ଓଡ଼ିଶା ଲିଡ୍ସ(ବ୍ୟୁରୋ): ବେଶ କିଛି ବର୍ଷ ହେଲା ରାଜ୍ୟ ରାଜନୀତିରେ ଚର୍ଚ୍ଚାର ଶୀର୍ଷରେ ରହିଛନ୍ତି ଭୈରବ କାର୍ତ୍ତିକେୟ ପାଣ୍ଡିଆନ । ଜଣେ ଆଇଏଏସ ଅଧିକାରୀ ହୋଇ ଦେଶର ଏକ ପ୍ରତିଷ୍ଠିତ ଆଞ୍ଚଳିକ ଦଳ ବିଜେଡିକୁ ନିଜ ଆଙ୍ଗୁଳି ଅଗରେ ନଚାଉଥିବା ନେଇ ବେଶ ଚର୍ଚ୍ଚା ହୁଏ ବିଜେଡି ଦଳୀୟ ମହଲ ସହିତ ଅନ୍ୟ ମହଲରେ । ହେଲେ ୨୦୨୪ ନିର୍ବାଚନରେ ବିଜେଡି ପରାଜିତ ହେଲା ପରେ ଚର୍ଚ୍ଚାର ଶିରୋନାମାରେ ଥିବା ପାଣ୍ଡିଆନ ବିବାଦରେ ଛନ୍ଦି ହୋଇ ପଡ଼ିଥିଲେ । ଫଳରେ ନିର୍ବାଚନ ପରେ ସେ ବାଧ୍ୟ ହୋଇ ରାଜନୀତିରୁ ସନ୍ୟାସ ନେଉଥିବା ଘୋଷଣା କରିଥିଲେ । ହେଲେ ଚର୍ଚ୍ଚା ଓ ବିବାଦରେ ରହୁଥିବା ପାଣ୍ଡିଆନ ଏବେ ଓଡ଼ିଶା ଛାଡ଼ିବେ ବୋଲି ନୂଆ ଚର୍ଚ୍ଚା ଆରମ୍ଭ ହୋଇଛି । ହେଲେ ନିଜକୁ ପୁଣି ଚର୍ଚ୍ଚାର ପରିଧି ମଧ୍ୟକୁ ଆଣିବାକୁ ଏହା ପାଣ୍ଡିଆନଙ୍କ ନୂଆ ରଣନୀତି ନା ଏହା ପଛରେ ସତ୍ୟତା ଅଛି ତାହା କିନ୍ତୁ ସ୍ପଷ୍ଟ ହୋଇନାହିଁ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ଭାବେ ଦାୟିତ୍ୱ ନିର୍ବାହ କରୁକରୁ ବିଜେଡିର ଅଘୋଷିତ ନେତା ହୋଇ ଯାଇଥିଲେ ପାଣ୍ଡିଆନ । ଦଳରେ ତାଙ୍କ ନିର୍ଦ୍ଦେଶ ବିନା ପତ୍ର ହଲିବା ମଧ୍ୟ ସମ୍ଭବ ନଥିଲା । ରାଜନୀତିରୁ ସନ୍ୟାସ ନେବା ପରେ ମଧ୍ୟ ଦଳରେ ତାଙ୍କର ଅଖଣ୍ଡ କ୍ଷମତା ରହିଥିବା କାହାକୁ ଅଛପା ନୁହେଁ । ରାଜନୀତିରୁ ସନ୍ନ୍ୟାସ ନେଲା ପରେ ମଧ୍ୟ ପାଣ୍ଡିଆନ୍ ଏବେ ନବୀନ ନିବାସରେ ରହି ଦଳ ପରିଚାଳନା କରୁଥିବା ନେଇ ଚର୍ଚ୍ଚା ଜାରି ରହିଛି। ଏବେ ବି ପାଣ୍ଡିଆନ୍ ଦଳୀୟ ନେତାଙ୍କ ସହ ବିଭିନ୍ନ ବିଷୟରେ ଆଲୋଚନା କରୁଥିବା ଓ ନିଷ୍ପତି ନେଉଥିବା ଖବର ଅନେକ ସମୟରେ ପଦାକୁ ଆସିଛି। ଏବର ନୂଆ ଚର୍ଚ୍ଚା ଭିତରେ ସେ ଏବେ ବିଦେଶରେ ଯାଇ ଚାକିରି କରିବେ ବୋଲି ଏକ ଗଣ ମାଧ୍ୟମରେ ପ୍ରକାଶ ପାଇଛି ।
ଗତ ସାଧାରଣ ନିର୍ବାଚନରେ ବିଜେଡିର ବିପର୍ଯ୍ୟୟର କାରଣ ପାଣ୍ଡିଆନ ବୋଲି ବିଜେଡିରେ ଚର୍ଚ୍ଚା ଏବେ ମଧ୍ୟ ଥମି ନାହିଁ । ସେ ଓଡ଼ିଶା ଛାଡ଼ି ଏକ ଅର୍ନ୍ତଜାତୀୟ ସଂସ୍ଥାରେ କାମ କରିପାରନ୍ତି ବୋଲି ଖବର ପ୍ରକାଶ ପାଇଛି, ଅବଶ୍ୟ ଏନେଇ ପାଣ୍ଡିଆନ ସ୍ପଷ୍ଟ କରି ନାହାନ୍ତି । ବିଦେଶ ଯାଇ ଚାକିରି କରିବେ ବୋଲି ଯେଉଁ ଚର୍ଚ୍ଚା ହେଉଛି ତାହା ସତ ହେବ କି ମିଛ, ତାହା ଅବଶ୍ୟ ଆଗାମୀ ଦିନରେ ସ୍ପଷ୍ଟ ହେବ।
ନିର୍ବାଚନ ପରେ ପଦାକୁ ଆସିନଥିଲେ ମଧ୍ୟ ପାଣ୍ଡିଆନ ନବୀନ ନିବାସରେ ରହି ଦଳକୁ ପରିଚାଳନା କରୁଥିବା ଚର୍ଚ୍ଚା ହେଉଥିଲା । ଏବେ ମଧ୍ୟ ଏହାକୁ ନେଇ ବିଜେଡି ଭିତରେ ଅସନ୍ତୋଷ ଚରମ ସୀମାରେ ପହଞ୍ଚିଛି। ପାଣ୍ଡିଆନଙ୍କୁ ନେଇ ବିଜେଡି ବସ୍ତୁତ ଦୁଇ ଭାଗରେ ବିଭକ୍ତ ହୋଇ ସାରିଛି । କିଛି ବରିଷ୍ଠ ନେତାଙ୍କ ସହିତ ଯୁବ ନେତା ପାଣ୍ଡିଆନଙ୍କୁ ଜୋରଦାର ବିରୋଧ କରୁଥିଲା ବେଳେ ଗୋଟିଏ ଗୋଷ୍ଠି ପାଣ୍ଡିଆନଙ୍କ ନିର୍ଦେଶକୁ ଅକ୍ଷରେ ଅକ୍ଷରେ ପାଳନ କରୁଛନ୍ତି । ନବୀନଙ୍କ ନିକଟରେ ଏ ନେଇ ଖବର ଥିଲେ ମଧ୍ୟ ନବୀନ ନୀରବତା ଅବଲମ୍ବନ କରୁଛନ୍ତି । ଏହାକୁ ନେଇ ଦଳରେ ଯେ କୌଣସି ସମୟରେ
ବଡ଼ ଧରଣର ବିସ୍ଫୋରଣ ହେବା ମଧ୍ୟ ଆଶଙ୍କା ପ୍ରକାଶ ପାଇଛି । ଦଳରେ ବିବାଦର ସୂତ୍ରପାତ ହୋଇଥିଲା ବେଳେ ଏହାକୁ ପ୍ରଶମିତ କରିବାକୁ ଏହା ପାଣ୍ଡିଆନଙ୍କ ନୂଆ ରଣ କୌଶଳ ବୋଲି ମଧ୍ୟ ଚର୍ଚ୍ଚା ହେଉଛି ।
