ବଢୁଛି ତାତି: ବୟସ୍କ, ଶିଶୁ ଓ ସ୍ବାସ୍ଥ୍ୟ ଜଟିଳତା ଥିବା ଲୋକଙ୍କ ପ୍ରତି ଅଧିକ ବିପଦ

ଓଡ଼ିଶା ଲିଡ୍ସ(ବ୍ୟୁରୋ): ଦେଶର ଅଧିକାଂଶ ସ୍ଥାନରେ ପ୍ରବଳ ଗ୍ରୀଷ୍ମଲହରି ଜାରି ରହିଛି। ଦେଶର ଉତ୍ତର ଭାରତରେ ସ୍ଥିତ ଅଧିକ ଜଟିଳ ରହିଛି। ଓଡ଼ିଶାରେ ମଧ୍ୟ ତାତି ରେକର୍ଡ ସ୍ତରରେ ପହଞ୍ଚିଛି । ଯାହା ଜନଜୀବନକୁ ପ୍ରଭାବିତ କରିଛି । ପ୍ରବଳ ଗ୍ରୀଷ୍ମପ୍ରବାହକୁ ନେଇ ପ୍ରଖ୍ୟାତ ଶ୍ବସନ ରୋଗ ବିଶେଷଜ୍ଞ ଡାକ୍ତର ରଣଦୀପ ଗୁଲେରିଆ ଲୋକମାନଙ୍କୁ ପ୍ରବଳ ଗରମଜନିତ ଅସୁସ୍ଥତା, ଜଳଶୁ‌ଷ୍କତା ଓ ଅତ୍ୟଧିକ ଥକା ଲାଗିବା ଭଳି ସଙ୍କେତ ପ୍ରତି ସତର୍କ ରହିବାକୁ ପରାମର୍ଶ ଦେଇଛନ୍ତି। ଗୁରୁଗ୍ରାମ ସ୍ଥିତ ମେଦାନ୍ତର ଇନଷ୍ଟିଚ୍ୟୁଟ ଅଫ୍‌ ଇଣ୍ଟରନାଲ୍‌ ମେଡିସିନ୍‌, ରେସ୍ପିରେଟୋରି ଆଣ୍ଡ ସ୍ଲିପ୍‌ ମେଡିସିନ୍‌ ଅଧ୍ୟକ୍ଷ ଡା. ଗୁଲେରିଆ କହିଛନ୍ତି, ଦେଶରେ ତାପମାତ୍ରା ବୃଦ୍ଧି ସହ ଗ୍ରୀଷ୍ମଲହରି ଜାରି ରହିଛି। ବିଶେଷ କରି ଉତ୍ତର ଭାରତ ସ୍ଥିତି ଅତ୍ୟନ୍ତ ଖରାପ ରହିଛି। ଡା. ଗୁଲେରିଆ କହିଛନ୍ତି, ଅଧିକ ସମୟ ଟାଣ ଖରା ସଂସ୍ପର୍ଶରେ ଆସିବା ଦ୍ବାରା ଅଂଶୁଘାତ ହେବାର ସମ୍ଭାବନା ରହିଛି। ଏହା ଜୀବନ ପ୍ରତି ମଧ୍ୟ ବିପଦ ସୃଷ୍ଟି କରୁଛି । ଶରୀରର ତାପମାତ୍ରା ନିୟନ୍ତ୍ରଣ ବାହାରକୁ ଚାଲିଗଲେ ଅଂଶୁଘାତ ହୁଏ। ଡା. ଗୁଲେରିଆ କହିଛନ୍ତି, ବୟସ୍କ ବ୍ୟକ୍ତି, ଶିଶୁ ଓ ବିଭିନ୍ନ ସ୍ବାସ୍ଥ୍ୟ ସଙ୍କଟ ଥିବା ଲୋକ ତଥା ବିଶେଷ କରି ହୃଦ୍‌ରୋଗ ଓ ଫୁସ୍‌ଫୁସ୍‌ ରୋଗରେ ପୀଡ଼ିତ ବ୍ୟକ୍ତିମାନଙ୍କ ପାଇଁ ଗ୍ରୀଷ୍ମଲହରି ଅଧିକ ବିପଦର କାରଣ ହୋଇଥାଏ । ଅତ୍ୟଧିକ ଖରା ସମୟରେ ଲୋକମାନଙ୍କୁ ବାହାରକୁ ନ ଯିବାପାଇଁ ଏବଂ ପ୍ରଚୁର ପରିମାଣର ପାଣି, ଓଆର୍‌ଏସ୍‌, ଲେମ୍ବୁ ପାଣି ଓ ପଇଡ଼ ପାଣି ପିଇବାପାଇଁ ସେ ପରାମର୍ଶ ଦେଇଛନ୍ତି। ସେହିପରି ସିଧାସଳଖ ଟାଣ ଖରାକୁ ନ ଯିବା, ଖରାକୁ ଗଲେ ଛତା, ଟୋପି ଓ ପଗଡ଼ି ବ୍ୟବହାର କରିବା, ଅତ୍ୟଧିକ ଗରମ ଯୋଗୁ କ୍ଳାନ୍ତ ଲାଗୁଥିଲେ ତୁରନ୍ତ ପାଣି ପିଇବା ପାଇଁ ସେ ପରାମର୍ଶ ଦେଇଛନ୍ତି ।