ଓଡ଼ିଶା ଲିଡ୍ସ(ବ୍ୟୁରୋ): ନୂଆପଡା ଉପ ନିର୍ବାଚନ ପାଇଁ ତାରିଖ ଘୋଷଣା ପରେ ଘାସିରାମ ମାଝୀଙ୍କୁ ପ୍ରଥମେ ପ୍ରାର୍ଥୀ ଘୋଷଣା କରିଛି କଂଗ୍ରେସ । ହେଲେ ଶାସକ ଦଳ ବିଜେପି ଓ ମୁଖ୍ୟ ଵିରୋଧି ଦଳ ବିଜେଡି କିନ୍ତୁ ନିଜନିଜ ଦଳର ପ୍ରାର୍ଥୀ ଘୋଷଣା କରି ନାହାନ୍ତି । ଯାହାକୁ ନେଇ ରାଜ୍ୟ ରାଜନୀତିରେ ବେଶ ଚର୍ଚ୍ଚା ହେଉଛି । ସ୍ୱର୍ଗତ ରାଜେନ୍ଦ୍ର ପ୍ରସାଦ ଢୋଲକିଆଙ୍କ ପୁଅ ଜୟ ଢୋଲକିଆ ବିଜେଡି ପ୍ରାର୍ଥୀ ହୋଇ ପାରନ୍ତି ବୋଲି ଦଳର ବରିଷ୍ଠ ନେତା ଦେବୀ ମିଶ୍ର ସଂକେତ ଦେଇଛନ୍ତି । ହେଲେ ବିଜେପି କାହାକୁ ଏହି ଉପ ନିର୍ବାଚନରେ ପ୍ରାର୍ଥୀ କରୁଛି ତା ଉପରେ ସମସ୍ତଙ୍କ ନଜର । ଦଳ ଗତ ନିର୍ବାଚନରେ ଲଢ଼ି ତୃତୀୟ ସ୍ଥାନରେ ରହିଥିବା ଅଭିନନ୍ଦନ ପଣ୍ଡାଙ୍କୁ ପୁଣି ପ୍ରାର୍ଥୀ କରିବ ନା ନୂଆ ଚେହେରାଙ୍କୁ ପ୍ରାର୍ଥୀ କରିବ ତାକୁ ନେଇ ସମସ୍ତେ ସନ୍ଦେହରେ ପଡିଛନ୍ତି । ହେଲେ ବିଜେପି ଶେଷ ମୁହୂର୍ତ୍ତରେ ଏଠାରେ ଚକିତ କଲା ଭଳି ପ୍ରାର୍ଥୀ ଘୋଷଣା ବି କରି ପାରେ ବୋଲି ଗୋଟିଏ ମହଲ ଆଶଙ୍କା କରୁଛି ।
ତେବେ ଉପନିର୍ବାଚନ ନେଇ ବିଜେପି କିନ୍ତୁ ପ୍ରସ୍ତୁତି ଆରମ୍ଭ କରି ସାରିଛି, ରାଷ୍ଟ୍ରୀୟ ଅଧ୍ୟକ୍ଷଙ୍କୁ ଭେଟି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ରାଜ୍ୟ ବିଜେପି ସଭାପତି ମନମୋହନ ସାମଲ ଆଲୋଚନା କରିଛନ୍ତି। ଆସନ୍ତାକାଲି ନୂଆପଡା ଉପ ନିର୍ବାଚନକୁ ନେଇ ବିଜେପିର କୋର କମିଟି ବୈଠକ ବସୁଛି । କୋର କମିଟି ବୈଠକରେ ପ୍ରାର୍ଥୀଙ୍କ ଠାରୁ ନେଇ ନିର୍ବାଚନରେ ଦଳର ରଣନୀତି ଉପରେ ବିସ୍ତୃତ ଆଲୋଚନା ହେବ ।
ରାଷ୍ଟ୍ରୀୟ ସଙ୍ଗଠନ ମହାମନ୍ତ୍ରୀ ବି.ଏଲ୍. ସନ୍ତୋଷ, ରାଷ୍ଟ୍ରୀୟ ସଙ୍ଗଠକ ଭି. ସତୀଶ ଓଡିଶା ଗସ୍ତରେ ଆସୁଥିବା ବେଳେ ବୈଠକରେ ରାଜ୍ୟ ସଭାପତି ଏବଂ ମୁଖ୍ୟମନ୍ତ୍ରୀଙ୍କ ସହ ୨ ପ୍ରଭାରୀ ଏବଂ ୨ ଉପମୁଖ୍ୟମନ୍ତ୍ରୀ ଏବଂ କୋର କମିଟିର ସଦସ୍ୟମାନେ ସାମିଲ ହେବେ।
ଟିକେଟ ଦାବିଦାରଙ୍କ ଭିତରେ ଆଗରେ ତିନି ଜଣଙ୍କ ନାମ ରହିଥିବା ଚର୍ଚ୍ଚା ହେଉଛି । ତିନି ଆଶାୟୀଙ୍କ ମଧ୍ୟରେ ୨୦୨୪ ସାଧାରଣ ନିର୍ବାଚନରେ ଦଳୀୟ ପ୍ରାର୍ଥୀ ହୋଇଥିବା ସାଂସଦ ବସନ୍ତ ପଣ୍ଡାଙ୍କ ପୁଅ ଅଭିନନ୍ଦନ ପଣ୍ଡା, ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଯଦୁମଣି ପାଣିଗ୍ରାହୀ ଏବଂ ଖରିଆରରୋଡ ଏନଏସି ଅଧ୍ୟକ୍ଷା ସୋନିଆ ଜୈନଙ୍କ ନାମ ରହିଛି l ଦଳ ଯଦି ସୁଭଦ୍ରା ଯୋଜନାର ସଫଳତା ସହିତ ମହିଳା କାର୍ଡ ଖେଳିବ ତେବେ ସୋନିଆ ପ୍ରଥମ ପସନ୍ଦ ହେବା ବିଚିତ୍ର ନୁହେଁ । ହେଲେ ଏମାନଙ୍କୁ ବାଦ ଦେଇ ବିଜେପି ଚକିତ କଲାଭଳି ପ୍ରାର୍ଥୀ ଘୋଷଣା ବି କରିପାରେ । ଯେହେତୁ ବିଜେପି ଏବେ କ୍ଷମତାରେ ଉପ ନିର୍ବାଚନରେ ଦଳ ସବୁ ବଳ ଖଟାଇ ଏହି ଆସନ କୁ ଜିତିବାକୁ ଚାହିଁବ ।
୧୩ ତାରିଖରେ ବିଜ୍ଞପ୍ତି ପ୍ରକାଶ ପରେ ୨୦ ତାରିଖ ରହିଛି ପ୍ରାର୍ଥିପତ୍ର ଦାଖଲର ଶେଷ ତାରିଖ। ତେଣୁ ଦଳ ପକ୍ଷରୁ କିଏ ପ୍ରାର୍ଥୀ ହେବେ ତାହା ଖୁବ ଶୀଘ୍ର ଘୋଷଣା ହେବ ।
