ଓଡ଼ିଶା ଲିଡ୍ସ(ବ୍ୟୁରୋ) : ଆଘାତ ସମସ୍ୟାରୁ ମୁକୁଳି ଅନ୍ତର୍ଜାତୀୟ କ୍ରିକେଟ୍କୁ ଫେରିଥିବା ମଧ୍ୟକ୍ରମ ବ୍ୟାଟର ଶ୍ରେୟାସ ଆୟର ଆଉ ୩୪ ରନ ସଂଗ୍ରହ କରିଲେ କୋହଲି ଓ ଶିଖର ଧାୱନଙ୍କ ରେକର୍ଡ ଭାଙ୍ଗିବେ । ଶ୍ରେୟାସ ୬୮ଟି ଏକଦିବସୀୟ ପାଳିରୁ ୪୭.୮୩ ହାରରେ ୨୯୬୬ ରନ୍ କରିସାରିଛନ୍ତି । ନ୍ୟୁଜିଲାଣ୍ଡ ବିରୁଦ୍ଧ ପ୍ରଥମ ଦିନିକିଆରେ ୪୯ ରନ୍ର ପାଳି ଖେଳି ନିଜ ଫର୍ମର ପରିଚୟ ଦେଇଥିବା ଶ୍ରେୟାସ ଦ୍ୱିତୀୟ ଦିନିକିଆରେ ଏହି ରେକର୍ଡ ଛୁଇଁବେ ବୋଲି ତାଙ୍କ ପ୍ରଶଂସକ ଦୃଢ଼ ଆଶା ବାନ୍ଧିଛନ୍ତି । ଏହି ମ୍ୟାଚ୍ରେ ୩୪ ରନ୍ କରିପାରିଲେ ଧାୱନ ଓ କୋହଲିଙ୍କୁ ପଛରେ ପକାଇ ୩,୦୦୦ ଦିନିକିଆ ରନ୍ କରିବାରେ ଦ୍ରୁତତମ ଭାରତୀୟ ହେବାର ଗୌରବ ଅର୍ଜନ କରିବେ ସେ ।
ଦିନିକିଆରେ ଦ୍ରୁତତମ ୩,୦୦୦ ରନ୍ କରିବାର ଭାରତୀୟ ରେକର୍ଡ ଏବେ ଶିଖର ଧାୱନଙ୍କ ନାଁରେ ରହିଛି । ସେ ୭୨ ଏକ ଦିବସିୟ ପାଳିରୁ ୩୦୦୦ ରନ ସଂଗ୍ରହ କରିଥିଲେ । ଅନ୍ୟପକ୍ଷରେ କୋହଲି ଏହି ରେକର୍ଡ କରିବାକୁ ୭୫ ପାଳି ନେଇଥିଲେ । ଆୟର ଯଦି ବୁଧବାର ଏହି ରେକର୍ଡ ହାସଲ କରନ୍ତି, ତାହେଲେ ୩,୦୦୦ ଦିନିକିଆ ରନ୍ କରିବାରେ ୱେଷ୍ଟଇଣ୍ଡିଜ୍ର କିମ୍ୱଦନ୍ତି କ୍ରିକେଟର୍ ଭିଭିଆନ୍ ରିଚାର୍ଡସଙ୍କ ସହ ସେ ବିଶ୍ୱର ଚତୁର୍ଥ ଦ୍ରୁତତମ ଖେଳାଳି ହେବେ ।
