ସରକାରଙ୍କ ଘୁଟକା ବନ୍ଦ ପ୍ରହସନ: ସବୁ ଦୋକାନରେ ଅଧିକ ମୂଲ୍ୟରେ ହେଉଛି ବିକ୍ରି

ଓଡ଼ିଶା ଲିଡ୍ସ(ଯାଜପୁର): ନିକଟରେ ସରକାର ସାରା ରାଜ୍ୟରେ ଘୁଟକା ଓ ପାନ ମସଲା ବ୍ୟାନ କରିଥିଲେ । ପରେ ଏଥିରେ ପରିବର୍ତ୍ତନ କରି ପାନ ମସଲା ବିକ୍ରି ହୋଇ ପାରିବ ବୋଲି ଘୋଷଣା କଲେ । ହେଲେ ଯିଏ ଘୁଟକା ବିକ୍ରି କରିବ ଓ ଖାଇବ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତାଗିଦ କଲେ । ହେଲେ ସରକାରଙ୍କ ଏହି ଘୋଷଣା ପ୍ରହସନରେ ପରିଣତ ହୋଇଛି । ସରକାରଙ୍କ ତାଗିଦ ପରେ ଘୁଟକା ବିକ୍ରି ତ ବନ୍ଦ ହେଲା ନାହିଁ ବରଂ ଏହାର ମୂଲ୍ୟ ବୃଦ୍ଧି ହେଲା । ସମସ୍ତ ଦୋକାନରେ ଏବେ ଘୁଟକା ଖୋଲା ମେଲାରେ ବିକ୍ରି ହେଉଥିଲା ବେଳେ ଯେଉଁ ଘୁଟକାର ମୂଲ୍ୟ ୫ ଟଙ୍କା ଥିଲା ତାହା ଏବେ ୭ରୁ ୮ ଟଙ୍କାରେ ବିକ୍ରି ହେଉଛି । ଅସାଧୁ ବ୍ୟବସାୟୀ ଘୁଟକା ବନ୍ଦକୁ ଆଳ କରି ଏହାକୁ ଚଢା ମୂଲ୍ୟରେ ବିକ୍ରି କରୁଛନ୍ତି । କୌଣସି ସରକାରୀ ଅଧିକାରୀ କିମ୍ବା ପୋଲିସ ଆଉ କୌଣସି ଦୋକାନରେ ଚଢ଼ାଉ କରିବାର ଦେଖିବାକୁ ମିଳୁନାହିଁ । ସ୍ଥିତି ଯଥା ପୂର୍ବ ତଥା ପର ହୋଇ ଯାଇଛି । କିଛି ବ୍ୟକ୍ତି ଏ ନେଇ ମତ ଦେଇ କହିଛନ୍ତି ସରକାର ଘୁଟକା ବନ୍ଦ ନାମରେ କେବଳ ପ୍ରହସନ କରୁଛନ୍ତି । ଯାହା ଅସାଧୁ ବ୍ୟବସାୟୀଙ୍କୁ ଲାଭ ପହଞ୍ଚାଇଛି ।