ଦାଉ ସାଧୁଛି ବନ୍ୟା: ଦୁର୍ଦ୍ଦଶାରେ ୧୦ ପଞ୍ଚାୟତ ବନ୍ୟା ବିପନ୍ନ, ଯୋଗାଯୋଗ ବିଛିନ୍ନ

ଓଡ଼ିଶା ଲିଡ୍ସ(ଦଶରଥପୁର): ଚଳିତ ବର୍ଷ ବୈତରଣୀ ଓ ଶାଖା କାଣୀ ନଦୀରେ ଆସିଥିବା ବନ୍ୟାରେ ଦଶରଥପୁର ବ୍ଲକର ୧୦ ପଞ୍ଚାୟତର ୨୭ ଗାଁ ପ୍ରଭାବିତ ହୋଇଛି। ପ୍ରଶାସନ ସୂଚନା ଅନୁଯାୟୀ ବନ୍ୟା ଯୋଗୁ ଆଜି ସୁଦ୍ଧା ୫୪ ହଜାର ୬୪୪ ଜଣ ପ୍ରଭାବିତ ହୋଇଥିବାବେଳେ ପାଣି ଘେରରୁ ୯,୬୬୯ ବୟସ୍କ ଓ ୩,୦୮୫ ଜଣ ଶିଶୁଙ୍କୁ ମିଶାଇ ମୋଟ ୧୩,୮୭୬ ବିପନ୍ନଙ୍କୁ ବିଭିନ୍ନ ସ୍ଥାନରେ ଥଇଥାନ କରାଯାଇଛି । ପ୍ରଶାସନ ପକ୍ଷରୁ ଏମାନଙ୍କ ପାଇଁ ୧୯ଟି ସ୍ଥାନରେ ଶୁଖିଲା ଓ ରନ୍ଧା ଖାଦ୍ୟର ବ୍ୟବସ୍ଥା ହୋଇଛି । ଆଜି ମଧ୍ୟ ବିଭିନ୍ନ ପଞ୍ଚାୟତର ଗାଁ ଗୁଡିକରେ ୩ ରୁ ୪ଫୁଟ ଉଚ୍ଚତାରେ ବନ୍ୟା ଜଳ ପ୍ରବାହିତ ହେଉଛି। କାଟିଆ-ବୈଷପାନ ରାସ୍ତା, ଅହିୟାସ-ତରପଡା ରାସ୍ତା, ବଉଳାଙ୍ଗ-ମଲିକାପୁର ରାସ୍ତା, ଅହିୟାସ-ବୈଷପାନ, ମଲ୍ଲିକାପୁର-ବଉଳାଙ୍ଗ, ଲକ୍ଷ୍ମୀପୁର-ଗୁଣ୍ଠୁଣିପଡା, ମଙ୍ଗଳପୁର-ମହାନ୍ତିପାଟଣା ପ୍ରମୁଖ ରାସ୍ତା ସମେତ ଏକାଧିକ ଗ୍ରାମ୍ୟ ରାସ୍ତା ଉପରେ ବନ୍ୟା ଜଳ ପ୍ରବାହିତ ହେଉଥିବା ଯୋଗୁ ଏହି ସବୁ ଅଞ୍ଚଳ ବାହ୍ୟ ଜଗତରୁ ଏକପ୍ରକାର ବିଛିନ୍ନ ହୋଇଛି । ଆଜି ବିଡ଼ିଓ ଆକାଶ ପଟ୍ଟନାୟକ, ସହକାରୀ ନିର୍ବାହୀଯନ୍ତ୍ରୀ ରାହାସ ବିହାରୀ ଜେନା, ମଙ୍ଗଳପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକାରିଣୀ ଅମ୍ରିତା ପ୍ରୀତମ ମଲ୍ଲ ପ୍ରମୁଖଙ୍କ ଗହଣରେ ବ୍ଲକ ଅଧିନ କସପା, ମଲ୍ଲିକାପୁର, ତରପଦା, କମାରଢିହି, କଁୟା, ମଙ୍ଗଳପୁର, କନିକାପଡା ଆଦି ପଞ୍ଚାୟତର ବିଭିନ୍ନ ବନ୍ୟା ପ୍ଲାବିତ ଅଞ୍ଚଳ ପରିଦର୍ଶନ କରିବା ସହିତ ବନ୍ୟା ବିପନ୍ନଙ୍କ ସ୍ୱାସ୍ଥ୍ୟ ସ୍ଥିତି ସମୀକ୍ଷା କରିଥିଲେ। ଯାଜପୁର ବିଧାୟିକା ସୁଜାତା ସାହୁ,ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ, ବିଜେଡି ଜିଲ୍ଲା ସଭାପତି ସରୋଜ ମହାପାତ୍ର, ଜିଲ୍ଲା ପରିଷଦ ସଭ୍ୟା ମାମିନା ମଲ୍ଲିକ, ମନସ୍ଵିନୀ ଦାସ, ପୁର୍ବତନ ସରପଞ୍ଚ କନକ ପ୍ରଭା ଦାସ୍ ପ୍ରମୁଖ ସକାଳେ ଡୋଭାବିଲ ପାଟଣାସାହି ଘାଇ ପରିଦର୍ଶନ କରିବା ପରେ ବୈତରଣୀ ନଦୀବନ୍ଧରେ ଆଶ୍ରୟ ନେଇଥିବା ବନ୍ୟା ବିପନ୍ନଙ୍କ ସମେତ ତରପଦା, ମଲ୍ଲିକାପୁର, ଅହିୟାସ, କସପା, ମହାନ୍ତିପାଟଣା, ଛଞ୍ଚିଣା ଆଦି ବନ୍ୟା ପ୍ରଭାବିତ ଅଞ୍ଚଳରେ ପହଞ୍ଚି ବିପନ୍ନଙ୍କ ସ୍ଥିତି ଅନୁଧ୍ୟାନ କରିଥିଲେ ।