ଓଡ଼ିଶା ଲିଡ୍ସ(ବ୍ୟୁରୋ): ନୂଆପଡା ଉପନିର୍ବାଚନ ପାଇଁ ରାଜ୍ୟ ରାଜନୀତି ବେଶ ଉଷ୍ମ ହୋଇ ପଡିଛି । ଆଜି ବିଜେପି ଓ କଂଗ୍ରେସ ପ୍ରାର୍ଥୀ ନାମାଙ୍କନ ଦାଖଲ କରିଥିଲା ବେଳେ ଆସନ୍ତା କାଲି ବିଜେଡି ପ୍ରାର୍ଥୀ ନାମାଙ୍କନ ଦାଖଲ କରିବେ । ବିଜେଡିର ଆଗଧାଡ଼ିର ନେତା ଓ ନେତ୍ରୀ ନୂଆପଡ଼ାରେ ଭିଡ଼ ଜମାଇଲେଣି । ନୂଆପଡ଼ାରେ ତ୍ରିମୁଖି ପ୍ରତିଦ୍ୱନ୍ଦିତା ହେଉଥିବା ସ୍ପଷ୍ଟ ହୋଇଛି । ବିଜେଡି ନୂଆପଡା ନିର୍ବାଚନକୁ ଗୁରୁତ୍ୱ ଦେଉନାହିଁ, ବିଜେପି ସହିତ ବିଜେଡି ଡିଲ କରିଛି ବୋଲି ତମାମ ଆଲୋଚନା ରାଜ୍ୟ ରାଜନୀତିରେ ଘୁରି ବୁଲୁଥିଲା ବେଳେ ଦଳର ସର୍ବମାନ୍ୟ ନେତା ତଥା ବିଜେଡି ସଭାପତି ନିର୍ବାଚନରେ କି ଆଭିମୁଖ୍ୟ ଗ୍ରହଣ କରିବେ ତାକୁ ନେଇ ଆଶା ଆଶଙ୍କା ଥିଲା । ହେଲେ ଦଳର ୪୦ ଜଣିଆ ଷ୍ଟାର ପ୍ରଚାରକ ତାଲିକାର ସର୍ବାଗ୍ରେ ନବୀନଙ୍କ ନାଁ ରହିଛି । ଯାହା ନବୀନ ଏହି ଉପନିର୍ବାଚନରେ ପ୍ରଚାର କରିବାକୁ ମଇଦାନକୁ ଓହ୍ଲାଉଥିବା ସ୍ପଷ୍ଟ ହୋଇଛି । ଦୀର୍ଘ ଦିନର ନୀରବତା ଭାଙ୍ଗି ନବୀନ ପ୍ରଚାର ମଇଦାନକୁ ଯିବା ବିଜେଡି ଦଳର ନେତା ଓ କର୍ମୀଙ୍କୁ ବେଶ ଉତ୍ସାହିତ କରିଛି । ଅନ୍ୟ ପକ୍ଷରେ ବିଜେଡି ଏହି ଉପନିର୍ବାଚନକୁ କେତେ ଗୁରୁତ୍ୱ ଦେଉଛି ତାକୁ ମଧ୍ୟ ପ୍ରମାଣିତ କରୁଛି ।
ନିକଟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ ସଭାରେ ନିଜ ବକ୍ତବ୍ୟରେ କହିଥିଲେ ନୂଆପଡ଼ାରେ ବିଜେପି ଓ କଂଗ୍ରେସ ମଧ୍ୟରେ ଲଢେ଼ଇ ହେବ । ମୋହନ ଏହା ଜାଣି ଶୁଣି କହିଥିଲେ କି ବିଜେଡିର ଲୋକପ୍ରିୟତା କମାଇବାକୁ ଏହା କହିଥିଲେ ତାହା ଭିନ୍ନ କଥା । ହେଲେ ନବୀନ ପଟ୍ଟନାୟକ ପ୍ରଚାର ମଇଦାନକୁ ଓହ୍ଲାଇଲେ ବିଜେପି ଓ କଂଗ୍ରେସର ଅଙ୍କ ବିଗାଡି ଦେବାକୁ ଯେ ସକ୍ଷମ ଏହା ସମସ୍ତେ ଜାଣନ୍ତି । ଗତ ନିର୍ବାଚନରେ ଦଳ ପରାଜିତ ହୋଇଛି ସତ, ଦଳ ମଧ୍ୟରେ ବିଭିନ୍ନ କାରଣକୁ ନେଇ ବିବାଦ ସୃଷ୍ଟି ହୋଇଛି, ହେଲେ ନବୀନଙ୍କ ଲୋକପ୍ରିୟତାରେ କାଣିଚାଏ ଆଞ୍ଚ ଆସିନାହିଁ । ବିଗତ ଦିନ ପରି ଆଜି ବି ରାଜ୍ୟବାସୀଙ୍କ ଶ୍ରଦ୍ଧା ସମ୍ମାନ ନବୀନଙ୍କ ପ୍ରତି ଅତୁଟ ରହିଛି । ତେଣୁ ନବୀନ ଦଳ ବଳ ନେଇ ପ୍ରଚାରକୁ ଓହ୍ଲାଇଲେ ନୂଆପଡା ଚିତ୍ର ବଦଳି ଯିବା ବିଚିତ୍ର ନୁହେଁ । ପୂର୍ବତନ ମନ୍ତ୍ରୀ ଇଂ ପ୍ରୀତିରଞ୍ଜନ ଘଡାଇଙ୍କ କହିବା ଅନୁଯାୟୀ ନବୀନଙ୍କ ସମୟରେ ନୂଆପଡାବାସୀ ନୂଆ ବିକାଶର ଚିତ୍ର ଦେଖିଥିଲେ । ନବୀନଙ୍କ ଲୋକପ୍ରିୟତା ନୂଆପଡ଼ାରେ ଢେର ଅଧିକ ରହିଛି । ଦଳ ଏଠାରେ ବିଜୟୀ ହେବ । ନବୀନ ପ୍ରଚାର ସମୟରେ ନୂଆପଡା ବିକାଶ ବିଷୟରେ କହିବା ସହିତ ୧୬ ମାସରେ ରାଜ୍ୟରେ ଦେଖା ଦେଇଥିବା ଆଇନ କାନୁନ ବ୍ୟବସ୍ଥା ବିଷୟରେ ନିଶ୍ଚିତ ମତ ଦେବେ ଏଥିରେ ସନ୍ଦେହ ନାହିଁ । ଯାହା ବିଜେପି ଓ କଂଗ୍ରେସକୁ କ୍ଷତି ପହଞ୍ଚାଇ ବିଜେଡିକୁ ଅଧିକ ଗ୍ରହଣୀୟ କରିବା ନିଶ୍ଚିତ ।
