ବିଡ଼ିଓଙ୍କ ଅନୁରୋଧ ପରେ ଧାରଣା ପ୍ରତ୍ୟାହୃତ
ପିଇଓଙ୍କୁ ଅଭିଯୁକ୍ତଙ୍କ କ୍ଷମା ପ୍ରାର୍ଥନା !
ଓଡ଼ିଶା ଲିଡ୍ସ(ଦଶରଥପୁର): ବନ୍ୟାଞ୍ଚଳକୁ ରିଲିଫ ସାମଗ୍ରୀ ନେଇ ଯାଉଥିବା ଦଶରଥପୁର ବ୍ଲକ କଁୟା ପଞ୍ଚାୟତ ପିଇଓ ପ୍ରଶାନ୍ତ ମିଶ୍ର ବନ୍ୟା ବିପନ୍ନଙ୍କ ପାଇଁ ଉଦ୍ଦିଷ୍ଟ ରିଲିଫ ସାମଗ୍ରୀ ନେବା ସମୟରେ ସାମଗ୍ରୀ ହଡ଼ପ ଉଦ୍ୟମ ସହ ଆକ୍ରମଣ ହୋଇଥିଲା । ଏ ନେଇ ଅଭିଯୋଗ ପରେ ଘଟଣାରେ ମଙ୍ଗଳପୁର ପୋଲିସ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିବା ବଦଳରେ ଥାନାରେ କିଛି ସମୟ ଅଟକ ରଖି ବ୍ୟକ୍ତିଗତ ମୁଚାଲିକାରେ ଛାଡ଼ିଦେଇଥିଲେ । ଘଟଣାକୁ ନେଇ ଅଭିଯୁକ୍ତଙ୍କ ପ୍ରତି ମଙ୍ଗଳପୁର ପୋଲିସ ଅନୁକମ୍ପା ମନୋଭାବ ପ୍ରଦର୍ଶନ କରୁଥିବା ଅଭିଯୋଗ କରି ବ୍ଲକ ପିଇଓ ସଙ୍ଘ ଆଜି ବ୍ଲକ କାର୍ଯ୍ୟାଳୟରେ ଧାରଣାରେ ବସିଥିଲା । ପିଇଓଙ୍କ ସୁରକ୍ଷା ସୁନିଶ୍ଚିତ କରିବା ସହିତ ଆକ୍ରମଣରେ ସମ୍ପୃକ୍ତ ଅଭିଯୁକ୍ତମାନଙ୍କୁ ପୁଲିସ ଗିରଫ ନକରିବା ପର୍ଯ୍ୟନ୍ତ ପିଇଓ ସଙ୍ଘ ବନ୍ୟା ମୁକାବିଲାରେ ସହଯୋଗ କରିବେ ନାହିଁ ବୋଲି ରୋକ ଠୋକ ମନା କରିଦେବାରୁ ପ୍ରଶାସନର ଚିନ୍ତା ବଢିଥିଲା। ଖବର ପାଇ ଜିଲ୍ଲାପାଳ ଅମ୍ବର କୁମାର କର ଏବଂ ଯାଜପୁର ବିଧାୟିକା ସୁଜାତା ସାହୁ ଦଶରଥପୁର ବ୍ଲକ କାର୍ଯ୍ୟାଳୟରେ ପହଞ୍ଚି ବିଡ଼ିଓ ଆକାଶ ପଟ୍ଟନାୟକଙ୍କ ଉପସ୍ଥିତିରେ ପିଇଓ ସଙ୍ଘ କାର୍ଯ୍ୟକର୍ତ୍ତାଙ୍କକୁ ଡାକି ଆଲୋଚନା କରିଥିଲେ। ବନ୍ୟା ପରିସ୍ଥିତିରେ ବିପନ୍ନଙ୍କ ସ୍ୱାର୍ଥକୁ ପ୍ରାଥମିକତା ଦେବାକୁ ସଙ୍ଘ କାର୍ଯ୍ୟକର୍ତାଙ୍କୁ ବିଡ଼ିଓ ଶ୍ରୀ ପଟ୍ଟନାୟକ ଅନୁରୋଧ କରିବା ପରେ ସଙ୍ଘର କାର୍ଯ୍ୟକର୍ତ୍ତା ନିଷ୍ପତ୍ତି ଜଣାଇବାକୁ କିଛି ସମୟ ନେଇଥିଲେ। ଏ ନେଇ ଜର୍ମକର୍ତ୍ତା ଆଲୋଚନା ପରେ ବନ୍ୟା ବିପନ୍ନଙ୍କ ସ୍ୱାର୍ଥ ଦୃଷ୍ଟିରୁ ସଙ୍ଘ ଧାରଣାରୁ ଓହରିଲା ବୋଲି ବିଡ଼ିଓଙ୍କୁ ଅବଗତ କରିଥିଲେ । ଏହା ସହ ଅଭିଯୁକ୍ତଙ୍କୁ ଗିରଫ କରାନଗଲେ ବନ୍ୟା ସ୍ଥିତି ସୁଧୁରିବା ପରେ ସଙ୍ଘ ପୁନଶ୍ଚ କାର୍ଯ୍ୟବନ୍ଦ ଆନ୍ଦୋଳନ କରିବ ବୋଲି ନିଷ୍ପତି ନେଇଥିବା ମଧ୍ୟ ଜଣାଇଥିଲେ। ଏହାର କିଛି ସମୟ ପରେ ଅଭିଯୁକ୍ତ ମାନେ ପଞ୍ଚାଯତ ସମିତି କାର୍ଯ୍ୟାଳୟରେ ପହଞ୍ଚି ଆନ୍ଦୋଳନରତ ପିଇଓ ସଙ୍ଘ କାର୍ଯ୍ୟକର୍ତ୍ତାଙ୍କ ନିକଟରେ ଘଟଣାକୁ ନେଇ କ୍ଷମା ପ୍ରାର୍ଥନା କରିଥିବା ଜଣାଯାଇଛି। ଏହି ଘଟଣାକୁ ନେଇ ଯାଜପୁର ବିଜେପି ଦୁଇ ଭାଗ ହୋଇଥିଲା । ଗୋଟିଏ ଗୋଷ୍ଠି ଆକ୍ରମଣକାରୀଙ୍କୁ ଗିରଫ ଦାବି କରୁଥିଲା ବେଳେ ଆଉ ଗୋଟିଏ ଗୋଷ୍ଠି ଆକ୍ରମଣକାରୀଙ୍କୁ ସୁରକ୍ଷା ଦେବାକୁ ପ୍ରଶାସନ ଉପରେ ଚାପ ପକାଉଥିବା ଚର୍ଚ୍ଚା ହେଉଥିଲା ।
