ଓଡ଼ିଶା ଲିଡ୍ସ(ବ୍ୟୁରୋ): ବିରୋଧୀ ଦଳ ସଦସ୍ୟଙ୍କ କକ୍ଷତ୍ୟାଗ ମଧ୍ୟରେ ‘ଓଡ଼ିଶା ବ୍ୟୟମଞ୍ଜୁରୀ ବିଲ-୨୦୨୬’ ଗୃହରେ ପାରିତ ହୋଇଛି। ଏହାସହିତ ୨୦୨୬-୨୭ ଆର୍ଥିକ ବର୍ଷର ପ୍ରଥମ ଦିନରୁ ଅର୍ଥାତ୍ ଆସନ୍ତାକାଲି ଠାରୁ ବଜେଟ୍ ଅର୍ଥ ଖର୍ଚ୍ଚ କରିବାକୁ ରାଜ୍ୟ ସରକାରଙ୍କୁ ବିଧାନସଭାରୁ ଅନୁମତି ମିଳିଛି।
ଏହି ବ୍ୟୟମଞ୍ଜୁରୀ ବିଲ୍ ଆଲୋଚନାରେ ଭାଗ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବିରୋଧୀଙ୍କ ଉପରେ ବର୍ଷିଛନ୍ତି।
ମୁଖ୍ୟମନ୍ତ୍ରୀ ବିଧାନସଭା ଭିତରେ ଓ ବାହାରେ ବିରୋଧୀ ଦଳର ଆଚରଣକୁ କଡା ସମାଲୋଚନା କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ରାଜ୍ୟବାସୀ ସବୁ ଦେଖୁଛନ୍ତି ଓ ଆଗାମୀ ନିର୍ବାଚନରେ ଲୋକେ ଏହାର ଜବାବ ଦେବେ। ଗୋଟିଏପଟେ ସମୃଦ୍ଧ ଓଡ଼ିଶା ଗଠନ ପାଇଁ ସରକାରଙ୍କ ରୋଡମ୍ୟାପକୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ଗୃହକୁ ଅବଗତ କରିଥିବାବେଳେ ଅନ୍ୟପଟେ ବିରୋଧୀଙ୍କ ନୈତିକତା ଓ କାର୍ଯ୍ୟଶୈଳୀକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି।
ମୁଖ୍ୟମନ୍ତ୍ରୀ ବିଗତ ବିଜେଡି ସରକାରଙ୍କୁ ଟାର୍ଗେଟ କରି କହିଛନ୍ତି, ସମୟ ଥିଲା ଯେତେବେଳେ ଅଫିସରମାନେ ହିଁ ସରକାରଙ୍କ ପାଇଁ ନିଷ୍ପତ୍ତି ନେଉଥିଲେ। ଆଉ ଛୋଟ ଛୋଟ ଘଟଣାରେ ମନ୍ତ୍ରୀମାନଙ୍କୁ ବଳି ପକାଯାଉଥିଲା। ଅଫିସର ଯାହା ଚାହୁଁଥିଲେ ସେୟା ହେଉଥିଲା। ଏପରିକି ସେହି ‘ବିଶେଷ ବାବୁ’ଙ୍କ ଦ୍ୱାରା ଆଜିବି ବିରୋଧୀ ଦଳ ପରିଚାଳିତ ହେଉଛି ବୋଲି ତାଙ୍କ ଦଳର ବିଧାୟକମାନେ ଚର୍ଚ୍ଚା କରୁଛନ୍ତି ବୋଲି ମଧ୍ୟ କହିଥିଲେ । କଟକ ଏସସିବି ମେଡିକାଲ ଅଗ୍ନିକାଣ୍ଡ ଘଟଣାରେ ବିରୋଧୀଙ୍କ ହୋ-ହାଲ୍ଲାକୁ ସମାଲୋଚନା କରି ମୁଖ୍ୟମନ୍ତ୍ରୀ ଶ୍ରୀ ମାଝୀ କହିଛନ୍ତି ପୂର୍ଣ୍ଣାଙ୍ଗ ରିପୋର୍ଟ ଆସିଲେ ହିଁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଓ ସେତେବେଳେ ଜଣାପଡ଼ିବ କିଏ ପ୍ରକୃତରେ ସବଳ। ବିରୋଧୀଙ୍କ ଆଖିରେ ଲୁହ ନଥାଇ କାନ୍ଦିବା ଶୋଭା ପାଉନାହିଁ ବୋଲି ମଧ୍ୟ କହିଛନ୍ତି ମୁଖ୍ୟମନ୍ତ୍ରୀ ।
