ଓଡ଼ିଶା ଲିଡ୍ସ(ବ୍ୟୁରୋ): ବିଭିନ୍ନ ସନ୍ତ୍ରାସବାଦୀ ସଂଗଠନ ସହିତ ପାକିସ୍ତାନର ସମ୍ପର୍କ ବିଶ୍ୱବାସୀଙ୍କୁ ଅଛପା ନୁହେଁ । ପାକିସ୍ତାନରେ ରହି ଏହି ସଂଗଠନ ଗୁଡ଼ିକ ସାରା ବିଶ୍ୱରେ ନିଜ କାର୍ଯ୍ୟକଳାପ ଜାରି ରଖିଛନ୍ତି । ଏହି ସଂଗଠନଗୁଡ଼ିକ ଆଉ ପାକିସ୍ତାନରେ ରହି କାର୍ଯ୍ୟ କରୁନାହିଁ ବୋଲି ଦର୍ଶାଇବା ପାକ୍ ସରକାରଙ୍କର ମୁଖ୍ୟ ଉଦ୍ଦେଶ୍ୟ ରହିଛି। ଜାତିସଂଘରେ ପାକିସ୍ତାନକୁ ଏକ ବଡ଼ ଝଟ୍କା ଲାଗିଛି। ଜାତିସଂଘ ସୁରକ୍ଷା ପରିଷଦର ୧୨୬୭ ପ୍ରତିବନ୍ଧକ ମନିଟରିଂ କମିଟିର ସଦ୍ୟତମ ରିପୋର୍ଟରେ ପାକିସ୍ତାନ ସ୍ଥିତ ଆତଙ୍କବାଦୀ ସଂଗଠନ ଜୈଶ୍-ଏ-ମହମ୍ମଦକୁ ତାଲିକାଭୁକ୍ତ କରାଯାଇଛି। ଜୈଶ-ଏ-ମହମ୍ମଦକୁ ଜାତିସଂଘ ଦ୍ୱାରା ଏକ ଆତଙ୍କବାଦୀ ସଂଗଠନ ଭାବରେ ଘୋଷଣା କରାଯାଇଛି। ଏହି ଆତଙ୍କବାଦୀ ସଂଗଠନ ଦିଲ୍ଲୀର ଲାଲକିଲ୍ଲାରେ ହୋଇଥିବା ଆତଙ୍କବାଦୀ ଆକ୍ରମଣ ସହିତ ମଧ୍ୟ ଜଡିତ। ପାକିସ୍ତାନ ବାଲୁଚ୍ ଲିବରେସନ୍ ଆର୍ମି (ବିଏଲ୍ଏ)କୁ ଆତଙ୍କବାଦୀ ସଂଗଠନ ଅଲ-କାଏଦାର ସହଯୋଗୀ ଭାବରେ ପ୍ରମାଣ କରିବାରେ ମଧ୍ୟ ବିଫଳ ହୋଇଛି। ଦୁଇଟି ଦୁଇଟି ମୋର୍ଚ୍ଚାରେ ବିଫଳ ହୋଇ ପାକିସ୍ତାନକୁ ଜାତିସଂଘରେ ଡ଼ବଲ ଝଟ୍କା ଲାଗିଛି।
ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ଏହି ଗୋଷ୍ଠୀ ମହିଳାଙ୍କ ପାଇଁ ଏକ ସ୍ୱତନ୍ତ୍ର ଶାଖା ଜମାତ-ଉଲ-ମୁମିନାତ ପ୍ରତିଷ୍ଠା କରିବାକୁ ଯୋଜନା କରୁଛି। ରିପୋର୍ଟରେ ଜୈଶ୍-ଏ-ମହମ୍ମଦର ଉଲ୍ଲେଖକୁ ପାକିସ୍ତାନ ଦୃଢ଼ ବିରୋଧ କରିଥିଲା। ଜୈଶ୍-ଏ-ମହମ୍ମଦର ଉଲ୍ଲେଖକୁ ବିରୋଧ କରିବାରେ ପାକିସ୍ତାନ ଏକମାତ୍ର ସଦସ୍ୟ ଦେଶ ଥିଲା। ଅନ୍ୟ ଦେଶମାନେ ଭାରତର ମତକୁ ସମର୍ଥନ କରିଥିଲେ।
ମହିଳା ଆତଙ୍କବାଦୀ ଦଳ ଗଠନ କରୁଛି ଜୈଶ-ଏ-ଅହମ୍ମଦ
ଜାତିସଂଘର ଏକ ସଦସ୍ୟ ରାଷ୍ଟ୍ର ଦାବି କରିଛି ଯେ, ଜୈଶ୍-ଏ-ମହମ୍ମଦ ଅନେକ ଆକ୍ରମଣ ପାଇଁ ଦାୟୀ। ଏହା ମଧ୍ୟ ରିପୋର୍ଟ ହୋଇଛି ଯେ, ଜୈଶ୍-ଏ-ମହମ୍ମଦ ନଭେମ୍ବର ୯ ରେ ଲାଲକିଲ୍ଲା ଉପରେ ହୋଇଥିବା ଆକ୍ରମଣରେ ସାମିଲ ଥିଲା। ଯେଉଁଥିରେ ୧୫ ଜଣଙ୍କର ମୃତ୍ୟୁ ଘଟିଥିଲା। ଅକ୍ଟୋବର ୮ ରେ, ଜୈଶ୍-ଏ-ମହମ୍ମଦ ନେତା ମୌଲାନା ମାସୁଦ ଆଝାର ଆଲଭି ଆତଙ୍କବାଦୀ ଆକ୍ରମଣକୁ ସମର୍ଥନ କରିବା ପାଇଁ ଏକ ସ୍ୱତନ୍ତ୍ର ମହିଳା ସଂଗଠନ ଜମାତ-ଉଲ-ମୁମିନତ ପ୍ରତିଷ୍ଠା ପାଇଁ ଆନୁଷ୍ଠାନିକ ଭାବରେ ଘୋଷଣା କରିଥିଲେ। ଏହି ରିପୋର୍ଟରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, ପହଲଗାମ ଆକ୍ରମଣ ପଛରେ ଥିବା ତିନି ଜଣ ଆତଙ୍କବାଦୀ ଜମ୍ମୁ-କାଶ୍ମୀରରେ ନିହତ ହୋଇଛନ୍ତି। ପର୍ଯ୍ୟବେକ୍ଷକ ଗୋଷ୍ଠୀର ପୂର୍ବ ରିପୋର୍ଟରେ ପ୍ରଥମେ ପହଲଗାମ ଆକ୍ରମଣ ପାଇଁ ଦାୟୀ ଥିବା ଗୋଷ୍ଠୀ ଭାବରେ ଦି ରେଜିଷ୍ଟାନ୍ସ ଫ୍ରଣ୍ଟକୁ ଉଲ୍ଲେଖ କରାଯାଇଥିଲା। ପାକିସ୍ତାନର ପ୍ରତିବାଦ ସତ୍ତ୍ୱେ, ଜାତିସଂଘ ଦ୍ୱାରା ନିର୍ଣ୍ଣିତ ଆତଙ୍କବାଦୀ ସଂଗଠନ ଲସ୍କର-ଏ-ତୈବାର ସହଯୋଗୀ ହୋଇଥିବାରୁ ଏହି ଗୋଷ୍ଠୀକୁ ନିଷିଦ୍ଧ କରାଯାଇଥିଲା।
