ବିଜେପିର ଗୁରୁତ୍ୱପୂର୍ଣ୍ଣ ବୈଠକ, ଆଶାୟୀଙ୍କ ମଧ୍ୟରେ ବଢୁଛି ଉତ୍କଣ୍ଠା

ଓଡ଼ିଶା ଲିଡ୍ସ(ବ୍ୟୁରୋ): ଆଜି ଭୁବନେଶ୍ୱର ଠାରେ ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ବାସ ଭବନରେ ବିଜେପିର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା, ରାଜ୍ୟ ବିଜେପି ସଭାପତି ମନମୋହନ ସାମଲ, ରାଜ୍ୟ ବିଜେପି ପ୍ରଭାରୀ ବିଜୟପାଲ ସିଂ ତୋମାର, ରାଷ୍ଟ୍ରୀୟ ସାଧାରଣ ସମ୍ପାଦକ ତରୁଣ ଚୁଗ ପ୍ରମୁଖ ଯୋଗଦେଇ ବିଭିନ୍ନ ବିଷୟରେ ଆଲୋଚନା କରିଥିଲେ । ଏହି ଗୁରୁତ୍ୱପୂର୍ଣ୍ଣ ବୈଠକ କିନ୍ତୁ ସାରା ରାଜ୍ୟର ବିଜେପି ନେତାଙ୍କ ମଧ୍ୟରେ ଉତ୍କଣ୍ଠା ବଢ଼ାଇ ଦେଇଛି । ବୈଠକରେ ବିଭିନ୍ନ ନିଗମର ଅଧ୍ୟକ୍ଷ ପଦକୁ ନେଇ ସବିଶେଷ ଆଲୋଚନା ହୋଇଥିଲା ବେଳେ ଯେ କୌଣସି ସମୟରେ ଏହା ଉପରେ ଦଳୀୟ ମୋହର ବାଜିବାର ସମ୍ଭାବନା ରହିଛି । ସରକାର ଗଠନ ପରେ ବିଜେପି ଦଳରେ ତିନିଟି ଦିଗକୁ ନେଇ ଆଲୋଚନା ପର୍ଯ୍ୟାଲୋଚନା ହେଉଛି । ତିନିଟି ଦିଗ ହେଲା ମନ୍ତ୍ରୀ ମଣ୍ଡଳ ସଂପ୍ରସାରଣ, ନିଗମ ଅଧ୍ୟକ୍ଷ ପଦ ଓ ରାଜ୍ୟ ବିଜେପିର ସଭାପତି ପଦ । ଆଜି ବସ୍ତୁତ ନିଗମ ଅଧ୍ୟକ୍ଷ ପଦରେ କେଉଁ ମାନଙ୍କୁ ଅବସ୍ଥାପିତ କରାଯିବ ସେ ନେଇ ଆଲୋଚନା ହୋଇଥିବା ସୂଚନା ମିଳିଛି । ବିଗତ ଦିନ ମାନଙ୍କରେ ଦଳୀୟ ସଂଗଠନ ସଜାଡି ଦଳକୁ ସରକାର ଗଠନରେ ସହଯୋଗ କରିଥିବା ନେତା ଓ ନେତ୍ରୀଙ୍କୁ ନିଗମ ପଦ ଦେଇ ସନ୍ତୁଷ୍ଟ କରିବାକୁ ଯୋଜନା ହୋଇଥିବା ଜଣା ଯାଉଛି । ନିଗମ ପଦବୀ ବଣ୍ଟନ ପରେ ସମ୍ଭବତଃ ମନ୍ତ୍ରୀ ମଣ୍ଡଳ ସଂପ୍ରସାରଣ ପ୍ରକ୍ରିୟା ତ୍ୱରାନ୍ୱିତ ହେବ । ହେଲେ ସବୁ ଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ଦଳର ରାଜ୍ୟ ସଭାପତିଙ୍କ ନାମ ଘୋଷଣା । କାରଣ ଦଳର ନୂତନ ସଭାପତି ହିଁ ଦଳର ଆଗାମି ଭବିଷ୍ୟତ ଗଠନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ । ସରକାର ଗଠନ ପରେ ବିଜେପିର ନଜର ଏବେ ପଞ୍ଚାୟତ ନିର୍ବାଚନ ଉପରେ ରହିଛି। ସଭାପତି ପଦବୀ ପାଇଁ ଅନୁଭବୀ ମନମୋହନ ସାମଲଙ୍କ ନାମ ସର୍ବାଗ୍ରେ ଥିଲା ବେଳେ ଗୋଲଖ ମହାପାତ୍ରଙ୍କ ନାମ ମଧ୍ୟ ଚର୍ଚ୍ଚାରେ ରହିଛି । ଅପରପକ୍ଷେ ନିଗମ ଅଧ୍ୟକ୍ଷ ପଦ ପାଇଁ କିଛି ଆମଦାନୀ ନେତା ବି ଆଶାୟୀ ଥିବା ଜଣାଯାଇଛି । ଦଳ ଏହି ତିନିଟି ଦିଗ ଉପରେ ବେଶ ସତର୍କତା ସହିତ ବିଚାର ବିମର୍ଷ କରୁଥିବା ଜଣାଯାଇଛି ।