ଭୁବନେଶ୍ୱରରେ ଘରୋଇ ଇଞ୍ଜିନିୟରିଂ ପ୍ରଥମ ବର୍ଷ ଛାତ୍ରଙ୍କ ଆତ୍ମହତ୍ୟା ଅଭିଯୋଗ; ପରିବାର ପକ୍ଷରୁ ରାଗିଂ ଅଭିଯୋଗ

ଓଡ଼ିଶା ଲିଡ୍ସ(ବ୍ୟୁରୋ): ଭୁବନେଶ୍ୱରର ଇନ୍‌ଫୋସିଟି ଥାନା ଅଧିନ ଶିଖର ଚଣ୍ଡୀ ଅଞ୍ଚଳରେ ଏକ ଘରୋଇ ବୈଷୟିକ ବିଶ୍ୱବିଦ୍ୟାଳୟରେ ଜଣେ ଇଞ୍ଜିନିୟରିଂ ପ୍ରଥମ ବର୍ଷର ଛାତ୍ର ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଛାତ୍ରଙ୍କ ମୃତ୍ୟୁ ପରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ଅବେହେଳା ଓ ସିନିୟର ଛାତ୍ରଙ୍କ ରାଗିଂକୁ ଦାୟୀ କରିଛନ୍ତି ତାଙ୍କ ପରିବାର । ମୃତ ଛାତ୍ରଙ୍କ ନାମ ବିଶ୍ୱାସ ସ୍ୱାଇଁ। ସେ ବି.ଟେକ୍ ପ୍ରଥମ ବର୍ଷର ଛାତ୍ର ଥିଲେ। ମୃତ ଛାତ୍ରଙ୍କ ଘର ଜଗତସିଂହପୁର ଜିଲ୍ଲା ବାଲିକୁଦା ଥାନା ପଦ୍ମଲାଭପୁରରେ। ତାଙ୍କ ବାପା ବସନ୍ତ ସ୍ୱାଇଁ ମୟୂରଭଞ୍ଜ ଜିଲ୍ଲାରେ ଚାକିରି କରନ୍ତି।
ଗତକାଲି ରାତି ୧୦ଟାରୁ ୧୧ ମଧ୍ୟରେ ଏହି ଘଟଣା ଘଟିଛି। ଆତ୍ମହତ୍ୟା ପୂର୍ବରୁ ବିଶ୍ୱାସ ତାଙ୍କ ଘର ଲୋକଙ୍କ ସହିତ ମୋବାଇଲରେ କଥା ହୋଇଥିବା ପରିବାର ଲୋକ କହିଛନ୍ତି। ରାତି ପ୍ରାୟ ୧୧ଟା ସମୟରେ ବିଶ୍ୱାସଙ୍କ ବାପାଙ୍କ ନିକଟକୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଫୋନ୍ କରି ତାଙ୍କ ପୁଅ ଆତ୍ମହତ୍ୟା ଉଦ୍ୟମ କରିଥିବା କହିଥିଲେ। ଏହି ଘଟଣା ପ୍ରଘଟ ପରେ ବିଶ୍ୱବିଦ୍ୟାଳୟ ପରିସରରେ ଉତ୍ତେଜନା ପ୍ରକାଶ ପାଇଥିଲା। ବିଶ୍ୱାସଙ୍କ ସହପାଠୀମାନେ ହୋହଲ୍ଲା କରିବା ସହିତ ଭଙ୍ଗାରୁଜା ମଧ୍ୟ କରିଥିଲେ। ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚିଥିଲେ । ବିଶ୍ୱାସଙ୍କ ବାପା ଖବର ପାଇ ଭୁବନେଶ୍ୱରରେ ପହଞ୍ଚିଲା ଏକ ଘରୋଇ ହସ୍‌ପିଟାଲରେ ତାଙ୍କ ପୁଅର ମୃତ୍ୟୁ ହୋଇସାରିଥିଲା। ବିଶ୍ୱାସ ଏକ ଗାମୁଛା ସାହାଯ୍ୟରେ ନିଜ ହଷ୍ଟେଲ ରୁମ ଫ୍ୟାନ୍‌ରେ ଝୁଲି ପଡ଼ିଥିଲେ ବୋଲି କୁହାଯାଉଛି। ତାଙ୍କ ବାପାଙ୍କ ସୂଚନା ଅନୁଯାୟୀ, ବେଡ୍‌ ଉପରେ ଚୌକି ଥିଲା ଫ୍ୟାନ୍‌ରୁ ଏକ ଗାମୁଛା ଝୁଲିଥିଲା।
ବିଶ୍ୱାସଙ୍କ ବାପା ଇନ୍‌ଫୋସିଟି ଥାନାରେ ଦେଇଥିବା ଏଫଆଇଆରରେ ତାଙ୍କ ପୁଅର ମୃତ୍ୟୁ ପାଇଁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଓ ମ୍ୟାନେଜମେଣ୍ଟ ଦାୟୀ ବୋଲି ଉଲ୍ଲେଖ କରିବା ସହିତ ସିନିୟର ପିଲାମାନେ ବାରମ୍ବାର ତାଙ୍କ ପୁଅକୁ ରାଗିଂ କରିଛନ୍ତି ବୋଲି ମଧ୍ୟ ଅଭିଯୋଗ କରିଛନ୍ତି । ରାଗିଂ ସଂପର୍କରେ ମୃତ ଛାତ୍ର ବିଶ୍ୱାସ ଘରେ ଜଣାଇଥିଲା ଓ ସେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଓ ମ୍ୟାନେଜମେଣ୍ଟକୁ ଏ ବିଷୟରେ ଜଣାଇଥିଲେ ବୋଲି ମଧ୍ୟ କହିଛନ୍ତି, କିନ୍ତୁ କର୍ତ୍ତୃପକ୍ଷ ଏନେଇ କୌଣସି ପଦକ୍ଷେପ ନେଇ ନଥିବା ସେ ଅଭିଯୋଗ କରିଛନ୍ତି । ଚାରି ପାଞ୍ଚ ଦିନ ପୂର୍ବରୁ ପୁଅକୁ ତା’ ସିନିୟରମାନେ ରାଗିଂ କରିଥିଲେ ବୋଲି ବିଶ୍ୱାସଙ୍କ ବାପା ମଧ୍ୟ ଅଭିଯୋଗ କରିଛନ୍ତି । ଏନେଇ ସେ ତା’ ମା’କୁ ଜଣାଇଥିଲା। ଗତକାଲି ସନ୍ଧ୍ୟାରେ ସିନିୟର ପିଲାମାନେ ପୁଣି ତାକୁ ନିର୍ଯାତନା ଦେଇଥିଲେ ବୋଲି ମଧ୍ୟ ଅଭିଯୋଗ କରିଛନ୍ତି ।
ଘଟଣାର ପୋଲିସ ତଦନ୍ତ କରୁଥିଲା ବେଳେ ଏ ନେଇ କିଛି କହି ହେବ ନାହିଁ ବୋଲି କର୍ତ୍ତୃପକ୍ଷ କହିଛନ୍ତି । ସରକାର ରାଗିଂ ଉପରେ କଠୋର ଆଭିମୁଖ୍ୟ ଗ୍ରହଣ କରୁଥିଲା ବେଳେ ବିଭିନ୍ନ କଲେଜରେ ରାଗିଂ ହେଉଥିବା ଅଭିଯୋଗ ମଧ୍ୟ ହେଉଛି । ଏ ନେଇ ଉଚ୍ଚ ସ୍ତରୀୟ ତଦନ୍ତ ହେବା ସହିତ ସରକାର ଓ ବିଶ୍ଵବିଦ୍ୟାଳୟ କର୍ତ୍ତୃପକ୍ଷ ଦୃଢ଼ ପଦକ୍ଷେପ ନେବା ସହିତ ଅଭିଯୁକ୍ତ ଛାତ୍ରଙ୍କ ବିରୁଦ୍ଧରେ କଡା ଆଭିମୁଖ୍ୟ ଗ୍ରହଣ କରିବା ଜରୁରୀ ବୋଲି ମତ ପ୍ରକାଶ ପାଇଛି ।