ଓଡ଼ିଶା ଲିଡ୍ସ(ବ୍ୟୁରୋ): ନବୀନଙ୍କ ନୂଆ ରୂପକୁ ନେଇ ବିଜେଡି ଉତ୍ସାହିତ ହୋଇ ପଡ଼ିଥିଲା ବେଳେ ଏହା ବିଜେପିର ଚିନ୍ତା ବଢ଼ାଇଥିବା ନେଇ ଚର୍ଚ୍ଚା ଜୋର ଧରିଛି । ରାଜ୍ୟବାସୀବି ନବୀନଙ୍କ ନୂଆ ରୂପ ଦେଖି ତଟସ୍ଥ । ନିର୍ବାଚନ ସମୟରେ ନବୀନଙ୍କ କାର୍ଯ୍ୟଧାରାକୁ ଦୃଷ୍ଟି ଦେଲେ ନବୀନ ସେ ସମୟରେ ଖୁବ ଦୁର୍ବଳ ଓ ଅସୁସ୍ଥ ଦେଖା ଯାଉଥିଲେ । କିଛି ସ୍ଥାନର ଭିଡିଓ ଚିତ୍ରରେ ସେ ଠିକ ଢଙ୍ଗରେ ଚାଲି ପାରୁନଥିବା ମଧ୍ୟ ଦେଖିବାକୁ ମିଳୁଥିଲା । ଚାଲିବା ପାଇଁ ସେ ଅନ୍ୟର ସହାରା ନେଉଥିଲେ । ହେଲେ ଏବେ ଓଲଟା ଚିତ୍ର ଦେଖୁବାକୁ ମିଳୁଛି ନବୀନଙ୍କ କ୍ଷେତ୍ରରେ । ବେଶ ସୁସ୍ଥ ହୋଇଥିବା ତାଙ୍କ କାର୍ଯ୍ୟକଳାପରୁ ଦେଖିବାକୁ ମିଳୁଛି । ବିଭିନ୍ନ ସମୟରେ ନିଜର ଦଳୀୟ ନେତା ଓ ନେତ୍ରୀଙ୍କୁ ନେଇ ଦଳୀୟ ସଂଗଠନ ବିଷୟରେ ଆଲୋଚନା କରୁଥିଲା ବେଳେ ବହୁ ସଂଖ୍ୟାରେ ଦଳୀୟ କର୍ମୀଙ୍କୁ ମଧ୍ୟ ଭେଟୁଛନ୍ତି । ଗଣ ମଧ୍ୟମଠାରୁ ପୂର୍ବରୁ ଦୁରେଇ ରହୁଥିଲା ବେଳେ ଏବେ ଗଣ ମାଧ୍ୟମରେ ବିଭିନ୍ନ ବିବୃତି ରଖୁଛନ୍ତି । ବିଶେଷ କରି ଗଣ ମାଧ୍ୟମକୁ ସମ୍ମୁଖିନ ହେଉଥିଲା ବେଳେ ବେଶ ଚଳ ଚଞ୍ଚଳ ଜଣା ପଡୁଛନ୍ତି ନବୀନ । ଲଗାତାର ଭାବେ ବିଧାନସଭାକୁ ମଧ୍ୟ ଆସୁଛନ୍ତି । ପୂର୍ବରୁ ଅସମ୍ଭବ ନୀରବତା ଅବଲମ୍ବନ କରୁଥିଲା ବେଳେ ଏବେ କିନ୍ତୁ ନିଜ ଦଳର ନେତାଙ୍କୁ ବିଭିନ୍ନ କଥା ପଚାରି ବୁଝୁଛନ୍ତି ।
ନବୀନଙ୍କ ଏହି ବଦଳା ଆଭିମୁଖ୍ୟ ବିଜେଡି ଦଳରେ ଓ ନେତାଙ୍କ ମନରେ ଉତ୍ସାହ ଭରିଛି । ନବୀନଙ୍କ ନିର୍ବାଚନ ସମୟର ସ୍ୱାସ୍ଥ୍ୟ ଅବସ୍ଥାରେ ପରିବର୍ତ୍ତନ ହେବା ଓ ନବୀନ ଚଳଚଞ୍ଚଳ ହେବା ଦଳରେ ନୂଆ ଉତ୍ସାହ ସୃଷ୍ଟି କରିଛି । ନବୀନଙ୍କ ବଦଳା ରୂପକୁ ନେଇ ଶାସକ ବିଜେପି କିନ୍ତୁ ଚିନ୍ତାରେ ପଡ଼ି ଯାଇଛି । ବିଜେପି ନେତା ମାନନ୍ତୁ ଅବା ନ ମାନନ୍ତୁ ନବୀନଙ୍କ ଏହି ରୂପ ଦଳକୁ ଚିନ୍ତିତ କରୁଛି । ନବୀନଙ୍କ ବଦଳା ଆଭିମୁଖ୍ୟକୁ ଦେଖି ବିଜେପିର ନେତା ମାନେ ସ୍ୱଳ୍ପ ଶବ୍ଦରେ ଟାର୍ଗେଟ କରୁଥିବା ଦେଖୁବାକୁ ମିଳିଛି । ନବୀନ ଧାଡ଼ିକିଆ ବିବୃତି ଦେଉଥିବା ବିଜେପି କହିବା ଏହାକୁ ପ୍ରମାଣିତ କରୁଛି । ଆଗକୁ ଯଦି ବିଜେଡି କୌଣସି ବଡ଼ ସମାବେଶ ଆୟୋଜନ କରେ ଓ ନବୀନ ସେଠାରେ ଯୋଗଦେଇ ସରକାର ବିରୁଦ୍ଧରେ କଡା ଆଭିମୁଖ୍ୟ ଗ୍ରହଣ କରନ୍ତି ତେବେ ଏହା ବିଜେପି ଚିନ୍ତାକୁ ଦ୍ବିଗୁଣିତ କରିବ ଏଥିରେ ସନ୍ଦେହ ନାହିଁ ।
