*କୁସୁମାରୁ ବିଶାଳ ରାଲି କଲା ବିଜେଡି
*ହଜାର ହଜାର ବିଜେଡି କର୍ମୀଙ୍କ ସହିତ ଚାଷୀ ସାମିଲ
*ଏକତ୍ରିତ ହେଲେ ବିଜେଡି ନେତା
ଓଡ଼ିଶା ଲିଡ୍ସ(ଯାଜପୁର): ରାଜ୍ୟ ସରକାରଙ୍କ ଚାଷୀ ମାରଣ ନୀତିରେ ସାରା ରାଜ୍ୟର ଚାଷୀଙ୍କ ଭିତରେ ତୀବ୍ର ଅସନ୍ତୋଷ ଦେଖା ଦେଇଛି । ସରକାର ନିଜର ପ୍ରତିଶୃତି ପାଳନ କରି ଧାନର ଉଚିତ ମୂଲ୍ୟ ପ୍ରଦାନ କରିବାରେ ଅକ୍ଷମ ହୋଇଛନ୍ତି । ବିଜେପି ସରକାର ସମୟରେ ରାଜ୍ୟର ଆଇନ ଶୃଂଖଳା ପରିସ୍ଥିତି ବିଗିଡି ଯାଇଛି । ଏହା ସହିତ ଜିଲ୍ଲାର ଖଣିଜ ପଦାର୍ଥ ବ୍ୟାପକ ଭାବେ ଲୁଟ ହୋଇ ଚାଲିଥିଲା ବେଳେ ଜିଲ୍ଲା ପ୍ରଶାସନ ନିରବ ହୋଇ ବସିଛି । ଏହାର ପ୍ରତିବାଦରେ ଆଜି ବିଜେଡି ପକ୍ଷରୁ ଯାଜପୁର ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରାଯାଇଛି । ଜିଲ୍ଲାର ବିଭିନ୍ନ ନିର୍ବାଚନ ମଣ୍ଡଳୀରୁ ହଜାର ହଜାର କର୍ମୀଙ୍କ ସହିତ ଚାଷୀ ମାନେ ଯାଜପୁର କୁସୁମା ନିକଟରେ ଏକତ୍ରିତ ହୋଇଥିଲେ । ସେଠାରୁ ବିଂଝାରପୁର ବିଧାୟିକା ତଥା ଵିରୋଧି ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ପୂର୍ବତନ ବିଧାୟକ ତଥା ବିଜେଡି ଉପସଭାପତି ପ୍ରଣବ ପ୍ରକାଶ ଦାସ, ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇ, ପୂର୍ବତନ ବିଧାୟକ ପ୍ରଣବ ବଳବନ୍ତ ରାୟ, ପୂର୍ବତନ ସାଂସଦ ଶର୍ମିଷ୍ଠା ସେଠୀ, ବରୀ ବିଧାୟକ ବିଶ୍ୱରଞ୍ଜନ ମଲ୍ଲିକ, ଯାଜପୁର ବିଧାୟିକା ସୁଜାତା ସାହୁ, ବଡ଼ଚଣାର ବିଜେଡି ନେତା ରାଜ ନାରାୟଣ ମହାପାତ୍ରଜିଲ୍ଲା ବିଜେଡି ସଭାପତି ସରୋଜ ମହାପାତ୍ରଙ୍କ ନେତୃତ୍ୱରେ ଏକ ବିଶାଳ ରାଲି ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲା । ସେଠାରେ ଦଳୀୟ ନେତା ମାନେ ସରକାରଙ୍କ ଚାଷୀ ମାରଣ ନୀତି ବିରୁଦ୍ଧରେ ତୀବ୍ର ପ୍ରତିବାଦ କରିଥିଲେ । ସରକାର ଆଜି ଅନ୍ନଦାତାଙ୍କୁ ଅପମାନିତ କରି ତାଙ୍କ ପେଟକୁ ଲାତ ମାରୁଥିବା କହିଥିଲେ ବିଜେଡି ନେତା । ସରକାର ନିଜ ଘୋଷଣା ଅନୁଯାୟୀ ଚାଷୀ ମାନଙ୍କୁ ଉଚିତ ମୂଲ୍ୟ ପ୍ରଦାନ କରୁନଥିବା ଅଭିଯୋଗ କରିଥିଲେ । ଏହା ସହିତ ବିଜେପି ସରକାର ସମୟରେ ରାଜ୍ୟ ସହିତ ଜିଲ୍ଲାର ଆଇନ ଶୃଙ୍ଖଳା ପରିସ୍ଥିତି ଭୁଶୁଡି ପଡିଥିବା ନେଇ ତୀବ୍ର ସମାଲୋଚନା କରିଥିଲେ । ଡବଲ ଇଞ୍ଜିନ ସରକାର ଲୋକମାନଙ୍କୁ ନ୍ୟାୟ ପ୍ରଦାନ କରିବାରେ ସମ୍ପୂର୍ଣ୍ଣ ଅସମର୍ଥ ବୋଲି କହିଥିଲେ ବିଜେଡି ନେତା ମାନେ । ବିଜେପି ସରକାର ସମୟରେ ବିଭିନ୍ନ ଜିଲ୍ଲା ସହିତ ଯାଜପୁର ଜିଲ୍ଲାରେ ବ୍ୟାପକ ଖଣିଜ ପଦାର୍ଥ ଲୁଟ ହେଉଥିଲା ବେଳେ ଜିଲ୍ଲା ପ୍ରଶାସନ ନିରବ ବସି ଏହାକୁ ସମର୍ଥନ କରୁଥିବା ଅଭିଯୋଗ କରିଥିଲେ । ଆଜି ବିଜେଡିର ଏହି ଦମଦାର ପ୍ରଦର୍ଶନ ଶାସକ ଦଳକୁ ଚମକାଇ ଦେଇଛି ।
ଚର୍ଚ୍ଚାରେ ଡ୍ୟାନିଙ୍କ ଭାଷଣ
ଆଜିର ଏହି ବିଶାଳ ପ୍ରତିବାଦ ସଭାରେ ପୂର୍ବତନ ମନ୍ତ୍ରୀ ତଥା ବିଜେଡିର ବରିଷ୍ଠ ସାଧାରଣ ସମ୍ପାଦକ ଇଂ ପ୍ରୀତିରଞ୍ଜନ ଘଡାଇଙ୍କ ଭାଷଣ ଚର୍ଚ୍ଚା ସୃଷ୍ଟି କରିଥିଲା । ସରକାରଙ୍କୁ ଡ୍ୟାନି ତୀବ୍ର ଆକ୍ଷେପ କରିବା ସହିତ ବିଜେପି ସରକାରରେ ଜିଏସଟି ବଦଳରେ ଏମଏମଟି(ମୋହନ ମାଝୀ ଟ୍ୟାକ୍ସ) ଲାଗୁ ହୋଇଛି ବୋଲି କହିଥିଲେ । ଖଣି ଖାଦାନରୁ ଲୁଟ ହେଉଥିଲା ବେଳେ ଖଣି ମାଫିଆ ଖୋଲା ଖୋଲି ମୋହନ ମାଝୀଙ୍କ ନା ନେଇ ଲୁଟ କରୁଥିବା ସେ ଅଭିଯୋଗ କରିଥିଲେ । ତାଙ୍କ ଦମଦାର ଭାଷଣ ହଜାର ହଜାର ବିଜେଡି କର୍ମୀଙ୍କୁ ବେଶ ଉତ୍ସାହିତ କରିଥିଲା ।
