ଓଡ଼ିଶା ଲିଡ୍ସ(ବ୍ୟୁରୋ): ଅବସର ଚର୍ଚ୍ଚା ଭିତରେ ଅଷ୍ଟ୍ରେଲିଆ ଗସ୍ତ କରିଥିଲେ ପୂର୍ବତନ ଅଧିନାୟକ ରୋହିତ ଶର୍ମା । ଅଧିନାୟକ ଭାବେ ବେଶ ସଫଳ ଥିବା ରୋହିତଙ୍କୁ ଅଷ୍ଟ୍ରେଲିଆ ଗସ୍ତ ପୂର୍ବରୁ ଅଧିନାୟକ ପଦରୁ ହଟାଇ ଦେଇଥିଲା ବିସିସିଆଇ । ଟେଷ୍ଟ ସିରିଜରେ ସଫଳ ହୋଇଥିବା ଶୁଭମନ ଗିଲଙ୍କୁ ଅଧିନାୟକ ଭାର ଅର୍ପଣ କରିଥିଲା । ଅଷ୍ଟ୍ରେଲିଆରେ ଗିଲ ଉଭୟ ବ୍ୟାଟିଂ ଓ ଅଧିନାୟକତ୍ୱରେ ବିଫଳ ହୋଇଥିଲେ । ହେଲେ ରୋହିତ କିନ୍ତୁ ତିନିଟି ମ୍ୟାଚରେ ଗୋଟିଏ ଅର୍ଦ୍ଧ ଶତକ ଓ ଗୋଟିଏ ଶତକ କରି ମ୍ୟାନ ଅଫ ଦି ସିରିଜ ହୋଇଥିଲେ । ଏହା ତାଙ୍କ ସମାଲୋଚକଙ୍କୁ ଚୁପ କରିଥିଲା ବେଳେ ସବୁ ଚର୍ଚ୍ଚାର ଅବସାନ ଘଟାଇଛି । ଟିମ୍ ଇଣ୍ଡିଆର ଏହି ଅଭିଜ୍ଞ ଖେଳାଳି ରୋହିତ ଶର୍ମା ଆଉ ଏକ ଉଲ୍ଲେଖନୀୟ ସଫଳତା ହାସଲ କରିଛନ୍ତି। ୩୮ ବର୍ଷ ବୟସରେ ଯେତେବେଳେ ତାଙ୍କ ଅବସର ଚର୍ଚ୍ଚା ଜୋର ଧରିଛି ଠିକ ସେତିକି ବେଳେ ରୋହିତ ପ୍ରଥମ ଥର ପାଇଁ ଆଇସିସି ଏକଦିବସିୟ ରାଙ୍କିଙ୍ଗରେ ବିଶ୍ୱର ନମ୍ବର ୧ ବ୍ୟାଟସମ୍ୟାନ୍ ହୋଇଛନ୍ତି। ଏହି ସ୍ଥାନରେ ପହଞ୍ଚିବାରେ ସେ ବିଶ୍ୱର ସବୁଠାରୁ ବୟସ୍କ ଖେଳାଳି ମଧ୍ୟ ହୋଇଛନ୍ତି। ଏହି ଐତିହାସିକ ସଫଳତା ହାସଲ କରିବା ପାଇଁ ତାଙ୍କ ଠାରୁ ଭାରତୀୟ ଅଧିନାୟକ ପଦ ଗ୍ରହଣ କରିଥିବା ଯୁବ ତାରକା ଶୁଭମନ ଗିଲଙ୍କୁ ପଛରେ ପକାଇ ଦେଇଛନ୍ତି । ଅଷ୍ଟ୍ରେଲିଆରେ ଚମତ୍କାର ବ୍ୟାଟିଂ ପାଇଁ ରୋହିତ ବିଶ୍ୱ କ୍ରିକେଟରେ ନମ୍ବର ୧ ରାଙ୍କିଙ୍ଗ ମୁକୁଟ ହାସଲ କରିଛନ୍ତି ।
କିମ୍ବଦନ୍ତୀ ସଚିନ ତେନ୍ଦୁଲକରଙ୍କୁ ପଛରେ ପକାଇଲେ ରୋହିତ
ରୋହିତ ଶର୍ମା କିମ୍ବଦନ୍ତୀ ବ୍ୟାଟସମ୍ୟାନ ସଚିନ ତେନ୍ଦୁଲକରଙ୍କୁ ପଛରେ ପକାଇ ଏହି ବିଶ୍ୱ ରେକର୍ଡ ହାସଲ କରିଛନ୍ତି। ରୋହିତ ଶର୍ମା ୩୮ ବର୍ଷ ୧୮୨ ଦିନ ବୟସରେ ନମ୍ବର-୧ ସ୍ଥାନ ହାସଲ କରିଥିବା ବେଳେ ସଚିନ ୨୦୧୧ ମସିହାରେ ୩୮ ବର୍ଷ ୭୩ ଦିନରେ ଟେଷ୍ଟ କ୍ରିକେଟରେ ଏହି ସଫଳତା ହାସଲ କରିଥିଲେ। ଆଇସିସି ରାଙ୍କିଙ୍ଗରେ ନମ୍ବର-୧ ସ୍ଥାନ ପାଇବାରେ ତୃତୀୟ ସବୁଠାରୁ ବୟସ୍କ ଖେଳାଳି ହେଉଛନ୍ତି ଭିଭ ରିଚାର୍ଡସ । ୱେଷ୍ଟଇଣ୍ଡିଜର ଏହି ମହାନ ବ୍ୟାଟ୍ସମ୍ୟାନ ୩୭ବର୍ଷ ୨୩୦ ଦିନ ବୟସରେ ଏହି ସଫଳତା ହାସଲ କରିଥିଲେ।
