ବିକାଶକୁ ଛାଡି ଗୁଣ୍ଡାଗର୍ଦ୍ଦି କରୁଛି ବିଜେପି, ପୋଲିସ ଏଠି ରକ୍ଷକ ଭେଷରେ ଭକ୍ଷକ ସାଜିଛି-ଇଂ ପ୍ରୀତିରଞ୍ଜନ ଘଡାଇ

ଓଡ଼ିଶା ଲିଡ୍ସ(ବ୍ୟୁରୋ): ଧର୍ମଶାଳା ନିର୍ବାଚନ ମଣ୍ଡଳୀରେ ବିଜେପି କର୍ମୀଙ୍କ ଆକ୍ରମଣରେ ବିଜେଡି କର୍ମୀ ଆହତ ହେବା ଘଟଣା ରାଜ୍ୟ ରାଜନୀତିକୁ ସରଗରମ କରିଥିଲା ବେଳେ ଏହାକୁ ନେଇ ମୁହଁ ଖୋଲିଛନ୍ତି ପୂର୍ବତନ ମନ୍ତ୍ରୀ ତଥା ବିଜୁ ଜନତା ଦଳର ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇ ।ଇଂ ଘଡାଇ କହିଛନ୍ତି ବିଜୁ ଜନତା ଦଳ ସରକାର ସମୟରେ ଯାଜପୁର ଜିଲ୍ଲାର ବ୍ୟାପକ ବିକାଶ ସାଧିତ ହୋଇଥିଲା । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ନିର୍ବାଚିତ ଲୋକ ପ୍ରତିନିଧି ମାନେ ନିଜ ଅଞ୍ଚଳରେ କିଭଳି ବିକାଶ ହେବ ସେଥିପ୍ରତି ବିଶେଷ ଦୃଷ୍ଟି ଦେଉଥିଲେ । ରାସ୍ତା ଘାଟ ଠାରୁ ଆରମ୍ଭ କରି ସ୍କୁଲ କଲେଜ, ମେଡ଼ିକାଲ ସବୁଠାରେ ବିକାଶ କାର୍ଯ୍ୟ ତ୍ୱରାନ୍ୱିତ ହୋଇଥିଲା । ଯାହାର ସୁଫଳ ସାଧାରଣ ଲୋକମାନେ ପାଉଥିଲେ । ହେଲେ ବିଜେପି ସରକାର ଆସିବା ପରେ ଏହି ଚିତ୍ରରେ ବ୍ୟାପକ ପରିବର୍ତ୍ତନ ଦେଖିବାକୁ ମିଳିଛି । ସରକାର ପରିବର୍ତ୍ତନ ପରେ ବିକାଶ କାର୍ଯ୍ୟରେ ଏକ ପ୍ରକାର ତାଲା ଲାଗି ଯାଇଛି । ନୂଆ ପ୍ରକଳ୍ପ ଦୂରେ ଥାଉ ପୁରୁଣା ପ୍ରକଳ୍ପର ଅଗ୍ରଗତି ମଧ୍ୟ ହୋଇ ପାରୁନାହିଁ । ହେଲେ ବିଜେପିର କିଛି କର୍ମୀ ବେଶ ଉତ୍ଶୃଙ୍ଖଳ ଆଚରଣ ଦେଖାଉଛନ୍ତି । ବିଜେଡି କର୍ମୀଙ୍କ ଉପରେ ଅମାନୁଷିକ ଆକ୍ରମଣ କରୁଛନ୍ତି । ଏହି ଧାରା ସୁକିନ୍ଦାରୁ ଆରମ୍ଭ ହୋଇ ଏବେ ଧର୍ମଶାଳାରେ ପହଞ୍ଚିଛି । ଏ ନେଇ ବାରମ୍ବାର ଅଭିଯୋଗ ହେଲେ ମଧ୍ୟ ଜିଲ୍ଲା ପୋଲିସ ଅପରାଧୀଙ୍କ ବିରୁଦ୍ଧରେ ପଦକ୍ଷେପ ନେବା ବଦଳରେ ନିରବ ବସୁଛି । ଜିଲ୍ଲାର ସମସ୍ତ ଥାନା ଏବେ ବିଜେପି କାର୍ଯ୍ୟାଳୟରେ ପରିଣତ ହୋଇଛି । ପୋଲିସ ଏଠି ରକ୍ଷକ ଭେଷରେ ଭକ୍ଷକ ସାଜିଛି । ପୋଲିସର ନୀରବତା ବିଜେପିର ଗୁଣ୍ଡାଙ୍କୁ ଅଧିକ ଉତ୍ସାହିତ କରୁଛି । ସାଧାରଣ ଲୋକଙ୍କୁ ସବୁ ସମୟରେ ଧମକ ଦିଆଯାଉଛି । ଏହାର ପ୍ରତିବାଦ କଲେ ବିଜେପି କର୍ମୀ ମରଣାତ୍ମକ ଆକ୍ରମଣ କରି ଆତଙ୍କ ଖେଳାଉଛନ୍ତି । ବିଜେପି କର୍ମୀଙ୍କ ଆକ୍ରମଣରୁ ମହିଳା ମାନେ ମଧ୍ୟ ବର୍ତ୍ତୁ ନାହାନ୍ତି । ଏବେ ମହିଳା ମାନେ ଅସୁରକ୍ଷିତ ହୋଇ ପଡିଛନ୍ତି । ଯାଜପୁର ଜିଲ୍ଲାରେ ଆଇନ ଶୃଂଖଳା ସମ୍ପୂର୍ଣ୍ଣ ଭୁଶୁଡି ପଡିଛି । ମାନ୍ୟବର ମୁଖ୍ୟମନ୍ତ୍ରୀ ନିଜକୁ ଲୋକ ସରକାରର ଲୋକ ମୁଖ୍ୟମନ୍ତ୍ରୀ କହୁଥିଲା ବେଳେ ତାଙ୍କ ଅଧିନରେ ଥିବା ଗୃହ ବିଭାଗରେ ନିଷ୍କ୍ରିୟତା ଦେଖା ଦେଇଛି । ଅପରାଧୀ ଅପରାଧ କରି ଖୋଲା ବୁଲୁଥିଲା ବେଳେ ପୋଲିସ କୌଣସି ପଦକ୍ଷେପ ନେଉନାହିଁ । ଏଭଳି ସ୍ଥିତି ଜାରି ରହିଲେ ରାଜ୍ୟରେ ଆଗକୁ ବିସ୍ପୋରକ ପରିସ୍ଥିତି ସୃଷ୍ଟି ହେବ ।