ଓଡ଼ିଶା ଲିଡ୍ସ(ଗଞ୍ଜାମ): ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ସୁବଳୟା ଗ୍ରାମର ସୁଶାନ୍ତ ସାହୁଙ୍କୁ ପୁଲିସ ପକ୍ଷରୁ ଅମାନୁଷିକ ଭାବେ ନିର୍ଯାତନା ଦିଆଯିବା ପରେ ତାଙ୍କର ମୃତ୍ୟୁ ଘଟିଥିବା ଅଭିଯୋଗ ହୋଇଥିଲା । ଏହି ଘଟଣାକୁ ବିରୋଧୀ ଦଳ ପକ୍ଷରୁ ଦୃଢ ନିନ୍ଦା କରାଯାଇଥିଲା । ଗତ ମଙ୍ଗଳବାର ଦିନ ବିଜେଡିର ଏକ ଫାକ୍ଟ୍ ଫାଇଣ୍ଡିଂ ଟିମ ସୁଶାନ୍ତଙ୍କ ବାସଭବନରେ ପହଞ୍ଚି ଘଟଣା ବିଷୟରେ ପରିବାର ସଦସ୍ୟଙ୍କ ସହ ଆଲୋଚନା କରିଥିଲେ ।
ଫ୍ୟାକ୍ଟ ଫାଇଣ୍ଡିଙ୍ଗ ଟିମର ସଦସ୍ୟମାନେ ପୁଲିସର ଏଭଳି ଅମାନୁଷିକ ଓ ବର୍ବର କାର୍ଯ୍ୟକଳାପକୁ କଡ଼ା ନିନ୍ଦା କରିବା ସହ ମୃତକଙ୍କ ପରିବାରକୁ ସମବେଦନା ଜଣାଇଥିଲେ । ପରିବାର ଏପର୍ଯ୍ୟନ୍ତ ଭୟଭୀତ ଥିବାରୁ ଥାନାରେ ଏତଲା ଦାଖଲ କରିନଥିବା ଜଣାପଡ଼ିଛି। ଏହାକୁ ଦୃଷ୍ଟିରେ ରଖି ଫାକ୍ଟ୍ ଫାଇଣ୍ଡିଂ ଟିମ ପକ୍ଷରୁ ତୁରନ୍ତ ଏତଲା ଦାଖଲ କରିବାକୁ ପରିବାରକୁ ପରାମର୍ଶ ଦିଆଯାଇଛି।
ଏଥି ସହିତ ମୃତକଙ୍କ ପରିବାରକୁ ରାଜ୍ୟ ସରକାରଙ୍କ ପକ୍ଷରୁ ତୁରନ୍ତ କ୍ଷତିପୂରଣ ପ୍ରଦାନ କରାଯିବାକୁ ଦାବି ହୋଇଛି । ଏହା ସହିତ ମୃତକଙ୍କ ପରିବାରର ଜଣେ ସଦସ୍ୟଙ୍କୁ ସରକାରୀ ଚାକିରି ଯୋଗାଇ ଦେବାକୁ ମଧ୍ୟ ଦାବି କରାଯାଇଛି। ସଦସ୍ୟ ମାନେ ଘଟଣାର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ।
ଏହି ଫାକ୍ଟ୍ ଫାଇଣ୍ଡିଂ ଟିମରେ ବରିଷ୍ଠ ବିଜେଡି ନେତା ରମେଶ ଚନ୍ଦ୍ର ଚ୍ୟାଉପଟ୍ଟନାୟକ, ଶ୍ରୀକାନ୍ତ ସାହୁ, ସଂଘମିତ୍ରା ଦଳାଇ, ମଞ୍ଜୁଳା ସ୍ୱାଇଁ ପ୍ରମୁଖ ସାମିଲ ଥିଲେ ।
