ଓଡ଼ିଶା ଲିଡ୍ସ(ଯାଜପୁର): ଯାଜପୁରର ଏକ ଘରୋଇ ଚିକିତ୍ସାକୟ ଜୀବନ ଜ୍ୟୋତି ହସ୍ପିଟାଲରେ ମାତ୍ର କିଛିଦିନ ମଧ୍ୟରେ ଦୁଇଜଣ ପ୍ରସୂତି ଭୁଲ ଚିକିତ୍ସା ଯୋଗୁ ମୃତ୍ୟୁ ବରଣ କରିଛନ୍ତି । ଯାହାକୁ ନେଇ କେବଳ ମୃତକଙ୍କ ପରିବାର କି ସମ୍ପର୍କୀୟ ନୁହଁନ୍ତି ସାଧାରଣରେ ମଧ୍ୟ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ଆଜି ଏହି ପ୍ରତିକ୍ରିୟା ତୀବ୍ର ହୋଇଥିଲା ବେଳେ ପ୍ରଶାସନ ଚାପରେ ପଡି ଏହି ଚିକିତ୍ସାଳୟକୁ ସିଲ କରିବାକୁ ବାଧ୍ୟ ହୋଇଛି ।
ହେଲେ କେଉଁ ଭୁଲ ଚିକିତ୍ସା କାରଣରୁ ଦୁଇ ପ୍ରସୂତୀଙ୍କ ମୃତ୍ୟୁ ହେଲା ତାର ସଠିକ ତଦନ୍ତ ହେବା ଜରୁରୀ ବୋଲି ସାଧାରଣରେ ମତ ପ୍ରକାଶ ପାଇଛି । ଡାକ୍ତର ଜଣକ କାହିଁକି ସରକାରୀ ଡାକ୍ତରଖାନାରେ ଚାକିରୀ କରି ରୋଗୀଙ୍କୁ ଏହି ଚିକିତ୍ସାଳୟ ଯିବାକୁ କହିଥିଲେ ତାର ମଧ୍ୟ ତଦନ୍ତ ହୋଇ ସମ୍ପୃକ୍ତ ଡାକ୍ତରଙ୍କ ବିରୁଦ୍ଧରେ ଦୃଷ୍ଟାନ୍ତ ମୂଳକ ପଦକ୍ଷେପ ନେବାକୁ ଦାବି ହୋଇଛି । ଏହା ସହିତ ସମ୍ପୃକ୍ତ ଚିକିତ୍ସାଳୟର ମାଲିକଙ୍କ ବିରୁଦ୍ଧରେ ମଧ୍ୟ ପଦକ୍ଷେପ ନେବାକୁ ଦାବି ହୋଇଛି । କେବଳ ସିଲ କରି ପ୍ରଶାସନ ଦାୟିତ୍ୱ ନ ସାରିଦେଇ ଉଚିତ ତଦନ୍ତ କରିବାକୁ ବିଭିନ୍ନ ମହଲରେ ଦାବି ହେଉଛି । କେବଳ ଏହି ଚିକିତ୍ସାଳୟ ନୁହେଁ ସହରରେ ଗଢି ଉଠିଥିବା ବିଭିନ୍ନ ଘରୋଇ ଚିକିତ୍ସାଳୟର ମଧ୍ୟ ତଦନ୍ତ କରିବାକୁ ଦାବି ହେଉଛି । ଏ ନେଇ ମୁଖ୍ୟମନ୍ତ୍ରୀ ଓ ସ୍ୱାସ୍ଥ୍ୟମନ୍ତ୍ରୀ ଦୃଷ୍ଟି ଦେବାକୁ ଦାବି ହୋଇଛି ।
