମେଣ୍ଟ ଭାଙ୍ଗି ଯାଇଥିଲା । ହେଲେ ନିଜ ନେତୃତ୍ୱ ବଳରେ ବିଜେଡିକୁ ରାଜ୍ୟରେ ତିନି ଥର କ୍ଷମତାସୀନ କରାଇଥିଲେ ନବୀନ । ତାଙ୍କ ସମ୍ମୁଖରେ କଂଗ୍ରେସ ଓ ବିଜେପି ସଫଳ ପ୍ରଦର୍ଶନ କରି ପାରିନଥିଲା । ଏହି ସମୟରେ ନବୀନ ରାଜ୍ୟ ତଥା ଦେଶରେ ଜଣେ ଚର୍ଚ୍ଚିତ ନେତା ଭାବେ ନିଜର ପରିଚୟ ସୃଷ୍ଟି କରିଥିଲେ । ୨୪ ବର୍ଷ ଧରି ଲଗାତାର ଭାବେ ଓଡ଼ିଶାର ମୁଖ୍ୟମନ୍ତ୍ରୀ ପଦବିରେ ରହି ରେକର୍ଡ କରିଛନ୍ତି ନବୀନ ।
ଏହା ସହିତ ଦୀର୍ଘ ବର୍ଷ ଧରି ମୁଖ୍ୟମନ୍ତ୍ରୀ ରହିବାରେ ସେ ଦେଶରେ ଦ୍ବିତୀୟ ମୁଖ୍ୟମନ୍ତ୍ରୀ ଭାବେ ରେକର୍ଡ କରିଛନ୍ତି । ଓଡ଼ିଆ ନ ଜାଣିବାର ଅପବାଦ ସହିତ ଲୋକଙ୍କ ସହ ସିଧାସଳଖ ସମ୍ପର୍କରେ ନ ରହିବା ପରେ ମଧ୍ୟ ସେ ରାଜ୍ୟର ସର୍ବାଧିକ ଲୋକପ୍ରିୟ ନେତା ହୋଇ ପାରିଛନ୍ତି । ନିର୍ବାଚନୀ ରାଜନୀତିରେ ତାଙ୍କ ଚତୁର ଗୋଟି ଚାଳନା ବିରୋଧୀଙ୍କୁ ବିଭିନ୍ନ ସମୟରେ ଧୂଳି ଚଟାଇବାରେ ସକ୍ଷମ ହୋଇଛି । ତାଙ୍କ ରଣନୀତି ଆଗରେ ଵିରୋଧି ଉପାୟଶୂନ୍ୟ ହୋଇ ପଡିଛନ୍ତି । ତାଙ୍କ ନେତୃତ୍ୱରେ ପଞ୍ଚାୟତ ନିର୍ବାଚନ, ପୌର ନିର୍ବାଚନ, ବିଧାନସଭା ନିର୍ବାଚନ ସହିତ ବିଭିନ୍ନ ଉପନିର୍ବାଚନ ଗୁଡିକରେ ବିଜେଡି ଈର୍ଷଣୀୟ ସଫଳତା ପାଇଥିଲା । ତାଙ୍କ ସମୟରେ ବହୁ ନୂତନ ନେତାଙ୍କ ଅଭ୍ୟୁଥାନ ହୋଇଥିଲା ବେଳେ ବହୁ ଆଗଧାଡ଼ିର ନେତାଙ୍କ ରାଜନୀତି ଶେଷ ମଧ୍ୟ ହୋଇ ଯାଇଛି ।
ହେଲେ ଗତ ସାଧାରଣ ନିର୍ବାଚନରେ ଦଳ ଆବଶ୍ୟକ ସଂଖ୍ୟା ଗରିଷ୍ଠତା ହାସଲ କରିବାରେ ସକ୍ଷମ ହୋଇ ନଥିଲା । ଫଳରେ ନବୀନ କ୍ଷମତାଚ୍ୟୁତ ହୋଇଥିଲେ । ବିଜେପି ରାଜ୍ୟରେ କ୍ଷମତା ହାସଲ କରିଥିଲା । କ୍ଷମତାରେ ଥିଲା ବେଳେ ଓ କ୍ଷମତାରୁ ଗଲା ପରେ ବି ତାଙ୍କ ମଧ୍ୟରେ ସେଭଳି କିଛି ପରିବର୍ତ୍ତନ ଦେଖିବାକୁ ମିଳିନାହିଁ । ଦଳ ମଧ୍ୟରେ ତାଙ୍କ ନେତୃତ୍ୱ ପ୍ରତି ଲେସ ମାତ୍ର ବିରୋଧ ଦେଖିବାକୁ ମିଳିନାହିଁ । କେବଳ ନିଜ ଦଳ ନୁହେଁ ଅନ୍ୟ ଦଳର ନେତାମାନଙ୍କର ତାଙ୍କ ପ୍ରତି ସମ୍ମାନ ବୋଧ ବାରି ହୋଇପଡେ ।
୨୦୨୪ ନିର୍ବାଚନରେ ବିଜେଡି ପରାଜିତ ହେଲା ପରେ ପରେ ଭି. କେ. ପାଣ୍ଡିଆନଙ୍କ ପ୍ରତି ତାଙ୍କର ଅହେତୁକ ଦୁର୍ବଳତାକୁ ନେଇ ଅସନ୍ତୋଷ ସୃଷ୍ଟି ହୋଇଛି । ସ୍ବାସ୍ଥ୍ୟଗତ କାରଣରୁ ସେ ବିଭିନ୍ନ କାର୍ଯ୍ୟକ୍ରମରେ ଆଉ ବେଶି ଯୋଗଦେଉ ନଥିଲା ବେଳେ କିଛିଦିନ ଧରି ବିଭିନ୍ନ ଚିକିତ୍ସାଳୟରେ ଚିକିତ୍ସିତ ହୋଇଛନ୍ତି । ଏବେ ବି ସେ ବିଜେଡିର ସର୍ବମାନ୍ୟ ନେତା । ଦଳରେ ତାଙ୍କ ନେତୃତ୍ବ ଓ ତାଙ୍କ ନିଷ୍ପତ୍ତି ଆଜିବି ଶେଷ ନିଷ୍ପତି ହୋଇ ରହିଛି । ଆଜିର ଶୁଭ ଜନ୍ମ ଦିନରେ ରାଜ୍ୟବାସୀ ଦଳ ମତ ନିର୍ବିଶେଷରେ ତାଙ୍କ ସୁସ୍ଥ ଓ ନିରାମୟ ଜୀବନ ପାଇଁ ଶୁଭ ମନାସୀଛନ୍ତି ।
