ଓଡ଼ିଶା ଲିଡ୍ସ(ବ୍ୟୁରୋ): ଆଉ ଗୋଟିଏ ଦିନ ପରେ ନୂଆପଡ଼ାରେ ଭୋଟ ଗ୍ରହଣ ହେବ । ଅଢେଇ ଲକ୍ଷରୁ ଅଧିକ ଭୋଟର ନିଜ ନିଜର ମତାଧିକାର ସାବ୍ୟସ୍ତ କରିବେ । ଗତକାଲି ଠାରୁ ପ୍ରଚାର ଶେଷ ହୋଇ ସାରିଛି । ଭୋଟ ଗ୍ରହଣ ପାଇଁ ସରକାରୀ ସ୍ତରରେ ବ୍ୟାପକ ପ୍ରସ୍ତୁତି ହୋଇଥିଲା ବେଳେ ଶାନ୍ତି ଶୃଙ୍ଖଳା ରକ୍ଷା ପାଇଁ ବ୍ୟାପକ ପୋଲିସ ମୁତୟନ ହୋଇଛନ୍ତି । ଭୋଟ ଗ୍ରହଣ ପାଇଁ ପ୍ରଶାସନିକ ସ୍ତରରେ ସବୁ ପ୍ରସ୍ତୁତି ସରି ସାରିଛି । ଅନ୍ୟ ପକ୍ଷରେ ତିନି ଦଳ ଏବେ ଆଶା ଆଶଙ୍କାରେ ବୁଡି ରହିଛନ୍ତି । ସାଧାରଣ ନିର୍ବାଚନ ପରେ ପ୍ରଥମ ଥର ରାଜ୍ୟରେ ଉପନିର୍ବାଚନ ଅନୁଷ୍ଠିତ ହେଉଛି । ନୂଆପଡା ନିର୍ବାଚନ ମଣ୍ଡଳୀରେ ଗତ ନିର୍ବାଚନରେ ବିଜୁ ଜନତା ଦଳ ପ୍ରାର୍ଥୀ ରାଜେନ୍ଦ୍ର ଢୋଲକିଆ ବିଜୟୀ ହୋଇଥିଲେ । ତାଙ୍କର ଦେହାନ୍ତ କାରଣରୁ ଏଠାରେ ଉପନିର୍ବାଚନ ଅନୁଷ୍ଠିତ ହେଉଛି । ଶାସକ ଦଳ ଭାବେ ବିଜେପି ପାଇଁ ଏହି ଉପନିର୍ବାଚନ ସମ୍ମାନର ପ୍ରଶ୍ନ ହୋଇ ଛିଡା ହୋଇଥିଲା ବେଳେ ବିଜେଡି ପାଇଁ ଆହ୍ୱାନ ହୋଇଛି । ଅପରପକ୍ଷେ ଏହା କଂଗ୍ରେସ ପାଇଁ ଆସ୍ଥାଭାଜନର ପ୍ରଶ୍ନ ହୋଇଛି ।
ଶାସକ ଦଳ ଭାବେ ବିଜେପି ପ୍ରଥମ ଥର ଏହି ଉପନିର୍ବାଚନକୁ ସମ୍ମୁଖୀନ ହେଉଛି । ତେଣୁ ଦଳ ପାଇଁ ଓ ସରକାର ପାଇଁ ଏହା ସମ୍ମାନର ପ୍ରଶ୍ନ ହୋଇଛି । ଏହି ନିର୍ବାଚନ ଜିତିଲେ ବିଜେପି ପ୍ରତି ରାଜ୍ୟବାସୀଙ୍କ ସମର୍ଥନ ଅଛି ବୋଲି ପ୍ରମାଣିତ ହେବ । ଏହା ସହିତ ମୁଖ୍ୟମନ୍ତ୍ରୀ ମୋହନ ମାଝୀ ଓ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ପାଇଁ ମଧ୍ୟ ସମ୍ମାନର ପ୍ରଶ୍ନ ହୋଇଛି । ଦଳ ଏଠାରେ ବିଜୟୀ ହେଲେ ଉଭୟଙ୍କ ପତିଆରା ମଧ୍ୟ ବୃଦ୍ଧି ପାଇବ । ଅନ୍ୟପକ୍ଷରେ ବିଜେଡି ପାଇଁ ଏହା ଆହ୍ୱାନ ଭରା ହୋଇଛି । ଗତ ନିର୍ବାଚନରେ ଏହି ଆସନରୁ ବିଜେଡି ପ୍ରାର୍ଥୀ ବିଜୟୀ ହୋଇଥିଲା ବେଳେ ପୁନର୍ବାର ଏହି ଆସନକୁ ନିଜ ଅକ୍ତିୟାରକୁ ଆଣିବାକୁ ବିଜେଡି ଝାଳବୁହା ଉଦ୍ୟମ କରୁଛି । ଦଳ ଏହି ନିର୍ବାଚନକୁ କେତେ ଗୁରୁତ୍ୱ ଦେଉଛି ତାର ପ୍ରମାଣ ହେଉଛି ପୂର୍ବତନ ମୁଖ୍ୟମନ୍ତ୍ରୀ ଦୁଇଥର ଏହି ନିର୍ବାଚନ ମଣ୍ଡଳୀକୁ ଗସ୍ତ କରିବା । କଂଗ୍ରେସ ପାଇଁ ଏହା ଆସ୍ଥାଭାଜନର ବିଷୟ ହୋଇଛି । ନିର୍ବାଚନ ପରଠାରୁ ବିଶେଷ କରି ଭକ୍ତ ଚରଣ ଦାସ ପିସିସି ସଭାପତି ହେବା ପରେ କଂଗ୍ରେସ ସରକାର ବିରୁଦ୍ଧରେ ମୁଖର ହୋଇଛି । ସରକାରଙ୍କ ବିରୁଦ୍ଧରେ ଦଳ ବିଭିନ୍ନ ସମୟରେ ଆନ୍ଦୋଳନକୁ ଓହ୍ଲାଇ ରାଜ୍ୟବାସୀଙ୍କ ଆସ୍ଥା ଭାଜନ ହେବାକୁ ଉଦ୍ୟମ କରିଛି ଓ କିଛି ମାତ୍ରାରେ ସଫଳ ମଧ୍ୟ ହୋଇଛି । ଏହି ନିର୍ବାଚନରେ ବିଜୟୀ ହେଲେ ଦଳ ରାଜ୍ୟବାସୀଙ୍କ ଅଧିକ ନିକଟତର ହେବାକୁ ଆଶା ବାନ୍ଧିଛି । ତିନିଦଳ ନୂଆପଡାବାସୀଙ୍କ ହୃଦୟ ଜିତିବାକୁ ଜୋରଦାର ପ୍ରଚାର ମଧ୍ୟ କରିଛନ୍ତି । କଂଗ୍ରେସ ଆଦିବାସୀ କାର୍ଡ ଖେଳିଥିଲା ବେଳେ ବିଜେଡି ମହିଳା କାର୍ଡ ଖେଳିଛି । ଅପରପକ୍ଷେ ବିଜେପି ଅନୁକମ୍ପା ଭୋଟ ହାତେଇ ବିଜୟୀ ହେବାକୁ ରାଜେନ୍ଦ୍ର ଢୋଲକିଆଙ୍କ ପୁଅଙ୍କୁ ପ୍ରାର୍ଥୀ କରିଛି । ଏବେ ନିର୍ବାଚନରେ ଅବତୀର୍ଣ୍ଣ ହୋଇଥିବା ସବୁ ପ୍ରାର୍ଥୀଙ୍କ ଭାଗ୍ୟ ଭୋଟରଙ୍କ ପାଖରେ ବନ୍ଧା ପଡିଛି ।
