ଗୋମାତାଙ୍କ ସୁରକ୍ଷା ପ୍ରତି ସମସ୍ତଙ୍କ ଦାୟିତ୍ୱ ରହିଛି

ଓଡ଼ିଶା ଲିଡ୍ସ(କୃଷ୍ଣପ୍ରସାଦ): ଗୋମାତାଙ୍କ ସେବା, ସୁରକ୍ଷା ଓ ସମ୍ମାନକୁ ସର୍ବୋଚ୍ଚ ପ୍ରାଥମିକତା ଦେଇ କୃଷ୍ଣପ୍ରସାଦର ସୁରଭୀ ଗୋସେବା କେନ୍ଦ୍ର ଏବଂ ଗୋସେବକ ଗୋ ସମ୍ମାନ ଆହ୍ଵାନ ଅଭିଯାନ ପକ୍ଷରୁ ଏକ ବ୍ୟାପକ ସଚେତନତା ଓ ସେବା କାର୍ଯ୍ୟାକ୍ରମ ଗ୍ରହଣ କରାଯାଇଛି । ଗୋମାତାଙ୍କ ସେବା ପାଇଁ ନିଜର ଘରଦ୍ଵାର ତ୍ୟାଗ କରି ଦେଢ଼ ବର୍ଷରୁ ଅଧିକ ସମୟ ଧରି ନିରନ୍ତର ସେବାରେ ବ୍ରତୀ ରହିଥିବା ମହାରାଜ ଜୀ, ଭୂପେନ୍ଦ୍ର ପ୍ରଭୁ ଜୀ ଏବଂ ଜ୍ଞାନ ଭାଇଙ୍କ ସମେତ ସମ୍ପୂର୍ଣ୍ଣ ଟିମ୍ ଏହି ଅଭିଯାନରେ ଉପସ୍ଥିତ ରହି ପ୍ରଶଂସନୀୟ ଉଦାହରଣ ସୃଷ୍ଟି କରିଛନ୍ତି । ଗୋମାତାଙ୍କ ସୁରକ୍ଷା ଓ ସମ୍ମାନ ପାଇଁ ଓଡ଼ିଶାର ପ୍ରତ୍ୟେକ କୋଣରୁ ସଚେତନ ଭାଇମାନେ ଏକାଠି ହୋଇ ଏହି ଅଭିଯାନରେ ସାମିଲ ହୋଇଛନ୍ତି । ଗୋ ସେବାକୁ ଅଧିକ ତ୍ଵରାନ୍ୱିତ ଏବଂ ପ୍ରଭାବଶାଳୀ କରିବା ପାଇଁ ରାଜ୍ୟର ବିଭିନ୍ନ ସ୍ଥାନରେ ସ୍ୱତନ୍ତ୍ର ‘ଟ୍ରିଟମେଣ୍ଟ ଟିମ୍’ ଏବଂ ‘ରେସ୍କୁ ଟିମ୍’ ମଧ୍ୟ ଗଠନ କରାଯାଇଛି । ଯାହାକି ଅସହାୟ, ଦୁର୍ବଳ ଓ ରୋଗଗ୍ରସ୍ତ ଗୋମାତାଙ୍କୁ ତୁରନ୍ତ ଚିକିତ୍ସା ଏବଂ ସହାୟତା ଯୋଗାଇବାରେ ଲାଗିଛି । ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ସମ୍ପର୍କରେ ଆଲୋକପାତ କରି ବକ୍ତାମାନେ ଜଣାଇଛନ୍ତି ଯେ, ଆଗାମୀ ଡିସେମ୍ବର ୧୭ ତାରିଖ ଦିନ ଗୋଚର ଜମିର ସୁରକ୍ଷା ଏବଂ ସମ୍ବିଧାନ ସଂଶୋଧନ ଆମେଣ୍ଡମେଣ୍ଟ ପ୍ରସଙ୍ଗକୁ ନେଇ ଏକ ଗୁରୁତ୍ୱପୂର୍ଣ୍ଣ ଦାବିପତ୍ର ପ୍ରଦାନ କରାଯିବ । ଗୋଚର ଜମିଗୁଡ଼ିକ କେବଳ ଗୋ ଚାରଣ ଓ ଗୋଶାଳା ପାଇଁ ବ୍ୟବହାର ହେଉ ବୋଲି ଏହି ଅଭିଯାନର ଅନ୍ୟତମ ପ୍ରମୁଖ ଦାବି । ଯେଉଁ ବ୍ୟକ୍ତିମାନେ ନିଜର ଦୈନନ୍ଦିନ ଜୀବନରେ କ୍ଷୀର, ଦହି, ପନିର ଇତ୍ୟାଦି ଦୁଗ୍ଧଜାତ ଦ୍ରବ୍ୟ ସେବନ କରୁଛନ୍ତି, ସେମାନଙ୍କର ମଧ୍ୟ ଗୋମାତାଙ୍କ ପ୍ରତି ଏକ ସ୍ୱତନ୍ତ୍ର ନୈତିକ କର୍ତ୍ତବ୍ୟ ରହିଛି ବୋଲି ବକ୍ତାମାନେ ପ୍ରକାଶ କରିଛନ୍ତି। ଗୋମାତାଙ୍କର ସୁରକ୍ଷା ଓ ସମ୍ମାନ ପାଇଁ ଦଳମତ ନିର୍ବିଶେଷରେ ସମସ୍ତ ସଚେତନ ନାଗରିକଙ୍କୁ ଏହି ମହାନ ଅଭିଯାନରେ ଯୋଗଦେବାକୁ ବିନମ୍ର ଅନୁରୋଧ କରାଯାଇଛି । କାର୍ଯ୍ୟକ୍ରମକୁ ଗୋ ପୁତ୍ର ପରିବାର କୃଷ୍ଣପ୍ରସାଦର କର୍ମକର୍ତ୍ତା ଓ ସଦସ୍ୟ ମାନେ ପରିଚାଳନା କରିଥିଲେ ।